1 Wone wahatulile ulanga na kudulika hasi,

vidunda vyahakakame hali hegwe!

2 Uwe kota ilapi lya chiluli vyolilingwaluchiza chiluli,

na kwambuza mazi kuhemla,

ahyo wang'honyo wa hegwe wokuzela hegwe kwa whaani,

na wanhu wa isi zeng'ha wokakama,

kwa chiwalo cha hegwe kuwa habehi.

3 Mhela louditile mbuli za kukabusa ziwele hatujesile kuzona,

nakudulika, navyo vidunda navikakama hali hegwe.

4 Kulawa katali haduhu yoneche yawele nakawahika kumona,

haduhu ikutu liwele nalihulika mbuli za Nguluwi yunji, ila hegwe,

ulingudita mbuli kwa chiwalo cha wala walingitumbila kwa hegwe.

5 Kwanguwatanza wala walinguhulichiza kwa kusangalala,

na kudita vyoulingugana,

ila gehile gangukudita uzudile.

Kwa utanzi wa hegwe hela ndo toweza kuloholigwa.

6 Tweng'ha twa wakokomoche, hatulinguganigwa kukufugamila,

madito ga hetwe geng'ha ganojile ndo kota ivalo liwele na wavu.

Kwa chiwalo cha gehile ga hetwe,

twanguswinha kota mahamba,

na kuwembeluswa na mbeho.

7 Haduhu ne yumwe yalinguya kukulanda,

ne yalingitunya kukupala.

Kwangukuvisa kumeho kwa hegwe kutali na hetwe,

nakutuleka tuwe ng'hochele, leka tulemwele kuleka gehile ga hetwe.

8 Ila, gwa Mkulu Nguluwi, hegwe ndo mhaza wa hetwe.

Hetwe ndo ilongo na hegwe ndo yalingulumba vinhu vya ilongo.

Hetwe tweng'ha ndo mijito ja moko ga hegwe.

9 Gwa Mkulu Nguluwi, uleche kutuzudila lukami,

ne kukumbuchila gehile ga hetwe mazuwa gose.

Twangukulanda ukumbuchile kota hetwe tweng'ha ndo wanhu wa hegwe.

10 Miji ja hegwe jelile najiwa chiwala,

muji wa Yelusalemu nauwifigwa na kuwa mahame.

11 Ng'handa ya Nguluwi wa hetwe inojile na yelile,

honhu hawele wasekulu wa hetwe nawakutogola hegwe,

nahalakazwa kwa chiluli.

Vinhu vya hetwe vyeng'ha vinojile naviwifigwa.

12 Ndaze, kwa aga geng'ha, kochilemeza uleche kudita chinhu?

Kolutilila kunyamalila hela, gwa Mkulu Nguluwi,

na kutugaza lukami?