1 Awu ndo usenga kuwala kuchiwala hawele hafungo ha bahali,

kota chivuluvumbi chilingukola kuli isi ya kusini,

walinguvaba wanguya kulawa kuchiwala,

kulawa kuli isi ilingukabusa.

2 Nandajilwa kulota kwa kukabusa,

yalingubelenhuka kangubelenhuka,

yalinguhola vinhu vya kuli ngondo kanguhola.

Mlute kuchanya kuli ngondo hemwe Waelamu,

mitowe na wang'honyo hemwe Wamediya!

Nguluwi kogadita magazo geng'ha gawele nagagaligwa na Babuloni, gamale.

3 Kwa chiwalo cha mbuli ayo lukuli lwa heni nalumema usungu,

usungu kota wa mamo yalinguponda.

Lonyhuliche na kona kuwala mbuli ziwele Nguluwi kozidita, nandali ndikakama.

4 Kwa lunhwinhwi meho ga heni gangulola chila ubanzi,

nanditumbila matinazo uwele mhela unojile,

ila nauwa chinhu cha kukabusa.

5 Vilongozi wakulu wa muji wa Babuloni nawali na mnvina,

nawali wolya na kunwa,

ila munhu yumwe nakalonga,

"Hemwe vilongozi, mwinuche,

mviwiche goya vinhu vya hemwe vya kitowela ngondo!"

6 Hamba Mkulu Nguluwi nakandonjela,

"Ulute, uwiche mwamizi kuli lukanzi lwa muji wa Yelusalemu,

na umlonjele yatowe iyowe kuwala chinhu choneche choyalinguchona.

7 Hoyojona mituka ja ngondo jilingukwejigwa na falasi

ama walingukwina midogowi ama walingukwina ngamiya,

yewiche goya, yelolele ng'hatu!"

8 Mwamizi nakalandula lizi,

"Mkulu, nandali kuli mijito ja heni mchanya mwa ilingo lya kwamila,

chila zuwa, nemisi na nechilo!

9 Ulole, chilundo changuya, wakwina falasi weliweli,

wangulonga, ‘Babuloni nakugwa! Nakugwa!

Jimalukolo jeng'ha ja milungu ja hegwe najitozigwa hanyi na kubenangwa!’ "

10 Hemwe wanhu wa heni Waisilaeli, muwele nampululwa kota ngano,

ila lelo nandiwalonjela mbuli inojile,

iwele nandiihulika kulawa kwa Mkulu Nguluwi Yawele na Mong'ho,

Nguluwi wa Isilaeli.

11 Awu ndo usenga wa Nguluwi kumuwala Edomu.

Ndanguhulika munhu kangunyhema kulawa Seili,

"Mwamizi, nechilo yomala nili?

Mwamizi, nechilo yomala nili?"

12 Mwamizi nakedichila,

"Mitondo yanguya, na nechilo hihyo du,

wone kwangugana kuuza, hegwe uuze,

ulute na uhiluche kahi."

13 Awu ndo usenga wa Nguluwi kuwala Alabiya.

Hemwe Wadedani muwele kuli majendo,

mlinguwika kambi kuli viwala vya Alabiya,

14 muwape mazi awo wawele na ng'halu.

Namwe wenyeng'haye wa isi ya Tema,

muwagalile chilyo awo wawele nawabilima kulawa kuli isi ya hewo,

15 kwa vila nawabilima mipanga jiwichigwe goya kukopola,

na mipinde jiwele najikwejigwa, jiwichigwe goya kwa ngondo.

16 Mkulu Nguluwi nakandonjela hino, "Kuli mhela wa mwaka umwe, ne kupuluta ama kupungula, ukulu weng'ha wa Kedali womala. 17 Wawele wosigala hali watoza misale na wazidahe wa wanhu wa Kedali wowa wachefu hela. Heni Mkulu Nguluwi, Nguluwi wa Isilaeli, nandonga."