1 Mkulu Nguluwi kangulonga,

"Mhulichize hemwe walelwa wa Yakobo,

hemwe mlinguchemigwa kwa itagwa lya Isilaeli,

mlingulawa kuli nhanzi ya Yuda,

mlingilaha kwa itagwa lya Mkulu Nguluwi,

mlingumlanda Nguluwi wa Isilaeli,

ila haiwele kwa kukomya ne hachi.

2 Hemwe mwangichema wanhu wa muji welile,

na kitumbila kwa Nguluwi wa Isilaeli,

Mkulu Nguluwi Yawele na Mong'ho ndo itagwa lya heye.

3 Kulawa katali nandavya uloli kuwala mbuli za mwaluko,

mlomo wa heni nauwikula na kugadita gazeleche,

baho du nanyaluka kugadita na nagalawila.

4 Ila nandiwazela vyomuwele mgagadale,

vitwi vya hemwe navigagadala kota chuma,

vihanga vya hemwe navyali kota iganga.

5 Ahyo, nandiwalonjela mbuli azi kulawila katali,

zing'hali kulawila nandiziwikula kwa hemwe,

leka mleche kulonga, ‘Jimalukolo ja hetwe najidita ago,

jimalukolo ja hetwe ja kuhongola na ja chuma najidita.’

6 "Hemwe namzihulika na sambi mwanguzona zeng'ha.

Lekachoni hamlinguzikunda?

Kulawa sambi na kulutilila, ndowazelesa mbuli zinyale,

mbuli zivisigwe ziwele hamzizelele.

7 Kuli mhela awu hela ndo ndanguzidita mbuli azo zilawile,

hamnawahika kuzihulika kung'hali zuwa lya lehano,

ahyo hamuweza kulonga, ‘Ena, natugazela ago.’

8 Hamnawahika kuzihulika ne kuzizela,

kulawa katali makutu ga hemwe hagazihuliche.

Nandivizela kota hemwe mwa wahadi,

kota mwa mlingubelenhuka kulawila lompondigwe.

9 Kwa chiwalo cha itagwa lya heni,

ndanguidita ng'halazi ya heni isindamale,

kwa chiwalo cha lutogo lwa heni, nandiilemeza leka ileche kuwafika,

leka ndeche kuwadumya.

10 Ulole, nandiweliza hanga haiwele kota sendi,

nandiwajeza kuli itanulu lya magazo.

11 Ndangudita ahyo kwa chiwalo cha nene baha,

lekachoni itagwa lya heni libezigwe?

Ukulu wa heni siweza kumha yunji."

12 Mkulu Nguluwi kangulonga,

"Mnyhulichize hemwe Waisilaeli,

wanhu muwele nandiwachema!

Heni ndo Nguluwi,

ndo wa mwaluko na wa kuduma,

heni ndo Nguluwi ndiliyeka!

13 Kwa moko ga heni nandijiwika misisi ja isi,

na kuhanzanza ulanga.

Hondivichema ulanga na isi,

vyangwima himahima hali heni.

14 "Mikungajize hemwe mweng'ha leka mhulichize.

Whaani hali limalukolo lya hemwe liwele nalilavya uloli kuwala vinhu avi?

Heni Mkulu Nguluwi ndangumgana Koleshi,

heye kokweneza kunuwila kwa heni kuwala Babuloni,

ena kowatowa Wababuloni.

15 Heni, ena, heni nandonga na kumchema,

nandimigala naye kolyeneza lila lyondimlajize.

16 "Muye habehi na heni mhulichize mbuli ayi,

‘Kulawa mwaluko silonjile kwa uviso,

kulawila mbuli azo vyozaluche kukoleka nandali aho.’ "

Lelo Mkulu Nguluwi nakandajiza,

kwa muhe wa heye.

17 Mkulu Nguluwi, Yelile wa Isilaeli,

Mgombozi wa hemwe, kangulonga hino,

"Heni ndo Mkulu Nguluwi, Nguluwi wa hemwe,

ndilinguwalangusa kwa chiwalo cha mzidi wa hemwe,

ndilinguwalongoza kuli nzila yomlinguganigwa kukola.

18 Wone mwahawinzile goya mizilo ja heni,

kutambichizwa kwa hemwe kulutilile kota lwanda luli kuchililika,

hachi ya hemwe kota nhigu za bahali zilingulawila chila mhela.

19 Walelwa wa hemwe wahawele wenji kota sangalaza,

wana wa hemwe kota vihande vya sangalaza vyohambe viwaziche,

itagwa lya hemwe lyahasigale hali heni mazuwa gose."

20 Lelo muche Babuloni,

mbilime kulawa kwa Wababuloni!

Muiwikule mbuli ayi kwa lizi lya kusangalala,

mweneze mbuli za heye kuli chila honhu muisi,

Mlonje, "Mkulu Nguluwi nakawagombola wanhu wa heye,

walelwa wa Yakobo."

21 Loyawalongoze kugunuche hawawele na ng'halu,

nakalavya mazi kulawa kuli italawe kwa chiwalo cha hewo,

nakalitula italawe mazi nagalawa.

22 Ila Mkulu Nguluwi kangulonga hino,

"Wanhu wehile siwapa kikala goya."