1 Chiwala na isi ng'havu vyosangalala,

kugunuche kosangalala na kubahula uluwa.

2 Kobahula uluwa kwa winji,

kotowa luchenze na kwimba kwa kusangalala.

Nguluwi kokupa lufufu lwa Lebanoni,

na kunoga kwa chidunda cha Kalimeli na ibindi lya Shaloni.

Wanhu wowona ukulu wa Mkulu Nguluwi hala kugunuche,

wovyona vinduzanduza vya Nguluwi wa hetwe.

3 Mgadite moko ga hemwe gawele ng'hochele gawe nzinzili,

mgadite mafugamilo ga hemwe galihela mong'ho gawe nzinzili.

4 Muwalonjele watweguche nhumbula,

"Mikangaze nhumbula, mleche kudumba!

Mlole, Nguluwi wa hemwe kokuya kuhilula chibida,

kokuya kuwatowa wang'honyo wa hemwe,

kokuya heye yuye kuwalohola hemwe."

5 Aho meho ga wohambe walole gogubuligwa,

na makutu ga wohambe wahuliche gohulika kahi.

6 Vyete wonyozokanyozoka kota ibala,

na myango za wohambe walonje zokwimba kwa kusangalala.

Mazi gochililika himahima kuli chiwala,

na kuli nzanda za mazi kuli kugunuche.

7 Sangalaza zilingulakaza zowa ilamba lya mazi,

isi ikalile yolavya nzasa.

Haluga ha mikanhu hojiwasile aho hamwande,

misolo jozuka na kukula kota mikuluwili.

8 Ako kowa na nzila ng'hulu,

nayo yochemigwa "Nzila Yelile."

Wanhu wakokomoche hawokola amo,

yowa ya wala walingujenda kuli nzila ayo,

wapoka hawojeza kubiga nzila ayo.

9 Ako hakuweza kuwa na isimba,

ne igongolo lyoneche ling'hang'hale holikola amo,

ne koneka amo.

Ila wala wawele nawagomboligwa hela ndo wokola amo.

10 Wagomboligwe na Mkulu Nguluwi wohiluka,

wokuya Yelusalemu kuno wokwimba.

Wowa wawele na usangalalo wa mazuwa gose,

wopegwa usangalalo na luchenze,

masinzo na chililo vyokwajilila ng'hatu.