1 Awu ndo usenga kulawa kwa Mkulu Nguluwi kuwala Damasiko.

"Damasiko hailutilila kuwa muji kahi,

yowa chilundo cha mahame.

2 Miji ja Aloeli jolechigwa mahame mazuwa gose,

jowa ndo honhu ha kulya na kuwasa migongolo ja kufujigwa,

haduhu chinhu chiwele chojidita jiwe na lunhwinhwi.

3 Ngome za kiyamila za Efulaimu, zokwajilila,

undewa wa Damasiko womala,

Waalamu wawele wosigala wodeuzwa,

kota vyowaditilwe walelwa wa Isilaeli.

Heni Mkulu Nguluwi Mbele na Mong'ho, nandonga.

4 Zuwa alyo, ukulu wa Isilaeli woduliswa,

na lufufu lwake lopungula.

5 Isi yeng'ha ya Isilaeli yowa kota mgunda uwele walingubeta wangubetaga nyhule zeng'ha,

haduhu chiwele nachali chilechigwa,

kowa kota vyojilinguwaga migunda ja kuli ibindi lya Lefaimu,

nyhule zeng'ha hozibetigwa.

6 Waisilaeli wachefu wosigala,

kota zeituni zimwenga ziwele nazisigala kuli chinhembenhembe cha igodi,

mhela wakola mijito lowazilagaze zeituni ziyage.

Kuli nhagala za kuchanya ng'hatu zosigala zeituni mbili ama zidatu hela.

Heni Mkulu Nguluwi, Nguluwi wa Isilaeli, nandonga."

7 Kuli zuwa alyo, Waisilaeli wochitumbila kwa yawalumbile na meho ga hewo gomlola Yelile wa Isilaeli. 8 Hanga nawazenga honhu ha hewo ha kulavila nhambiko na honhu ha kufunyizila ubani kwa mlungu Ashela na kuzenga mizengo ja kumfugamila, ila sambi hawochitumbila kuli honhu aho. 9 Zuwa alyo miji jeng'ha jiwele ngome jolechigwa mahame. Jowa kota miji jiwele Waamoli na Wahiti nawajileka mhela Waisilaeli lowafichile kuli isi. Isi yeng'ha yowa mahame kahi.

10 Kwa vila hemwe wanhu wa Isilaeli namumsemwa Nguluwi yawalohole,

hamlikumbuchile italawe lya kiyamila kwa hemwe.

Namnyala mizabibu jinojile ng'hatu kwa chiwalo cha kumfugamila mlungu wa chijenzi,

11 hanga mojidita jikule kuli zuwa lilyo lyomnyalile,

na kujidita jibahule mitondo yiyo,

mbeta za hemwe zokwaga,

kuli zuwa lilyo lya magazo na usungu uwele hausindamala.

12 Mhulichize! Wamizi wa isi nyinji wobuma kota bahali.

Wangubogoma kota lizi lya nhigu ng'hulu.

13 Hanga wanhu wa isi wangubuma kota kubogoma kwa mazi menji,

ila Mkulu Nguluwi kogang'hanhuchila, nago gobilimila kutali.

Gowinjigwa na mbeho kota mahamba gakalile kuli chidunda,

kota nhimbwisi vyoilinguwembeluswa na chivuluvumbi.

14 Hanga hemwe wanhu wa Isilaeli modumbizwa,

mitondo, wang'honyo wa hemwe wobagama.

Mbuli ayo ndo yowafika weng'ha walinguihola isi ya hetwe,

na kuhiza lufufu lwa hetwe.