1 Ndokwimba kwa chiwalo cha goloko wa heni,

kuwala mgunda wa heye wa mizabibu.

Goloko wa heni nayali na mgunda wa mizabibu,

kuli chidunda chiwele na mboto.

2 Nakaulima goya na kusa maganga,

nakoteza mizabibu jinojile ng'hatu,

nakazenga ilingo lya kwamila mgati mwake,

nakabawa isimo lya kukamila divai.

Hamba nakabeteza kupata mbeta zinojile,

ila mizabibu ajo najilela mafuza gausungu.

3 Ahyo goloko wa heni nakalonga,

"Lelo hemwe wenyeng'haye wa Yelusalemu na wanhu wa Yuda,

mtaguse hali heni na mgunda wa heni wa mizabibu.

4 Ndahaditile chinhu chachi cha mzidi kuli mgunda wa heni wa mizabibu?

Nandali ndibeteza zabibu zinojile,

lekachoni najilela zabibu zausungu?

5 Lelo ndowalonjela hemwe chondilingijesa kudita kuli mgunda wa heni wa mizabibu.

Ndokusa lugagala lwake, nawo wowifigwa,

ndobomola lukanzi lwake, nawo wobigangwa.

6 Ndouleka uwifigwe ng'hatu,

mizabibu jake jolechigwa ne kutemigwa nhagala ne kulimilwa.

Mikwangwasale na miwa jozuchila amo,

ndoilemeza nhonya ileche kutowa mchanya mwake."

7 Ena! Mgunda wa mizabibu wa Mkulu Nguluwi Yawele na Mong'ho,

ndo ivyazi lya Waisilaeli,

na mizabibu jinojile jiwele mgati mwake, ndo wanhu wa Yuda.

Nayali yochitumbila hachi, ila nakona kukopola,

nayali yochitumbila kutanganika, ila nawambuza chililo!

8 Mochona hemwe mlingonjeza kugula ng'handa chila mhela,

na kulutilila kugula migunda,

honhu heng'ha hanguwa ha hemwe,

mbaka hanguwa haduhu honhu ha kikala wanhu wanji kuli isi.

9 Mkulu Nguluwi Yawele na Mong'ho nakalonga hino,

"Ndikomya, ng'handa ng'hulu zowa uchiwa,

ng'handa zizenjigwe kwa sendi nyinji, zowa zilihela wanhu wa kikala.

10 Mgunda wa mizabibu wa eka kumi,

wolavya lita makumi meli na gane hela ga divai,

yalingunyala kilo miya imwe za nyhadikwa,

kobeta kilo kumi hela za nyhule."

11 Wochona hewo walingwinuka lufuku,

leka kubilimila kunwa ujimbi,

na walingukawila ng'hatu mbaka nechilo,

mbaka wagale ng'hatu.

12 Wana ving'hweleng'hwele na igombogombo kuli mnvina za hewo,

ngoma ndodo na mluli na divai,

ila hawalingijesa kuwala madito ga Mkulu Nguluwi,

ne kujitogola mijito jake.

13 Ahyo, wanhu wa heni wowinjigwa leka walute kuli isi ya chijenzi,

kwa vila wahela kuvizela,

wang'hangala wa hewo wobagama kwa nzala,

wanhu wa hewo wenji wobagama kwa ng'halu.

14 Isi ya wabagame yanguwabeteza kwa maya ng'hatu,

yangugabula mlomo mbaka kuduma.

Mgati mwake wodulika wakulu wa hewo na wanhu wanji wenji,

hamwe na wajuvi na walingudita mnvina weng'ha.

15 Chila munhu koditigwa yadeule,

weng'ha walingidaya woduliswa.

16 Ila Mkulu Nguluwi Yawele na Mong'ho kotogoligwa,

kwa chiwalo cha hachi ya heye.

Nguluwi Yelile kochilajila yuye,

kota ka yelile kwa hachi ya heye.

17 Kuli mahame ga miji ajo,

ming'holo jolya misolo amo,

vinyehe vyopata chilyo mumo.

18 Wochona walingukwega gehile kwa ng'weso za uhadi,

na wihe kota kwa ng'weso za ibilibingwa,

19 walingulonga kuno womseka,

"Nguluwi udite himahima kutugaza,

twangugana kona goulonjile kota kogadita.

Gwa, yelile wa Isilaeli weneze kunuwila kwa hegwe,

utawize leka tuvizele."

20 Wochona walingulonga kota wihe ndo kunoga,

na kunoga ndo wihe.

Wochona kahi walingulonga kota jiza ndo lumuli,

na lumuli ndo jiza,

na kota usungu ndo unojenoje,

na unojenoje ndo usungu.

21 Wochona walingiwona kota wana luhala,

na kota wana nyhala.

22 Wochona hewo walingunwa divai lukami,

walingunwa ujimbi ulivinji,

23 wala walinguwalechela wawele na nongwa,

kwa kubochela chinhu kwa chiwalo cha kwajiliza hachi,

ila wanguwabunza hachi walihela nongwa.

24 Ahyo, kota chiluli chilingulakaza misolo,

kota vila miwa vyojilingulakala kuli milapi ja chiluli,

ndo mizabi ja hewo vyojilingola.

Uluwa wake wowembeluswa kota nhimbwisi,

kwa vila nawagalema malajizo ga Mkulu Nguluwi Yawele na Mong'ho,

na kuubeza ulonzi wa Yelile wa Isilaeli.

25 Ahyo, ng'halazi ya Mkulu Nguluwi yangwaka kwa wanhu wa heye,

moko wa heye nawinuligwa na kanguwatowa.

Vidunda vyangukakama,

mitufi ndo kota wavu kuli nzila.

Ila ng'halazi ya heye haisindamale,

moko wa heye ung'hali winuligwe leka kuwatowa.

26 Mkulu Nguluwi kangwinula bendela ya ulajilo kwa chiwalo cha wanhu wa isi za kutali,

kanguwatowela mluli wanhu wawele kuli kuduma kwa isi.

Nawo wanguya himahima!

27 Haduhu ne yumwe hali hewo yatochile ne kikwang'wala,

ne yumwe wa yalingusinzila ne kuwasa,

ne isali liwele haliwopigwe goya mchuno,

ne ng'weso ya ikwamba idumuche.

28 Misale ja hewo najihongoka lukami,

mipinde ja hewo najikwejigwa leka kiwika goya,

kwato za falasi wa hewo ndo kota maganga,

maguludumu ga mituka ja hewo ja kitowela ngondo ndo kota mbeho ya chivuluvumbi.

29 Wamizi wa hewo wangubuma kota misimba,

jiwele najibata upelembi na kuhilika honhu ha kutali,

hawele haduhu yoneche yawele koweza kusukula.

30 Kuli zuwa alyo meswang'honyo wa Waisilaeli wobuma kuli isi ya Isilaeli,

kota kubuguma kwa bahali itiguche.

Wone munhu koilola isi,

kovyona jiza na magazo,

lumuli logubikwa na jiza totolo lya ng'hungugu.