1 Saligoni, mndewa wa Ashulu, nakamlajiza chilongozi wa wamizi wa heye kuuvaba muji wa Ashidodi. 2 Mhela wula Mkulu Nguluwi nakalonga kwa kukolela Isaya, mwana wa Amosi, nakamlonjela, "Uvule nguwo ya igunila na makwamba ga hegwe." Naye nakadita hihyo, nakajenda kuno na kula mwanzi ne nguwo ne makwamba. 3 Hamba Mkulu Nguluwi nakalonga, "Kota vila chitumagwa wa heni Isaya vyoyajendile mwanzi ne nguwo ne makwamba kwa miyaka jidatu, kota ndo ulajilo wihile kwa isi za Misili na Kushi, 4 hihyo du, mndewa wa Ashulu kowalongoza wapogozi wa ngondo wa Wamisili na Wakushi, wawele mwanzi ne makwamba, wasongolo na wasekulu, wawele mabadi mwanzi kwa soni ya Wamisili. 5 Hamba, wala wawele nawali wochitumbila kuli isi ya Kushi na kidayila isi ya Misili, wodumba na kudeula. 6 Kuli zuwa alyo wanhu walingikala kuli mwhani yino wolonga, ‘Ulole mbuli iwafichile wala wawele natwali tuchitumbila kwa hewo, wala wawele natwali tuwabilimila kwa kuwalanda utanzi leka watulohole kulawa mmoko mwa mndewa wa Ashulu! Lelo toweza ndaze kusulupuka?’ "