1 Gwa Mkulu Nguluwi, hegwe ndo Nguluwi wa heni,

ndokutogola hegwe,

kwa vila nakudita mbuli za kububuwaza,

kwangulutilila kuzidita kwa kukomya

mbuli zouziwichile goya kulawa aho katali.

2 Nakuudita muji kuwa chilundo cha maganga,

na kuzidumya ngome zake.

Ngome ya wajenzi iwele nzinzili haiwa muji kahi,

na muji awo hauzenjigwa kahi.

3 Ahyo wanhu wa isi wawele na mong'ho, wokutogola,

miji ja wanhu wa isi wawele na nhumbula zihile, wokudumba.

4 Nakuwa ngome ya wazunwa,

honhu ha kubilimila, kwa walihela chinhu.

Hegwe ndo honhu ha kubilimila mhela wa chivuluvumbi,

lubehelo mhela wa ivuche.

Wawele na nhumbula zihile wangututowa kota chivuluvumbi chilingutowa lukanzi,

5 ndo kota ivuche kugunuche.

Kwangulidita iyowe lya wang'honyo lidume,

kota ng'hungugu vyoilingulidita ivuche lya isanya lisindamale,

ndo hihyo du lwimbo lwa wawele na nhumbula zihile lwoditigwa lusindamale.

6 Mchanya mwa chidunda cha Siyoni ako Yelusalemu, Mkulu Nguluwi Yawele na Mong'ho kowaditila mnvina ya vinhu vinojile wanhu wa isi zeng'ha. Kowa na miwunde jinonile na mafuta hamwe na divai inojile. 7 Kuli chidunda acho, Mkulu Nguluwi koyusa ng'hungugu ya masinzo iwele naiwagubika wanhu wa isi zeng'ha, chigubiko cha usungu mchanya mwa wanhu wa isi zeng'ha. 8 Mazuwa gose Mkulu Nguluwi kokudumya kubagama! Kobagusa mahozi kumeho kwa wanhu weng'ha na kokusa soni kwa wanhu wa heye kuli isi yeng'ha. Mkulu Nguluwi yuye nakalonga ahyo. 9 Zuwa alyo wanhu weng'ha wolonga, "Ayu ndo Nguluwi wa hetwe! Natuwika kitumbila kwa hetwe kwa heye. Ayu ndo Mkulu Nguluwi yawele natwali tumbeteza. Muye tusangalale na kutowa luchenze kwa vila nakatulohola."

10 Mkulu Nguluwi kochamila chidunda cha Siyoni, ila wanhu wa Moabu wobigangwa kota misolo kuli honhu ha kuwichila mboto. 11 Wogolola moko ga hewo kota munhu yalingujeza kojelela, ila Mkulu Nguluwi kokudulisa kidaya kwa hewo. 12 Kobomola ngome za muji wa Moabu ziwele ng'wemang'wema na kuzidita zigwe hasi kuli nhimbwisi.