1 Kuli mwaka wula uwele mndewa Usiya nakabagama, nandimona Mkulu Nguluwi yekalise kuli chigoda cha undewa, chiwele kuchanya ng'hatu na chitogoligwe ng'hatu, lupembo lwa ikanzu lyake nalyenela kuli ng'handa yeng'ha ya Nguluwi. 2 Nakwali na vilumbigwe viwele na mabawa viwele navichizunguluta chigoda, chila chimwe nachali na mabawa sita. Mabawa meli nagagubika kumeho kwa hewo na mabawa ganji meli nagagubika magulu ga hewo na mabawa ganji meli navitumiya kuguluka. 3 Chila chilumbigwe nachali chitowa iyowe na kulonga,

"Yelile, yelile, yelile,

ndo Mkulu Nguluwi Yawele na mong'ho!

Isi yeng'ha naimema ukulu wa heye."

4 Kwa lizi lyawo fulemu za lwizi na mhajilo zake kuli ng'handa ya Nguluwi navitigasika na ng'handa ya Nguluwi naimema iyosi. 5 Ahyo nandonga, "Ndochona heni! Aku ndo kuduma kwa heni, kwa vila mlomo wa heni ndo ukokomoche na ndangikala hali wanhu wakokomoche. Kwa meho gangu nandimona mndewa, Mkulu Nguluwi Yawele na Mong'ho."

6 Hamba chilumbigwe chimwe hali vila vilumbigwe viwele na mabawa nachiguluka kuya kwa heni chiwele na ikala lya chiluli lilingwaka mmoko mwake, liwele nayali yaliholile kwa kolewo kulawa kuli honhu ha kulavila nhambiko. 7 Nakandoliza nalyo kuli mlomo wa heni na kulonga, "Ulole, ali nalidoliza mlomo wa hegwe, wihe wa hegwe nawusigwa na gehile ga hegwe nagalechelwa."

8 Hamba nanyulika lizi lya Mkulu Nguluwi yolonga, "Ndimlajize whaani? Whaani koluta kwa chiwalo cha hetwe?" Nani nandonga, "Heni baha. Ndajize heni!"

9 Naye nakalonga, "Ulute ukawalonjele wanhu awa,

" ‘Mohulichiza ng'hatu, ila hamuweza kuvizela,

molola ng'hatu, ila hamkona kukomya.’

10 Uzidite nhumbula za wanhu wano ziwe zigagadale,

udite makutu ga hewo galeche kuhulika, meho ga hewo gafute,

leka waleche kona kwa meho ga hewo,

na kuhulika kwa makutu ga hewo,

kuvizela kwa nyhala za hewo na kungalamchila na kuloholigwa."

11 Ahyo nandonga, "Gwa Mkulu Nguluwi, mbaka nili?"

Naye nakanyhidichila,

"Mbaka aho miji hojilechigwa mahame ne wenyeng'haye,

mbaka ng'handa hoziwa ne wanhu wa kikala,

na migunda hojiwifigwa na kudumigwa,

12 mbaka Mkulu Nguluwi hoyosinda kumhilika chila yumwe kutali ng'hatu,

na kuidita isi yeng'ha ya Isilaeli iwe uchiwa.

13 Hanga honhu hamwe ha kumi ha wanhu wosigala kuli isi,

wodumigwa kahi.

Ila kota vila mvinje ama mwaloni vyoulinguleka chibichi houtemigwa,

ndo vyoiwa nyhadikwa yelile kuli isi."