1 Mhela awo Melodaki-baladani, mwana wa Baladani, mndewa wa Babuloni, nakalajiza baluwa na ndolendole vihilikwe kwa Hesekiya, kwa vila nakahulika kota nayali yotamika, ila lelo nakapona. 2 Lelo Hesekiya nakawabochela kwa kusangalala wala wasenga na kuwalajila vinhu vyeng'ha viwele kuli ng'hano za heye, viwele ndo sendi na zahabu na vifunyhizi na mafuta ganojile na ng'hano ya vinhu vya kitowa ngondo na vinhu vyeng'ha viwele kuli ng'hano za heye. Hakuwele na chinhu choneche chiwele kuli ng'handa yake ya chiundewa ama kuli undewa wake weng'ha chiwele Hesekiya nayali hawalajile. 3 Hamba mloli Isaya nakaluta kwa mndewa Hesekiya na kumuuza, "Wanhu awa nawalonga choni na wangulawa kohi?" Hesekiya nakamwidichila, "Nawoya kwa heni kulawa isi ya kutali. Nawalawa Babuloni."

4 Mloli nakauza, "Nawona choni kuli ng'handa ya hegwe?" Hesekiya nakedichila, "Nawona chila chinhu kuli ng'handa ya heni. Haduhu ne chinhu chiwele kuli ng'hano za heni chiwele siwalajile."

5 Isaya nakamlonjela Hesekiya, "Uhulichize ulonzi wa Mkulu Nguluwi Yawele na Mong'ho. 6 Ulole, mazuwa ganguya, vinhu vyeng'ha viwele kuli ng'handa ya hegwe ya chiundewa na vinhu vyeng'ha viwele wasekulu wa hegwe nawaviwika mbaka mhela awu, vyohilikwa Babuloni. Haduhu ne chinhu chosigala. Mkulu Nguluwi kangulonga. 7 Wamwe wa walelwa wa hegwe, kulawa kuli lukuli lwa hegwe, wawele wopondigwa hamba, wohilikwa kutali na kubasigwa soni kwa kuwa vitumagwa kuli ng'handa ya mndewa wa Babuloni."

8 Hesekiya nakamwidichila Isaya, "Ulonzi wa Mkulu Nguluwi woulonjile unoga." Nakelonjela mnhumbula kwa vila nayali yochijesa, "Ndowa na kikala goya na kwamilwa kuli mazuwa geng'ha ga kikala kwa heni."