1 Kuli mazuwa ago, Hesekiya nakatamika ng'hatu mbaka nayali habehi kubagama. Mloli Isaya, mwana wa Amosi, nakaluta kwa heye na kumlonjela, "Ahi ndo vyoyalingulonga Mkulu Nguluwi, ‘Uwiche goya mbuli za hegwe kuli ng'handa ya hegwe, kwa vila kobagama.’ "

2 Hesekiya nakagalamchila ubanzi wa kuli lukanzi, nakamlanda Mkulu Nguluwi, yolonga, 3 "Dedede, gwa Mkulu Nguluwi, ukumbuchile vyondikukolele mijito kwa kukundigwa na kwa nhumbula ya heni yeng'ha na kudita ganojile hali hegwe." Hesekiya nakalila kwa usungu ng'hatu.

4 Hamba ulonzi wa Mkulu Nguluwi naumuyila Isaya, naulonga, 5 "Uhiluche ukamlonjele Hesekiya, ‘Heni Mkulu Nguluwi, Nguluwi wa sekulu wa hegwe Daudi, nanyhulika kulanda kwa hegwe na kugona mahozi ga hegwe. Lelo ndokonjezela miyaka kumi na jihano kuli kikala kwa hegwe. 6 Ndokulohola hegwe hamwe na muji awu, kulawa mmoko mwa mndewa wa Ashulu na kuwamila muji awu.’ "

7 Hamba Isaya nakamlonjela Hesekiya, "Awu ndo ulajilo wa Mkulu Nguluwi kwa hegwe kota Mkulu Nguluwi kodita chila choyalagane. 8 Kuli ngazi ziwele nazizenjigwa na mndewa Ahasi, Mkulu Nguluwi koludita lubehelo luhiluche kumbele magulu kumi." Ahyo lubehelo naluhiluka kumbele magulu kumi. 9 Hamba Hesekiya mndewa wa Yuda loyaponile utamwa wa heye, nakandika lwimbo alu lwa malumbo,

10 Nandijesa kota kulutilila goya kuli ukomu wa kikala kwa heni,

ndaze, nanganigwa kukola kuli lwizi lwa kubagama,

na kusukuligwa ukomu wa heni usigale?

11 Nandonga kota siweza kumona kahi Mkulu Nguluwi,

kuli isi ya wawele wakomu,

ne siweza kumona munhu yoneche kahi,

hali wenyeng'haye wa kuli isi.

12 Kota ihema lya yalingudima migongolo,

ng'handa ya heni naibomoligwa na kuholigwa kulawa kwa heni.

Nandiubinabina ukomu wa heni, kota yalingutawa nguwo,

naye nakandumula na kunhaga kutali.

Nguluwi nakaudumya ukomu wa heni nemisi na nechilo.

13 Nechilo yeng'ha nandali ndilila kwa usungu,

kota isimba, nakabenanga mizeje ja heni.

Nandijesa kota Nguluwi nakaudita ukomu wa heni umale.

14 Nandali ndilila kota chideje chilinguchemigwa mbayuwayu ama kolongo,

nang'ung'uta kota ng'hunda.

Meho ga heni nagabilabila kwa kulola kuchanya kilanga.

Gwa Mkulu Nguluwi, ndangugazika, uye unhanze!

15 Ila ndonje choni?

Mkulu Nguluwi nakagadita aga.

Lelo, ndojenda kwa kunyenyetela,

kuli ukomu wa heni weng'ha,

kwa chiwalo cha awu usungu ung'hang'hale,

kuli nhumbula ya heni.

16 Gwa Mkulu Nguluwi, wanhu wangikala kwa kiwhana na geng'ha gouditile,

nayo nhumbula ya heni yangupataga ukomu kuli mbuli azo kahi.

Nakundohola na kundita ndikale.

17 Namhata magazo gang'hang'hale kwa chiwalo cha mzidi wa heni,

ila nakuulohola ukomu wa heni,

kulawa kuli ikulubila lya kuwifya,

kwa vila nakugataga gehile ga heni,

kumbele kwa hegwe.

18 Kwa vila kuli isi ya wabagame hakuweza kukutogola,

yabagame halinguweza kwimba lutogo lwa hegwe,

ne wala walingudulika kuli chilaga,

hawalingitumbila kuli kukundigwa kwa hegwe.

19 Wawele wakomu ndo walingukutogola,

kota vyondilingudita lehano.

Wahaza wanguwalonjelaga wana wa hewo,

mbuli za kugoloka kwa hegwe.

20 Mkulu Nguluwi kondohola,

natwe tomtogola kwa nzimbo na ving'hweleng'hwele,

mazuwa geng'ha ga ukomu wa hetwe,

kuli ng'handa ya Mkulu Nguluwi.

21 Isaya nayali yalonjile, "Mgongomanye mikwandi ja tini, hamba mjiwiche kuli lipu, naye kopona."

22 Hesekiya nayali yauzile, "Kowa na ulajilo wachi kota ndoluta kuli ng'handa ya Mkulu Nguluwi?"