1 Wochona walinguwika malajizo galihela hachi,

walingulavya mizilo ja kubunza,

2 kuleka kuwapa wazunwa hachi za hewo,

na kulemeza hachi za wanhu wa heni walingubunzwa,

kuwadita wafililwe na walume wa hewo kuwa upelembi wa hewo,

na kuwasukula walekwa.

3 Modita choni kuli zuwa lya magazo,

mhela kubagama hokukuya kulawa kutali?

Mombilimila whaani yawape utanzi?

Moleka kohi lufufu lwa hemwe?

4 Hakuwa na chinhu choneche,

ila kisinza hali wapogozi wa ngondo,

ama kugwa hali wakopoligwe.

Kwa aga geng'ha, ng'halazi ya heye haisindamale,

moko wa heye ung'hali winuligwe mchanya.

5 Mkulu Nguluwi kangulonga,

"Kochona heye Ashulu, ng'hobwa ya ng'halazi ya heni,

heye yalingibata nyhimbati ya kuzudila kwa heni!

6 Ndangumlajiza kwa wanhu wa isi wohambe wafugamile heni Nguluwi,

ndangumlajiza hali wanhu wa isi walingundita nzudile,

kuwabata wapogozi wa ngondo na kuhola vinhu vya kuli ngondo,

kahi kuwabiganga hasi kota nhope kuli nzila.

7 Ila heye Ashulu hanuwile ahyo,

heye nayali na kunuwila kunji,

nakanuwila kuwifya ng'hatu,

kuwadumya wanhu wa isi zinji wenji ng'hatu.

8 Kwa vila nakalonga,

‘Vilongozi wa wamizi wa heni ndo wanoga kota wandewa.

9 Nandiudumya muji wa Kalino kota vyondiudumye muji wa Kalikemishi.

Nandiudumya muji wa Hamati kota vyondiudumye muji wa Alipadi,

nandiudumya muji wa Samaliya kota vyondiudumye muji wa Damasiko.

10 Kota vila moko wa heni vyouholile undewa wa jimalukolo,

undewa uwele jimalukolo ja hewo najali minji kusinda jila ja Yelusalemu na Samaliya.

11 Ndaze, siuditila vibi muji wa Yelusalemu na jimalukolo jake,

kota vyondiuditile vibi muji wa Samaliya na jimalukolo jake?’ "

12 Mkulu Nguluwi hoyowa yasindile mijito ja heye jeng'ha kuli chidunda cha Siyoni na kuli muji wa Yelusalemu, kolonga, "Ndomtowa mndewa wa Ashulu kwa chiwalo cha kidaya na ujuvi wa nhumbula ya heye."

13 Kwa vila nakalonga,

"Kwa moko wa heni uwele na mong'ho nandita aga,

kwa luhala lwa heni, kwa vila ndina kuvizela.

Nambusa mbaka ja wanhu wa isi,

nanyhola ng'hano ya hewo,

kota yazidahe, nandiwasumya wandewa wa hewo.

14 Kota munhu vyoyalingwinjiza moko kuli chimvulila,

ndo hihyo moko wa heni vyouholile lufufu lwa wanhu wa isi,

kota wanhu vyowalingukungajiza mafinga galechigwe kuli chimvulila,

ndo vyong'hungajize isi zeng'ha,

haduhu ne yumwe yatowile ibawa,

ama kugabula mlomo wa heye kutowa iyowe."

15 Ila Mkulu Nguluwi nakalonga hino,

"Ndaze, iwago lyanguweza kidaya kota lina mong'ho kusinda yula yalingutumiya,

ama msumeno kitogola kusinda yula yalingutumiya?

Ndaze, ng'hobwa yanguweza kumdita munhu yakole mijito,

ama ng'hweku kumwinula yalinguitumiya?"

16 Ahyo Mkulu, Mkulu Nguluwi Yawele na Mong'ho,

kolajiza utamwa wa kuwadita wamizi wazidahe wa heye wagande,

lutogo lwawo lwolakazwa kwa chiluli.

17 Nguluwi yawele ndo lumuli lwa Isilaeli, kowa kota chiluli,

Yelile wa Isilaeli kowa ilapi lya chiluli,

chiwele kuli zuwa limwe cholakaza chila chinhu.

Wamizi wa Ashulu wolakazwa kota miwa na mikwangwasale.

18 Lutogo lwa vihulo vyake na migunda jake jinojile,

vyolakazwa ng'hatu,

kota vila mtamwa vyoyalinguwa ng'hochele ng'hatu.

19 Migodi jiwele josigala kuli vihulo vyake jowa michefu ng'hatu,

mbaka mwana mdodo koweza kujiwaza.

20 Zuwa lyokuya liwele walelwa wa Yakobo wasigale, ena, Waisilaeli wawele wosigala hawochitumbila kahi kwa wanhu wa isi wawele nawawagaza, ila wochitumbila ng'hatu kwa Mkulu Nguluwi, Yelile wa Isilaeli. 21 Walelwa wa Yakobo wachefu wawele wosigala womhiluchila Nguluwi Mkulu. 22 Hanga Waisilaeli ndo wenji kota sangalaza za mhwani, wachefu hela ndo wohiluka. Kudumya nakulajizwa kukoleche na kokoleka kwa hachi. 23 Ena! Mkulu Nguluwi Yawele na Mong'ho, kokweneza choyalingugana kudita kuli isi yeng'ha.

24 Ahyo Mkulu Nguluwi Yawele na Mong'ho kangulonga hino, "Hemwe wanhu wa heni mlingikala muji wa Yelusalemu, mleche kuwadumba Waashulu wawele wanguwatowa hemwe kwa ng'hobwa, howokwinula nyhimbati za hewo kwa chiwalo cha hemwe kota vyowaditile Wamisili. 25 Kwa vila ung'hali mhela uchefu hela, ng'halazi ya heni kwa hemwe yoduma na kuzudila kwa heni kowagwila Waashulu na kuwadumya. 26 Heni Mkulu Nguluwi Mbele na Mong'ho ndowazapa kota vyondiwaditile Waamidiani kuli italawe lya Olebu. Ndolajila mong'ho wa heni kuwatowa Waashulu kota vyondiwaditile Wamisili. 27 Mhela awo itunyo lyowawadwichile ndolyusa na ngwamo yowawawichile msingo mwa hemwe yobenigwa, kwa vila singo za hemwe zowa ng'hulu ng'hatu."

28 Wamizi wa Ashulu nawafika mujini Ayati.

Nawakolela ako Migiloni,

mhomolo za hewo nawazileka Mikimashi.

29 Nawaloka honhu ha kulochela,

nechilo ayi wanguwasa Geba.

Wanhu wa Lama wangukakama kwa lunhwinhwi,

wanyeng'haye wa Gibeya, muji wa Sauli, nawabilima.

30 Mtowe iyowe hemwe wanhu wa Galimu!

Muwiche goya ikutu hemwe wanhu wa Laisha!

Mochona hemwe wenyeng'haye wa Anatoti!

31 Wanhu wa Medimena wangubilima,

wenyeng'haye wa Gebimu wangivisa.

32 Lehano wang'honyo wowika kambi ako Nobu,

wotigasa ngumi zawo kwa chiwalo cha chidunda cha Siyoni,

ena, kwa chiwalo cha muji wa Yelusalemu.

33 Ila Mkulu Nguluwi Yawele na Mong'ho kozitema nhagala zake kwa ng'halazi,

migodi jiwele ng'wemang'wema ng'hatu jogwiswa,

wawele kuchanya wobasigwa soni.

34 Kovitema visosolo vya kuchihulo kwa iwago,

Lebanoni na mielezi jake mikulu jogwa.