1 Mkulu Nguluwi kangulonga hino,

"Mnyhulichize hemwe mlingupala kutanganika, hemwe mlinguya kwa heni.

Mlijese italawe liwele namlavigwa amo kwa kuhongolwa,

honhu ha kutula maganga kuwele namlavigwa kwa kubawigwa.

2 Mlikumbuchile italawe liwele ndo wasekulu wa hemwe wawele ndo Abulahamu na Sala,

wawele hemwe mweng'ha ndo walelwa wa hewo.

Mhela londimchemile Abulahamu nayali yalihela mwana,

ila nandimtambichiza na kumdita yawe na walelwa wenji lukami.

3 Heni Mkulu Nguluwi ndowahembuliza wanhu walingikala kuli mahame ga muji wa Yelusalemu.

Chiwala cha Yelusalemu ndochidita chiwe kota kagunda ka Edeni,

ndochidita chiwe kota kagunda ka heni Mkulu Nguluwi mbele nandikagongomanya.

Wanhu weng'ha wa muji awo wotowa luchenze na kusangalala,

wolonga malumbo kwa heni na kwimba.

4 "Mnyhulichize hemwe wanhu wa heni,

mhulichize chondilingulonga.

Malajizo na hachi vyolawa kwa heni,

navyo vyowa lumuli lwa wanhu wa isi nyinji.

5 Ndokuya himahima na kuwalohola,

mhela wa hachi wa habehi.

Heni Nguluwi ndowalongoza wanhu wa isi zeng'ha.

Wanhu wa isi za kutali wangumbeteza,

wangubeteza kwa kitumbila kwa heni leka waloholigwe.

6 Muulole ulanga kuchanya,

hamba muilole isi.

Ulanga wokuka kota iyosi,

isi yolala kota ivalo,

na wenyeng'haye wake wobagama kota ng'honzi.

Ila ulohozi wa heni wochikala mazuwa gose,

hachi ya heni mazuwa gose haiduma.

7 "Mnyhulichize hemwe mlinguzizela mbuli za hachi,

muwele namgawika malajizo ga heni kuli nhumbula za hemwe.

Mleche kudumba kubeza kwa wanhu,

ne kona soni kwa maligo ga hewo.

8 Kwa vila fukuzi wowalya kota vila ivalo,

lung'hwawa wowadakula kota vyowalingulya mivalo ja sufu.

Ila hachi ya heni yochikala mazuwa gose,

ulohozi wa heni hauwa na kuduma."

9 Winuche! Winuche gwa Mkulu Nguluwi!

Uvale mong'ho wa hegwe utulohole.

Winuche kota vyouditile aho katali,

mhela wa lulelo lwa katali.

Ndaze, hauwele hegwe ulitemanjile izoka alyo Lahabu,

uwele nakulitumbula?

10 Hegwe ndo ukazile bahali,

ndo ugakazile mazi menji,

nakuzidita nzila mgati ng'hatu mwa bahali,

leka wala uwagombole waloche amo.

11 Gwa Mkulu Nguluwi, wanhu wa hegwe uwagombole wohiluka,

wokuya Yelusalemu kuno wokwimba,

womema usangalalo wa mazuwa gose.

Wosangalala na kutowa luchenze,

masinzo na kulombocheza vyokuka.

12 Mkulu Nguluwi kangulonga hino,

"Heni, ena heni, ndo ndilinguwahembuliza hemwe.

Lekachoni hemwe mwanguwadumba wanhu walingubagama,

wanhu wawele wangwajilila kota misolo?

13 Hemwe namsemwa heni Mkulu Nguluwi ndiwalumbile hemwe,

ndiuhanzanzile ulanga,

na kujiwika misisi ja isi.

Mwangulutilila kudumba mazuwa gose,

kwa chiwalo cha kuzudila kwa yawele na nhumbula yihile,

kwa vila kunuwila kwa heye ndo kudumya.

Ila ng'halazi ya heye yofika kohi?

14 Walingubunzwa wochumulilwa,

hawobagama na kudulika kuli ikulubila,

ne hawokwisilwa chilyo.

15 Heni ndo Mkulu Nguluwi wa hemwe,

ndilinguitigula bahali leka nhigu zake zibume,

Mkulu Nguluwi Mbele na Mong'ho, ndo itagwa lya heni.

16 Nandiuwika ulonzi wa heni kuli milomo ja hemwe,

nandiwavisa kuli lubehelo lwa moko wa heni.

Nandiuwika ulanga hali honhu hake,

nandijiwika misisi ja isi.

Hemwe wanhu wa Yelusalemu ndanguwalonjela,

‘Hemwe ndo wanhu wa heni.’ "

17 Winuche gwa Yelusalemu!

Winuche wime!

Mkulu Nguluwi nakakunweza chizombe cha kuzudila kwa heye,

nagwe nakunwa mbaka idovu lya kuduma,

mbaka nakuzebeduka.

18 Hali wana weng'ha uwapondile,

haduhu ne yumwe wa kukulongoza.

Haduhu ne yumwe wa kukubata moko

hali wana weng'ha uwalolele.

19 Mbuli azi mbili nazikufika,

kuwifya na kudumigwa na lufemba na kukopola.

Whaani kokonela isungu?

Whaani yokuhembuliza?

20 Wana wa hegwe wa habehi kubagama,

nawawasa hafungo ha chila nzila,

wa kota ibala ligwilizwe kuli utandawala.

Nawafichigwa na ng'halazi ya Mkulu Nguluwi,

na magazo ga Nguluwi wa hegwe.

21 Ahyo uhulichize hegwe Yelusalemu ulingugazika,

uhulichize hegwe ugalile, ila haiwele kwa divai.

22 Mkulu Nguluwi, Nguluwi wa hegwe,

yalinguwalewela wanhu wa heye, kangulonga hino,

"Nandichusa kwa hegwe chizombe cha kuzebeduka,

hunwa kahi chizombe cha ng'halazi ya heni.

23 Ndowanweza walingukugaza,

wala wakulonjele, ‘Uwase hanyi leka tukole mchanya mwako.’

Nawaudita mgongo wa hegwe kota misanga,

kota nzila ya hewo ya kukola."