1 Whaani yawele nakakunda mbuli yotuhuliche?

Whaani yavizelele kota moko wa Mkulu Nguluwi ndo ugaditile ago?

2 Hali Mkulu Nguluwi,

chitumagwa wa Mkulu Nguluwi nayali kota igodi lidodo,

kota izabi kuli isi ikalile.

Hawele na lukuli lukulu ne kumeho kunojile,

hawele na kunoga kuwele wanhu woweza kulola na kutudita tumgane.

3 Nakabezigwa na kulemigwa na wanhu,

munhu wa kisinza kwinji, yalingugazela magazo.

Kota munhu yawele wanhu wanguvisa kumeho kwa hewo leka waleche kumona,

nakabezigwa na natumona hawele chinhu.

4 Ndikomya, nakahola magazo ga hetwe,

na kupika masinzo ga hetwe.

Hetwe natijesa kota nakatowigwa na Nguluwi,

nakatowigwa na kugazigwa.

5 Ila nakatubuligwa kwa chiwalo cha gehile ga hetwe,

nakalumizwa kwa chiwalo cha wihe wa hetwe.

Kwa kutowigwa kwa heye, natwenela,

kwa kulumizwa kwa heye, natupona.

6 Hetwe tweng'ha natwajilila na kulubaluba kota ming'holo,

chila yumwe wa hetwe nakaluta kuli nzila ya heye yuye.

Ila Mkulu Nguluwi nakamdwika gehile ga hetwe geng'ha.

7 Nakabunzigwa na kugazigwa,

ila nakemilila kwa kunyenyetela,

halavile lizi ne hado.

Nakalongozwa kota lyana ing'holo lilinguhilikwa kudumuligwa singo,

kota ing'holo vyolilingunyamalila mhela wa kudumuligwa milaika,

halonjile chinhu choneche.

8 Nakabunzigwa na kutagusigwa na kuhilikwa kukopoligwa,

haduhu munhu yoneche yawele nakejesa kuwala gala galingumfika.

Nakawinjigwa kuli isi ya wawele wakomu,

nakatowigwa kwa chiwalo cha gehile ga hetwe gotuditile.

9 Hanga hamtowile yoneche,

ne kulonga ulonzi woneche wa uhadi,

nawanuwila kumtila kota vyowalinguwatila wehile.

Chilaga chake nachali hamwe na vilaga vya wawele na lufufu.

10 Mkulu Nguluwi nakanuwila kumlumiza,

na kumuwika kuli masinzo.

Mkulu Nguluwi nakakudita kikala kwa heye,

kuwe nhambiko ya nongwa.

Chitumagwa wa Nguluwi kowa na walelwa,

kochikala miyaka minji.

Heye ndo kokweneza majesa ga Mkulu Nguluwi.

11 Hoyogona geng'ha galingulawila,

kwa chiwalo cha magazo ga heye,

kogutizwa.

Kwa gala galawile kwa heye,

chitumagwa wa Nguluwi yawele na hachi, kowadita wenji wadite hachi,

naye kogahola gehile ga hewo.

12 Ahyo Mkulu Nguluwi komha uhalizi kota vyoyalinguwapa wakulu,

kowagawila wamizi vinhu viwele nawavihola kuli ngondo lowasumile,

kwa vila nakalavya ukomu wa heye mbaka kubagama.

Hanga nakawazigwa hamwe na wehile,

ila nakahola gehile ga wenji,

nakalanda kwa chiwalo cha wehile leka walechelwe.