1 Mkulu Nguluwi kowonela isungu kahi wanhu wa Yakobo, ena, kowahagula kahi Waisilaeli. Kowahilula kuli isi ya hewo wawo na wajenzi wokuya kikala hamwe na wanhu wa Yakobo. 2 Wanhu wa isi wowatanza Waisilaeli kuhiluka kuli isi yowapegwe na Mkulu Nguluwi, aho wanhu wa isi wowakolela mijito Waisilaeli. Wala wawele nawawadita Waisilaeli wawe wakola mijito, nawo woditigwa wawe wakola mijito kwa Waisilaeli, kahi Waisilaeli wowalongoza wala wawele nawawabunza.

3 Hemwe wanhu wa Isilaeli, zuwa limwe Mkulu Nguluwi kowosela magazo na kudumba na kuditigwa wapogozi, 4 mokwimba lwimbo alu lwa kumbeza mndewa wa Babuloni,

"Mlole, walinguwabunza wanhu vyowadumigwe!

Ujuvi wa hewo naudumigwa!

5 Mkulu Nguluwi nakaibena nyhimbati ya wehile,

nakabena ng'hweku ya chiundewa ya vilongozi,

6 iwele nawawatowela wanhu wa isi kwa ng'halazi,

nawawatowa ne kuduma,

nawawalongoza kwa nhumbula yihile ne isungu.

7 Lelo isi yeng'ha naisindamala na ina kikala goya,

chila munhu kangwimba kwa kusangalala.

8 Misonobali jangusangalala kugwa kwa mndewa wa Babuloni,

mielezi ja Lebanoni najo jilonje hamwe,

‘Kwa vila nakuduliswa,

haduhu yalingutema migodi yawele kokuya kwa hetwe!’

9 "Kuli isi ya wabagame nako nakusangalala,

leka kukubochela mhela houkuya.

Kwangujililimla mihoka juye kukulamsa,

jiwele ndo wakulu kuli isi,

kwangujililimla kulawa kuli vigoda vyawo vya undewa,

jeng'ha jiwele najali ndo wandewa wa wanhu wa isi.

10 Weng'ha wokulonjela,

‘Hegwe nagwe nakuwa ng'hochele kota hetwe,

hegwe ndo kota hetwe!

11 Kidaya kwa hegwe kweng'ha nakuduliswa mbaka kuli isi ya wabagame,

hamwe na iyowe lya ving'hweleng'hwele vya hegwe,

mhiko ndo chinanda cha hegwe,

na fukuzi ndo igolole lya hegwe!’

12 "Ulole ndaze vyougwile kulawa kilanga,

hegwe nhondwe ilingupulika mitondo, mwana wa kubwemwenzuka!

Ndaze vyoutozigwe hasi,

hegwe uwele nakuwasumya wanhu wa isi!"

13 Nakulonga mnhumbula mwa hegwe,

"Ndokwina mbaka kilanga,

ndochinula chigoda cha heni cha undewa,

mchanya ng'hatu kupuluta nhondwe za Nguluwi,

ndochikalisa mchanya mwa chidunda cha nhing'hano za milungu,

kuli banzi za kasikazini.

14 Ndoguluka mzidi wa hoiwele ng'hungugu,

ndochiwhaniza na heye Nguluwi Yawele Kuchanya Ng'hatu."

15 Ila nakuduliswa mbaka kuli isi ya wabagame,

mbaka hasi ng'hatu mwa ikulubila.

16 Wala wawele wokona wokunhogolela meho,

wobubuwala kuwala hegwe, wolonga,

"Ndaze, ayu ndo yula yawele nakaitigasa isi,

na kuudita undewa ukakame,

17 yula yaiditile isi kuwa kota chiwala,

yawele nakajidumya miji jake,

hawalechile wapogozi wa ngondo wa heye walute kaye?"

18 Wandewa weng'ha wa wanhu wa isi nawatiligwa kwa lutogo,

chila yumwe kuli chilaga cha heye.

19 Ila hegwe nakutozigwa kunze mwa chilaga cha hegwe,

kota nhagala iwele nailemigwa,

mtufi wa hegwe naubigangwa,

nakuwichigwa hamwe na wala wawele nawakopoligwa kwa kuhomigwa kwa ipanga,

wala wawele nawatozigwa kuli ikulubila liwele na maganga.

20 Ila hegwe hauweza kilumba nawo kuli kutiligwa,

kwa vila nakuiwifya isi ya hegwe,

na nakuwakopola wanhu wa hegwe.

Lulelo lwa mwihe lusemwigwe mazuwa gose.

21 Hawiche goya honhu ha kuwadumulila singo wana wa heye,

kwa chiwalo cha gehile ga wasekulu wa hewo,

waleche kwinuka leka kuihalila isi,

na kumemeza isi kwa miji jawo.

22 Mkulu Nguluwi Yawele na Mong'ho kangulonga hino,

"Ndoutowa muji wa Babuloni na kuudumya ng'hatu,

ndowifya chila chinhu, chiwele ndo muji weng'ha

na wana na yoneche yawele nakasigala mkomu.

Heni Mkulu Nguluwi ndangulonga.

23 Ndohadita hawe honhu ha mituwe,

na isi ya milamba,

ndohafyajila kwa isuyo lya kudumya.

Heni Mkulu Nguluwi mbele na Mong'ho, ndangulonga."

24 Mkulu Nguluwi Yawele na Mong'ho nakelaha,

"Ndikomya, kota vila vyombichile goya, ndo vyoiwa hamba,

nani kota vyonuwile, ndo vyoikwenela.

25 Ndobena ludali lwa Waashulu kuli isi ya heni,

mchanya mwa chidunda cha heni ndowabiga.

Ngwamo za hewo zokusigwa kwa wanhu wa heni,

mhomholo zolavigwa kulawa kuli mayega ga hewo."

26 Aku ndo kwamula kwa Mkulu Nguluwi kuwala isi yeng'ha,

awu ndo moko uwele kougolola,

mchanya mwa wanhu wa isi zeng'ha.

27 Wone Mkulu Nguluwi Yawele na Mong'ho nakanuwila,

whaani yoweza kumlemeza?

Wone nakamula kutowa,

whaani yoweza kumlemeza?

28 Mwaka uwele mndewa Ahasi nakabagama, Mkulu Nguluwi nakalavya ulonzi awu,

29 "Mleche kusangalala hemwe Wafilisti weng'ha,

kwa vila ng'hobwa iwele naiwatowa hemwe naibeneka,

kwa vila izoka lyolela izoka ling'ang'ale kusinda lilyo,

nalyo lyoweza kuguluka.

30 Wazunwa kusinda wazunwa weng'ha wowa na honhu ha kulya,

walihela chinhu wowa na kikala goya.

Ila msisi wa hegwe, gwa Filistiya, ndoudumya kwa lufemba,

na yoneche yawele kosigala, kokopoligwa na lufemba alo.

31 "Utowe iyowe, gwa lwizi! Ulile gwa muji!

Msungulumuche hemwe Wafilisti mweng'ha!

Ng'hungugu ya iyosi yanguya kulawa kasikazini,

haduhu yawele kokawila kuli misitali ja wamizi wake."

32 Wasenga wa wanhu wa isi ayo wokwidichilwa ndaze?

Wolonjelwa hino,

"Mkulu Nguluwi nakaidita Yelusalemu iwe nzinzili,

na mgati mwake, wanhu wa heye wawele nawatunyigwa wowa na honhu ha kubilimila."