1 Mkulu Nguluwi kangulonga,

"Mumlole chitumagwa wa heni yondilingumuwika nzinzili, yondimhagule,

yawele nanojezwa na heye.

Nandiuwika muhe wa heni mchanya mwake,

naye kowegalila hachi wanhu wa isi.

2 Hochemeleza ne kutowa iyowe,

ama kulandula lizi mbalabala.

3 Idenje likubuche holibena,

na utambi ulingufung'ha iyosi houzimya,

koigala hachi kwa kukundigwa.

4 Heye hokwisilwa mong'ho ne kutweguka nhumbula,

mbaka hoyoidita hachi iwe nzinzili muisi.

Wanhu wa mhwani wangubeteza malanguso ga heye."

5 Nguluwi, Mkulu Nguluwi,

yawele nakaulumba ulanga na kuutandazula.

Heye nakailumba isi na vyeng'ha viwele amo.

Nakawapa lweselo wanhu weng'ha wawele amo na kuwadita wekale.

Ndo heye yumwe yawele kangulonga na chitumagwa wa heye,

6 "Heni Mkulu Nguluwi, nandikuchema leka udite hachi,

nandikubata moko na kukwamila.

Kwa kukolela hegwe ndodita ilagano na wanhu,

na kigala lumuli kwa wanhu wa isi.

7 Hegwe kogagubula meho ga walingulemwela kona,

kowalavya wanweng'hwa mchinweng'ho,

na kuwadita welejehe wawele kuli jiza lya mchinweng'ho.

8 Itagwa lya heni ndo Mkulu Nguluwi.

Simha yunji ukulu wa heni,

ne lutogo lwa heni kwa jimalukolo ja milungu.

9 Ulole, mbuli zondonjile hamwande nazilawila,

lelo ndanguwikula mbuli zinyale,

ndangukulonjela aga kung'hali haganalawila."

10 Mumwimbile Mkulu Nguluwi lwimbo lunyale!

Isi yeng'ha yimbe lutogo lwa heye.

Wanhu weng'ha walingukola mijito kuli bahali,

na vilumbigwe vyeng'ha viwele kuli bahali,

hemwe mhwani na wenyeng'haye wake, mwimbe!

11 Kuchiwala na miji jake jeng'ha jikwinize lizi,

wanhu wa Kedali watowe luchenze.

Wanhu wa Sela wembe kwa kusangalala,

na walandule lizi kulawa mchanya mwa vidunda.

12 Weng'ha walingikala mhwani,

wamtogole na kumha ukulu Mkulu Nguluwi.

13 Mkulu Nguluwi koluta kuli ngondo kota yazidahe,

kota mwamizi yawele na maya ga kitowa.

Kangutowa iyowe lya ngondo,

kangilajila kota kana mong'ho hali wang'honyo wa heye.

14 Mkulu Nguluwi kangulonga hino,

"Kwa mhela winji nanyamalila,

nasindamala na kilemeza.

Ila lelo ndolila kota mamo yalinguponda.

15 Ndoviwifya vidunda na vigongo,

misolo jeng'ha ndojidita jikale.

Nzanda ndozigalula kuwa isi ng'havu,

na milamba ndojikaza.

16 Ndowalongoza wohambe walole kuli nzila yohawaizelele,

kuli nzila ziwele hawanawahika kukola.

Ndoligalula jiza liwe lumuli hali hewo,

honhu hehile kuwa hanojile.

Azi ndo mbuli ziwele ndozidita, siwaleka.

17 Weng'ha walingitumbila kuli jimalukolo ja milungu,

na kujilonjela, ‘Hemwe ndo milungu ja hetwe,’

wokona soni na kudeula."

18 "Muhulichize hemwe mohambe mhuliche!

Mlole, hemwe mohambe mlole, leka mone!

19 Whaani yawele yohambe yalole kota chitumagwa wa heni,

na yohambe yahuliche kota msenga yondilingumlajiza?

Whaani yawele yohambe yalole kota ayu yondimuwichile chiuyeng'ha,

ama yohambe yalole kota chitumagwa wa Mkulu Nguluwi?

20 Hemwe namona mbuli nyinji, ila hamlinguvizela choneche,

makutu ga hemwe ga mwanzi, ila hamlinguhulika chinhu!"

21 Naimnojeza Mkulu Nguluwi, kwa chiwalo cha hachi ya heye,

kugadita malajizo ga heye gahulichizwe kwa ukulu.

22 Ila wano ndo wanhu wahizilwe lufufu kwa kubokwa,

weng'ha nawagwilizwa kuli mikulubila,

na kuvisigwa mchinweng'ho.

Nawawa kota upelembi ne munhu wa kuwalohola,

nawawa wanhu waholigwe kuli ngondo,

haduhu yalingulonga, "Waloholigwe!"

23 Whaani hali hemwe yawele kolihulichiza ali?

Whaani yawele goya na kuhulichiza kulawila sambi?

24 Whaani yawawichile Waisilaeli kuli moko ga wang'honyo awo?

Whaani yawele nakalechela wasukuligwe lufufu lwa hewo?

Ndo Mkulu Nguluwi yawele natumditila gehile!

Wasekulu wa hetwe nawalema kuwinza nzila za heye,

ne kubatilila malajizo ga heye.

25 Ahyo nakawaboholela ng'halazi ya heye ing'hang'hale,

nakawaleka wating'hane na ngondo ng'hulu.

Ng'halazi ya heye naiwafika chila ubanzi kota chiluli,

ila hawavizelele choneche,

milapi ja chiluli najiwalakaza, ila hawagawichile mnhumbula.