1 Kuli mwaka wa kumi na zine wa ulongozi wa mndewa Hesekiya, Senakelibu, mndewa wa Ashulu, nakajitowa miji jeng'ha ja Yuda jiwele na ngome na kujihola. 2 Hamba mndewa wa Ashulu nakamlajiza chilongozi wa wamizi kulawa Lakishi kuluta kwa mndewa Hesekiya ako Yelusalemu hamwe na wamizi wenji. Chilongozi wa wamizi nakema habehi na chikolola cha ilamba lya kuchanya, lizenjigwe kuli nzila ng'hulu ilinguluta kuli Chalanza cha Dobi. 3 Vilongozi wadatu hali ulongozi wa Hesekiya nawaluta kumhulichiza chilongozi mkulu wa wamizi wa Ashulu, vilongozi awo ndo Eliyakimu, mwana wa Hilikiya, yawele nayali yoilolela ng'handa ya mndewa na Shebuna, yawele nayali yalingwandika, hamwe na Yowa, mwana wa Asafu, yalingwandika kukumbuchila. 4 Chilongozi mkulu wa wamizi nakawalonjela, "Mumlonjele Hesekiya, ahi ndo vyoyalingulonga mndewa mkulu, mndewa wa Ashulu, ‘Kwangitumbila choni? 5 Kwangulonga kuna majesa ganojile na mong'ho wa wamizi, ila kwangulonga hela. Kwangitumbila kwa whaani mbaka nakumbelenhuka heni? 6 Ulole! Kwangitumbila ako Misili, ng'hweku yila ya idenje ituliche iwele yanguuhomaga na kuulumiza moko wa munhu yalinguyegamila. Ahyo ndo vyoyawele Falao, mndewa wa Misili, kwa weng'ha walingitumbila kwa heye.’ "

7 Chilongozi wa wamizi wa Ashulu nakalutilila kulonga, "Wone mondonjela kota mwangitumbila kwa Mkulu Nguluwi, Nguluwi wa hemwe, ndaze, hawele yuyo Nguluwi yawele Hesekiya nakahawifya honhu hake ha kufugamila na honhu hake ha kufunyizila ubani na kuwalonjela wanhu wa Yuda na wanhu wa Yelusalemu wafugame hali honhu hamwe hela ha kulavila nhambiko hawele ndo Yelusalemu? 8 Lelo, muye kudita ilagano na mkulu wa heni, mndewa wa Ashulu, nani ndowapa hemwe falasi elufu mbili (2,000), wone moweza kuwa na wakwina falasi wa kuhega. 9 Moweza ndaze kumsumya chilongozi ne yumwe yawele mdodo hali vilongozi wa mkulu wa heni, kuno mwangitumbila kuli isi ya Misili kwa mituka ja ngondo na wakwina falasi? 10 Mzidi wa ago, ndaze, mwangijesa kota nambuya kuitowa isi ayi ne kulajizwa na Mkulu Nguluwi? Mkulu Nguluwi yuye ndo yandajize kuitowa na kuidumya isi ayi."

11 Hamba Eliyakimu na Shebuna na Yowa nawamlonjela ayo chilongozi wa wamizi, "Dedede, ulongase na hetwe vitumagwa wa hegwe kwa ndonga ya Chialamu, kwa vila twanguizela. Uleche kulongasa na hetwe kwa Chiebulaniya, kwa vila wanhu wawele kuli lukanzi wanguhulichiza." 12 Ila yula chilongozi wa wamizi nakalonga, "Ndaze, mkulu wa heni nakandajiza kulavya usenga awu kwa mkulu wa hemwe na kwa hemwe hela? Nakandajiza kahi kwa wanhu walingikalisa kuli lukanzi, wawele woganigwa kulya midohe ja hewo wawo na kunwa mitunzi ja hewo wawo, kwa vila kowa haduhu chinhu choneche cha kulya na kunwa."

13 Hamba ayo chilongozi wa wamizi nakema na kulonga kwa Chiebulaniya kwa lizi likulu, "Mhulichize ulonzi wa mndewa mkulu, mndewa wa Ashulu! 14 Kangulonga kota mleche kukunda Hesekiya yawahade hemwe, kwa vila howeza kuwalohola. 15 Mleche kukunda Hesekiya yawahade hemwe leka mitumbile kwa Mkulu Nguluwi kwa kuwalonjela, ‘Mkulu Nguluwi kotulohola. Muji awu hauwichigwa mmoko mwa mndewa wa Ashulu.’ 16 Mleche kumhulichiza Hesekiya, kwa vila mndewa wa Ashulu kangulonga kota mihanyise na heye na mlawe kuli muji wa hemwe. Hamba chila yumwe wa hemwe kolya kulawa kuli mzabibu wa heye yuye na mtini wa heye yuye na kunwa mazi kulawa kuli ideho lya heye yuye, 17 mbaka aho hamba hoyowahilika kutali kuli isi kota ayi ya hemwe, isi iwele na mizabibu na divai na nyhule na mibumunda. 18 Lelo mlolele leka Hesekiya yaleche kuwahada hoyolonga kota Mkulu Nguluwi kowalohola hemwe. Ndaze, kabaho mlungu wa wanhu wa isi yoneche yawele nakawalohola kulawa mmoko mwa mndewa wa Ashulu? 19 Jakohi milungu ja Hamati na Alipadi? Jakohi milungu ja Sefalivaimu? Ndaze, milungu joneche najiulohola muji wa Samaliya kulawa mmoko mwa heye? 20 Mlungu wachi hali milungu ja isi azi yawele nakailohola isi ya heye mmoko mwa mndewa wa Ashulu? Ahyo Mkulu Nguluwi howeza kuulohola muji wa Yelusalemu kulawa mmoko mwa mndewa wa Ashulu."

21 Ila wanhu nawenyamalila, hawedichile chinhu choneche, kwa vila mndewa Hesekiya nayali yawalonjele, "Mleche kumwidichila." 22 Hamba Eliyakimu na Shebuna na Yowa nawaluta kwa Hesekiya kuno mivalo ja hewo jidaduligwe kwa kulajila masinzo na kumlonjela ulonzi uwele chilongozi mkulu wa wamizi woyaulonjile.