1 Mkulu Nguluwi kangulonga hino,

"Mibatilile hachi na kudita ganojile,

kwa vila ulohozi wa heni wa habehi,

mong'ho wa heni wa ulohozi wokoneka chila honhu muisi.

2 Nakatambichizwa munhu yalingudita mbuli kwa hachi,

yalingibatilila malajizo ga zuwa lya Kwesela

na kuleka kudita wihe woneche.

3 "Mjenzi yalingilumba na heni, Mkulu Nguluwi yaleche kijesa,

‘Ndikomya, Mkulu Nguluwi kombagula heni na wanhu wa heye.’

Naye mlume yohambe yaweze kuwa mhaza yaleche kulonga,

‘Heni ndo igodi likalile hela ahyo Nguluwi kondema!’

4 Kwa vila heni Mkulu Nguluwi ndangulonga,

‘Towashi yalingubatilila malajizo ga heni ga zuwa lya Kwesela,

yalingudita mbuli zilingunojeza heni,

na kibatilila ilagano lya heni,

5 kuli ng'handa ya heni na ng'hanzi zake,

kokumbuchilwa kwa itagwa linojile,

kusinda kuwa na wasongolo na wahinza.

Ndomha itagwa lya kukumbuchilwa mazuwa gose,

liwele halyusigwa.’

6 "Wajenzi wawele wong'hunda heni Mkulu Nguluwi,

wawele wonhogola na kuligana itagwa lya heni,

na wawele wowa vitumagwa wa heni,

weng'ha wawele wolibatilila zuwa lya Kwesela ne kulidita liwe likokomoche,

wawele wolibatilila ilagano lya heni,

7 ndowegala kuli chidunda cha heni chelile,

na kuwadita wasangalale kuli ng'handa ya heni ya kulandila,

nhambiko za hewo za kulakazwa na ndolendole za hewo zokundigwa kuli honhu ha kulavila nhambiko ha heni,

kwa vila ng'handa ya heni yochemigwa,

‘Ng'handa ya kulanda kwa chiwalo cha wanhu wa isi zeng'ha.’

8 "Awu ndo ulonzi wa heni Mkulu Nguluwi

ndilinguwakungajiza Waisilaeli wasambaluche,

‘Nandiwakungajiza wanhu wamwenga,

ila ndowakungajiza wanji leka welumbe hamwe na hewo.’ "

9 Mkulu Nguluwi kanguwalonjela wanhu wa isi za chijenzi woye kota migongolo ja kisolo na kuwalya wanhu wa heye. 10 Kangulonga, "Vilongozi weng'ha wawele nandijesa kota wowakanya wanhu wa heni, ila ndo wohambe walole! Hawalinguvizela chinhu, wa kota mibwa jiwele hajilingubwaka, jiwele janguwasaga hela na kulota. Wangugana ng'hatu kuwasa. 11 Vilongozi awo ndo kota mibwa jiwele na maya ng'hatu, hajilingiguta. Vilongozi awa wahela kuvizela, chila yumwe nakagalamchila kuli nzila ya heye yuye kwa chiwalo cha kupata mzidi wa heye. 12 Wangilonjelaga, ‘Muye, tulute kupala divai na kunwa ng'hatu! Mitondo yowa inojile ng'hatu kusinda lehano.’ "