1 Kokuya mndewa yawele kolongoza kwa kutanganika,

nawo vilongozi wa heye womtanza kwa kudita hachi.

2 Chila chilongozi kowa kota honhu ha kiyamila na mbeho,

kota honhu ha kivisa mhela wa chivuluvumbi.

Wowa kota nzanda za mazi kuli isi iwele kugunuche,

kota isisila lya italawe likulu kuli ivuche lya isanya.

3 Hamba, wala wawele na meho wogubula meho leka kona,

na wala wawele na makutu wogawika goya makutu ga hewo kuhulika.

4 Walinguditaga mbuli ne kijesa wokwamula kwa luhala,

wawele na chisembe wolonga goya.

5 Wapoka hawochemigwa wanojile,

ne wehile kutogoligwa.

6 Wapoka wangulongaga upoka,

na majesa ga hewo ndo kiwika goya kudita mbuli zihile,

kulonga mbuli za kumliga Mkulu Nguluwi.

Wanguwalekaga wawele na nzala ne chilyo,

na wawele na ng'halu ne mazi.

7 Wajuvi ndo wanhu wehile,

wangijesaga mbuli zihile,

leka kuwadumya wazunwa kwa udesi,

hanga ulonzi wa wazunwa ndo wa kukomya.

8 Ila vilongozi awo wangijesaga mbuli zinojile,

kwa madito ga hewo ganojile, mbuli za hewo zangulutililaga goya.

9 Mhulichize hemwe wadala,

muwele kuli usangalalo,

hemwe mlingiwona kota mwa hali kikala goya,

mhulichize chondilingugana kuwalonjela hemwe.

10 Kuli mwaka umwe ulinguya mokakama hemwe muwele namiguta,

kwa vila hampata mbena za zabibu,

ne mbena za mafuza ganji.

11 Mkakame hemwe wadala mlingusangalala,

mkakame kwa lunhwinhwi hemwe wahinza mlingiwona kota mwa kuli kikala goya!

Mvule mivalo ja hemwe,

mvale mivalo ja migunila kuli vyuno vya hemwe, kwa chiwalo cha masinzo.

12 Mtowe mhambaga za hemwe kwa masinzo kwa chiwalo cha mbuli ziwele zolawila kuli migunda jinojile,

kwa chiwalo cha mizabibu jilelile goya,

13 kwa vila miwa na mikwangwasale hela ndo jozuka,

ena, mlombocheze kwa chiwalo cha ng'handa zeng'ha ziwele na usangalalo,

na kwa chiwalo cha muji awu ulingudita mnvina.

14 Ng'handa za mndewa zolechigwa mahame,

muji awo uwele na wanhu wenji wolechigwa uliyeka.

Chidunda na ilingo lya kwamila vyowa hela wanhu mazuwa gose,

midogowi ja kisolo jokolakola amo kwa usangalalo,

ming'holo jopata honhu ha kudila amo.

15 Kolutilila kuwa ahyo,

mbaka tupegwe muhe wa Nguluwi kulawa kilanga.

Aho kugunuche kowa mgunda uwele na mboto kahi,

na mgunda uwele na mboto wowa kota chihulo.

16 Hachi yochikala kuli chiwala,

kutanganika kosigala kuli migunda jiwele na mboto.

17 Mafuza ga kutanganika ako ndo wanhu kuwa na kikala goya,

na kusindamala na kikala goya vyochikala mazuwa gose.

18 Wanhu wa heni wochikala haluga hawele na kikala goya,

honhu halingwamilwa goya,

kuli ng'handa ziwele kuli honhu hasindamale.

19 Hanga nhonya ya maganga yochidumya chihulo,

na muji weng'ha kugwa,

20 ila hemwe motambichizwa.

Monyala nyhule honeche hali mazi,

misenga na midogowi ja hemwe jojendajenda vyojilingugana.