1 Lelo, Mkulu Nguluwi Yawele na Mong'ho,

ka habehi kuwosela wanhu wa muji wa Yelusalemu na isi ya Yuda,

kitumbila kweng'ha kwa chilyo,

na kitumbila kweng'ha kwa mazi.

2 Kahi kowosa wazidahe na wamizi,

walingwamula na waloli,

walaguzi na sekulu,

3 chila chilongozi wa wamizi wa makumi gahano

na wang'hangala,

wanhu walinguwalonjela mbuli za luhala,

wawanzi ng'hatu na wahawi lukami.

4 Nguluwi kowadita wasongolo wawe wang'hangala wa hewo,

wana ndo wowalongoza.

5 Wanhu wochibunza hewo wawo,

chila munhu na yalingikalasa habehi na heye.

Msongolo kombeza sekulu,

mpoka kombeza yalingutogoligwa.

6 Mhela awo munhu yumwe komlonjela mng'holoze,

kuno wawele wang'hali kuli ng'handa ya mhaza wa hewo,

"Kwanalyo ikanzu, kwangutogoligwa,

lelo uwe chilongozi wa hetwe,

ulongoze kuli muji awu, uwele sambi ndo chilundo cha mahame!"

7 Ila zuwa alyo komwidichila,

"Siweza kuwalolela,

ndahela mzidi wa chilyo ne mivalo,

mleche kundita ndiwe chilongozi wa hemwe."

8 Wanhu wa muji wa Yelusalemu wanguzebeduka,

wanhu wa isi ya Yuda wangugwa,

kwa vila wangumbelenhuka Mkulu Nguluwi,

kwa ulonzi na madito ga hewo,

woubeza ukulu wa heye uwele hali hewo.

9 Kumeho kwa hewo kwangoneka kwangutawiza ago,

wangidayilaga gehile ga hewo,

hawalingugavisa kota Sodoma.

Wochona wanhu awo,

kwa vila nawegalila hewo wawo kubagama.

10 Muwalonjele watanganiche ndaze vyowatambichizwe,

kwa vila wolya mafuza ga madito ga hewo.

11 Wochona wehile!

Mbuli za hewo zowalutila vibi,

kwa vila gala gowaditile gowafika hewo wawo.

12 Wasongolo wanguwagaza wanhu wa heni,

wadala wanguwalongoza.

Wanhu wa heni, vilongozi wa hemwe wanguwajiliza hemwe,

wanguwadita hemwe mwajilile.

13 Mkulu Nguluwi nakewika goya kwamula,

kangwima kuwatagusa wanhu.

14 Mkulu Nguluwi kanguwalonjeleza,

wasekulu na vilongozi wa wanhu wa heye,

"Hemwe namuwifya mgunda wa heni wa mizabibu,

lufufu lowasukulwe wazunwa, lwa mng'handa mwa hemwe.

15 Mwangulajila choni kuwabunza wanhu wa heni,

na kuwaditila vibi wazunwa?

Heni Mkulu Nguluwi Mbele na Mong'ho, ndanguuza."

16 Mkulu Nguluwi kangulonga,

"Wadala wa muji wa Yelusalemu ndo wajuvi,

wangujenda kuno nawenula singo za hewo,

na meho gawele na maya,

wangujenda kwa kidaya,

wawele na nhogo kuli magulu ga hewo.

17 Ahyo, heni Mkulu Nguluwi ndogala mipu kuli vitwi vya wadala wa Siyoni,

na kuwavula nguwo leka wawe mwanzi."

18 Kuli zuwa alyo Mkulu kowasukula wadala wa Yelusalemu vinhu vya hewo vyeng'ha vyowalingidayila, viwele ndo nhogo na ugasi na vinoligo viwele na ulajilo wa nyelezi ndodo 19 na heleni na banjili za kuli magulu na shela 20 na vipembelo na ugasi wa vifundo vya kuli magulu na isali na mibuli ja unhunyhililo na mihilizi 21 na pete ziwele na muhuli na pete za kuli mhenyelo 22 na mikanzu jinojile na mivalo jinji na vihako vya kuwichila sendi 23 na vilolelo na mivalo ja kitani na nguwo zinojile za kuvala kuli vitwi na nguwo zinojile za kuvala kumeho.

24 Honhu ha kunhunyhilila kunojile, kowa kunhung'ha,

honhu ha isali, kowa ng'weso,

honhu ha mnvili zinojile, kowa chibuje,

honhu ha mivalo jinojile, kowa migunila,

honhu ha koneka kunojile, ndo ulajilo wa upogozi kwa mhuli wa chuma cha chiluli.

25 Walume wa hewo wokopoligwa kwa ipanga,

wazidahe wa hewo wokopoligwa kuli ngondo.

26 Lwizi ja muji wa Yelusalemu jolombocheza na kulila,

muji wowa kota mdala yasukuligwe chila chinhu,

yekalise kuli nhimbwisi yawele yalihela chinhu.