1 Usenga kuwala Babuloni uwele Isaya, mwana wa Amosi nakalajilwa na Nguluwi kuli uloli ndo awu.

2 Nguluwi kangulonga,

"Muwiche bendela mchanya mwa chidunda chilihela migodi,

muwatowele iyowe wamizi,

muwalajile wanhu moko,

leka wenjile kuli lwizi lwa muji lwa wakulu.

3 Nandiwalajiza wawele chiuyeng'ha wa heni,

nandiwachema wazidahe wa heni, leka weneze ng'halazi ya heni,

wala walingusangalala kwa chiwalo cha kusumya kwa heni."

4 Mhulichize iyowe mchanya mwa chidunda,

kota lila lya lung'hongola lukulu lwa wanhu!

Mhulichize iyowe hagati ha undewa,

kota wanhu wa isi walingikungajiza hamwe!

Mkulu Nguluwi Yawele na Mong'ho,

kangukungajiza wamizi kwa chiwalo cha ngondo.

5 Wanguya kulawa kuli isi za kutali,

kulawa kuli isi za kutali ng'hatu,

Mkulu Nguluwi yawele na vinhu vya kitowela ngondo vya ng'halazi ya heye,

kanguya kuidumya isi yeng'ha.

6 Mlombocheze, kwa vila zuwa lya Mkulu Nguluwi lya habehi,

lyokuya kota kuwifya kulawa kwa Nguluwi Yawele na Ludali.

7 Kwa chiwalo acho, moko ga chila munhu gokwisilwa mong'ho,

chila munhu kotweguka nhumbula.

8 Wanhu wotigaswa,

wowa na lunhwinhwi na usungu,

wowa na usungu kota mdala yawele habehi kuponda.

Wochilola kwa lunhwinhwi,

kumeho kwa hewo kolajila kudumba.

9 Mlole, zuwa lya Mkulu Nguluwi lyanguya,

zuwa lihile liwele na kuzudila na ng'halazi ing'hang'hale.

Zuwa alyo lyoidita isi iwe uchiwa,

lyowadumya wanhu wawele na gehile wawele mgati mwake.

10 Nhondwe za kilanga na vilundo vya nhondwe havilavya lumuli,

Isanya holilawa lyotiligwa jiza,

na nyelezi hailavya lumuli lwake.

11 Mkulu Nguluwi kangulonga hino,

"Ndomzapa chila munhu kuli isi kwa chiwalo cha wihe wa heye

na wehile kwa chiwalo cha gehile ga hewo.

Ndokusa kidaya kwa mwihe,

ndodulisa ujuvi wa wanhu wawele na nhumbula zihile.

12 Wanhu wasulupuche ndowadita wawe wachefu kusinda zahabu inojile,

wowa wopaligwa ng'hatu kusinda zahabu ya Ofili.

13 Ahyo ndoudita ulanga ukakame,

isi nayo yotigasika kuli misisi jake,

kwa chiwalo cha kuzudila kwa heni Mkulu Nguluwi Mbele na Mong'ho,

kuli zuwa lya ng'halazi ya heni ilingwaka.

14 "Kota ibala lilingupelembwa,

kota ming'holo jilihela mdimi,

chila yumwe kochilumba na wanhu wa heye,

chila yumwe kobilimila kuli isi ya heye.

15 Yoneche hoyobatigwa kotuligwa lida,

weng'ha howobatigwa wokopoligwa kwa ipanga.

16 Vyali vya hewo vyohondangwa hali hewo,

ng'handa za hewo zoholigwa na wowasa na wache wa hewo kwa lupichi.

17 "Ulole, ndowambuza Wamediya kuwatowa Wababuloni,

Wamediya wawele wahela maya ga sendi,

ne kusangalala kwa chiwalo cha zahabu.

18 Misale jawo jowakopola wasongolo,

hawowa na isungu kwa vyali,

ne kuwalola wana kwa isungu.

19 Muji wa Babuloni, ukulu wa undewa weng'ha,

na kuzeleka kwa ujuvi wa Wakalidayo,

wowa kota miji ja Sodoma na Gomola,

mhela heni, Mkulu Nguluwi londijidumile.

20 Haduhu yawele kochikala Babuloni.

Haduhu Mwalabu yawele kowika ihema lyake ako,

ne mdimi yawele kodima vilundo vya migongolo jake ako.

21 Ila vilumbigwe vya kuchiwala vyowasa ako,

mibwa ja kisolo jomema kuli mahame ago,

mituwe jochikala amo,

nazo mhelele zodawala amo.

22 Mibwa ja kisolo jolila mgati mwa ngome zake,

mikanhu jowa mgati mwa ng'handa za sendi nyinji.

Mhela wake naufika

mazuwa gake hagokonjezwa."