1 Hemwe wanhu wa isi zinji, mhejele habehi leka mhulichize,

muwiche goya makutu ga hemwe,

ndangugana isi na chila chinhu chiwele amo,

vihuliche ulonzi wondilonga.

2 Mkulu Nguluwi nakawazudila wanhu weng'ha wa isi zinji,

kuzudila kwa heye nakwambuzwa na wamizi wa hewo weng'ha.

Nakamula kuwakopola kwa kuwawika mmoko mwa walingudumula singo.

3 Wanhu wawele nawakopoligwa, wotozigwa kunze,

ng'huli za hewo zonhung'ha,

na danda ya hewo yochililika kulawa kuli vidunda.

4 Nhondwe zeng'ha za kilanga zowifigwa,

ulanga wochibina kota kalatasi.

Nhondwe za heye zeng'ha zoswinha,

kota mahamba ga mzabibu vyogalingukala,

ena, kota ifuza lya mtini vyolilingukala.

5 Nguluwi nakaliwika goya ipanga lya heye ako kilanga,

nalyo lyowatema Waedomu,

wanhu wawele heye nakamula kuwadumya.

6 Ipanga lya heye lyododa danda na mafuta,

kota danda na mafuta ga ing'holo ilume na ipongo,

mafuta kulawa kuli figo za ming'holo milume,

jiwele najilavigwa nhambiko.

Mkulu Nguluwi kolavya nhambiko azo kuli muji wa Bosila,

kokudita kukopola ako kukulu kuli isi ya Edomu.

7 Mibogo ja kisolo jodumigwa hamwe na hewo,

milogota milume na mibuguma kahi.

Isi yododa kwa danda na misanga jogubikwa na mafuta ga hewo.

8 Mkulu Nguluwi nakehagulila mwaka na zuwa,

kwa chiwalo cha kuhilula chibida kwa wang'honyo wa Yelusalemu.

9 Lami yochililika kuli vikolola vya Edomu,

ilongo lyake lyogaluka na kuwa maganga ga chikwatilo,

misanga jake jowa lami ilingwaka.

10 Vyokwaka nemisi na nechilo ne kuzimya,

iyosi lyofung'ha mhela weng'ha,

Isi yowa chiwala mazuwa gose,

haduhu yawele yokola ako kahi.

11 Kowa haluga ha kozi na nungunungu,

mituwe mikulu na mibondwa jochikala amo.

Mkulu Nguluwi kowegalila ivuche,

na isi yowa ilihela chinhu.

12 Edomu yochemigwa "Isi ilihela mndewa,"

vilongozi wake weng'ha nawajilila.

13 Miwa jokota kuli ngome zake,

migodi ja miwa na mikwangwasale jowa kuli mahame ga hewo.

Yowa haluga ha mibwa ja kisolo na mituwe.

14 Migongolo ja kugunuche joting'hana na idula,

mipongo ja kisolo jolila kwa kuchemeleza,

vilumbigwe vya nechilo vyosindamala amo,

na kipalila honhu ha kwesela.

15 Mituwe jowika vimvulila na kulagaza mafinga amo,

jokong'osola na kulolela mibofu jawo,

hanyi kuli lubehelo lwa mabawa gawo.

Vilutema vyoting'hana amo,

chila chimwe na chiyage.

16 Msome kuli chitabu cha Mkulu Nguluwi,

"Haduhu chilumbigwe ne chimwe chiwele chowa haduhu,

chila chimwe chowa na chiyage."

Kwa vila Mkulu Nguluwi yuye nakalonga ahyo,

muhe wa heye wowakungajiza weng'ha.

17 Mkulu Nguluwi nakahawika goya honhu ha vilumbigwe avyo,

nakatumiya vipimilo kuipimila isi ya Edomu,

yowa yawo mazuwa gose,

lulelo lumwe mbaka lulelo luyage lochikala amo.