1 Usenga kulawa kwa Mkulu Nguluwi kuwala Moabu,

Muji wa Ali uwele kuli isi ya Moabu naudumigwa,

nauwifigwa kuli nechilo imwe!

Muji wa Kili uwele ako Moabu naudumigwa,

nauwifigwa kuli nechilo imwe!

2 Wanhu wa muji wa Diboni wanguluta kuli ng'handa ya mlungu,

mbaka kuli honhu ha kufugamila leka walombocheze,

Wamoabu wangulila kwa chiwalo cha miji ja Nebo na Medeba jiwele kusini.

Wangulila na kubeya mnvili za hewo na

walume wangubeya lulevu lwa hewo kulajila masinzo.

3 Wangukola mnzila kuno wavalile mivalo ja migunila,

wa mchanya mwa vinduwiko na kuli vyalanza vya nhing'hano vya muji,

weng'ha wangulombocheza,

wanguwasa chifunama kuno wangulila.

4 Wanhu wa miji ja Heshiboni na Eleale wangulila kwa lizi likulu,

lizi lya hewo lyanguhulikwa mbaka kuli muji wa Yahasi.

Wamizi wa Moabu wangukakama,

kwa vila kitumbila kwa hewo kwangusigwa.

5 Nhumbula ya heni yanguwalilila wanhu wa Moabu,

wanhu wake wangubilimila kuli muji wa Soali,

mbaka kuli muji wa Egilati-shelishiya.

Wangukola kuli nzila ilinguluta kuli muji wa Luhiti,

wanguluta kuno wangulila,

kuli nzila ilinguluta Holonaimu,

wangulombocheza kudumigwa kwa hewo.

6 Mazi ga Nimulimu nagakala,

na misolo najiswinha,

mizuchila najikala, haduhu chinhu choneche chidodi chiwele nachisigala.

7 Wanhu wa Moabu wokuka,

woloka kuli ibindi lya Mielebi,

kuno waholile lufufu lwa hewo luwele nawewichila ng'hano.

8 Chila honhu ha mbaka ja isi ya Moabu chililo cha hewo chohulikwa,

kulombocheza kwa hewo kofika mbaka kuli muji wa Egilaimu,

ena, mbaka kuli muji wa Beeli-elimu.

9 Mazi ga muji wa Dimoni gomema danda,

kahi Nguluwi kokwambuza magazo ganji ako kuli muji wa Dimoni,

isimba lyowabata wanhu weng'ha wawele wojeza kuibilima isi ya Moabu,

na kuwebata wanhu wawele wosigala kuli isi.