1 Mkulu Nguluwi nakamemeza heni muhe wa heye,

kwa vila Mkulu Nguluwi nakambakaliza heni mafuta kunyhagula,

nakandajiza ndiwegalile wazunwa mbuli inojile,

ndiwakangaze watweguche nhumbula,

ndiwawikulile kilejeha kwa wapogozi wa ngondo,

kudoholigwa kwa wanweng'hwa.

2 Nakandajiza ndiuwikule mwaka wa isungu lya heye, Mkulu Nguluwi

zuwa lya heye lya kuhilula chibida,

na kuwahembuliza weng'ha walingulombocheza,

3 ndiwape wala wawele na masinzo ako Yelusalemu,

itaji lya uluwa honhu ha mivu,

mafuta ga kusangalala honhu ha kulombocheza,

ivalo lya lutogo honhu ha kutweguka nhumbula.

Nawo wochemigwa mialoni ja hachi,

joyanyalile Mkulu Nguluwi,

kulajila ukulu wa heye.

4 Wogazenga kahi mahame ga katali,

wogongomanya miji jibomoligwe aho mwaluko,

wojizenga kahi miji jiwifigwe,

jiwele najilechigwa uchiwa kuli lulelo lukolile.

5 Wajenzi wowa aho kujidima migongolo ja hemwe,

wolima na kulolela mizabibu ja hemwe.

6 Hemwe mochemigwa, "Watambika wa Mkulu Nguluwi,"

mochemigwa kahi, "Vitumagwa wa Nguluwi wa hetwe."

Molya kuli lufufu lwa wanhu wa isi zinji,

mopata ukulu kulawa kuli lufufu lwa hewo.

7 Honhu ha soni mopata mzidi,

honhu ha kudeula mopata uhalizi,

ahyo mohalila honhu hakulu kuli isi,

mosangalala mazuwa gose.

8 Mkulu Nguluwi kangulonga, "Ndangugana hachi,

ndanguzudila kuboka na wihe.

Kwa kugoloka, ndowapa wanhu wa heni chonolo,

ndodita ilagano lya mazuwa gose na hewo.

9 Walelwa wa hewo wozeleka hali wanhu wa isi,

na ivyazi lya hewo lozeleka lukami kuli nhanzi za wanhu wanji.

Chila hoyowona hewo kokunda,

kota hewo ndo wanhu wawele nawatambichizwa na Mkulu Nguluwi."

10 Ndosangalala lukami kwa chiwalo cha Mkulu Nguluwi,

nhumbula ya heni yosangalala kwa chiwalo cha Nguluwi wa heni.

Kwa vila nakavaliza heni mivalo ja ulohozi,

na kunoliga heni kwa ikanzu lya kutanganika,

kota vila mkasano vyoyalinginoliga kwa itaji lya uluwa,

kota yalinguhesigwa vyoyalinginoliga na vinhu vya sendi nyinji.

11 Kota vila misanga vyojilingudita mizuchila jizuche,

na mgunda vyoulingudita nyhule zinyaligwe amo zizuche,

ndo Mkulu Nguluwi vyoyovidita kutanganika na lutogo,

vilawile hali wanhu wa isi zeng'ha.