1 Kochona hegwe Yelusalemu,

honhu ha kulavila nhambiko ha Nguluwi,

muji uwele mndewa Daudi nakekala.

Wanhu wa hegwe wangulutilila kusangalala kwa chiwalo cha mnvina za chila mwaka.

2 Ila heni Nguluwi, ndougalila magazo muji wa Yelusalemu,

wanhu wa hegwe wolila na kulombocheza,

kwa heni muji awo wowa kota honhu ha kubwinila chiluli,

kuli honhu ha kulavila nhambiko.

3 Heni ndokuzunguluta banzi zeng'ha,

ndozenga milingo ja kukwinila kuli ng'hanzi na kukutowa.

4 Kogwiswa mgati ng'hatu mwa misanga,

kulawa ako kutali kolavya lizi.

Ulonzi wa hegwe wolawa ako kuli misanga,

kota vila lizi lya ihoka.

5 Baho du wang'honyo wa hegwe wenji wowa kota nhimbwisi,

wawele na nhumbula zihile wowa kota mhumba ilinguwembeluswa.

6 Mkulu Nguluwi Yawele na Mong'ho kokuya kukutanza,

kokuya kota kubuma na kota limachinyhina likulu na kwa lizi ng'hulu,

kota chivuluvumbi na kota chiluli chilingulakaza.

7 Vilundo vya wanhu wa isi zeng'ha walinguutowa muji wa Yelusalemu,

weng'ha walinguitowa ngome yake na kuuzunguluta kwa wamizi,

wokwajilila kota kulota kwa nechilo.

8 Kota vila munhu yawele na nzala vyoyalingulota kangulya,

ila kangwinukaga yang'hali kangutamika nzala.

Ama kota vila munhu yawele na ng'halu vyoyalingulota kangunwa mazi,

ila kangwinukaga yawele ng'hochele kwa chiwalo cha ng'halu.

Ahyo ndo vyoiwa kwa vilundo vyeng'ha vya wanhu wa isi,

vilinguchivaba chidunda cha Siyoni.

9 Hemwe wanhu wa Yelusalemu,

mlutilile kububuwazwa!

Midite wohambe walole na mleche kona!

Mgale ila ileche kuwa kwa divai,

mzebeduche ila ileche kuwa kwa ujimbi.

10 Mkulu Nguluwi nakawegalila usinjizi ukulu,

nakadinya meho ga hemwe waloli,

nakagubika vitwi vya hemwe mlingulola.

11 Lelo uloli wa hemwe weng'ha ndo kota usenga wandichigwe kuli chitabu chihindigwe kwa muhuli. Wone mumhilichile munhu yoneche yalinguvizela kusoma na kumlonjela, "Dedede, usome chandichigwe kuli chitabu chino," kolonga, "Siweza kusoma kwa vila nachihindigwa kwa muhuli." 12 Ama wone mumhe munhu yoneche yohambe yadahile kusoma na kumlonjela, "Usome chandichigwe kuli chitabu chino," kowedichila hemwe, "Sidahile kusoma."

13 Mkulu Nguluwi kangulonga,

"Wanhu awa wanguya kufugamila heni kwa ulonzi hela,

ila nhumbula za hewo za kutali na heni.

Mhela howofugamila heni,

wanguwinza malajizo hela gawele wanhu nawagawika na gawele wangugalonga mhela winji.

14 Ahyo ndowaditila kahi vinduzanduza,

viwele vyowakabusa na kuwabubuwaza wanhu awa,

na kuwifya luhala lwa walingulonga wana luhala na kuvizela."

15 Mochona hemwe mlingijesa mwangumvisa Mkulu Nguluwi majesa ga hemwe,

mlingukola madito ga hemwe kuli jiza na kulonga, "Haduhu yawele yotona,

whaani yoweza kuvizela chotulingudita?"

16 Hemwe mlingugalusa mbuli.

Mwangijesa kota ilongo lya kulumbila vinhu lyangiwhana na yalingulumba vinhu?

Chinhu chilumbigwe hachiweza kumlonjela munhu yawele nakachilumba chinhu acho,

"Hegwe haunditile."

Chiya hachiweza kumlonjela yachilumbile,

"Hegwe hauvizelele choneche."

17 Ung'hali mhela uchefu hela,

chihulo cha Lebanoni choditigwa kuwa mgunda uwele na mboto,

na mgunda uwele na mboto woditigwa kuwa chihulo.

18 Kuli zuwa alyo wohambe wahuliche wohulika usenga ulingusomigwa kuli chitabu,

na kuli jiza, wohambe walole wokwaluka kona.

19 Walingunyenyetela wosangalala kwa Mkulu Nguluwi,

ng'hochele wotowa luchenze kwa kusangalala,

kwa chiwalo cha mbuli ziwele naziditigwa na Nguluwi Yelile wa Isilaeli.

20 Wawele na nhumbula zihile wodumigwa,

walingumbeza Nguluwi womala,

weng'ha walingulewela wihe wokwajilizwa.

21 Nguluwi kowadumya wala walinguwalonga vibi wayawo,

wala wanhu walingulemeza kugazigwa kwa wehile,

na wala walingulonga udesi leka kuwabunza hachi walihela nongwa.

22 Ahyo Mkulu Nguluwi yawele nakamgombola Abulahamu,

nakalonga hino kuwala walelwa wa Yakobo,

"Walelwa wa Yakobo hawobasigwa soni ne kudeuzwa kahi.

23 Howowona wana wa hewo,

wana wondiwapele,

wolitogola itagwa lya heni Yelile wa Yakobo,

wondumba heni Nguluwi wa Isilaeli.

24 Mhela awo houfika,

wapoka wochilangusa kuvizela,

na wala walingung'ung'uta wokunda kulanguswa."