1 Mkulu Nguluwi kangulonga,

"Nandiwika goya kuhulika mbaka kwa wanhu wawele hawalinguuza mbuli za heni,

na kuwabochela wanhu wawele hawamhalile.

Kwa wanhu wa isi wawele hawalichemile itagwa lya heni,

nandonga, ‘Nda hano! Nda hano.’

2 Nemisi yeng'ha nangolola moko ga heni kuwabochela,

wala wawele nawambelenhuka heni,

walingujenda kuli nzila zihile,

wawele walinguwinzaga majesa ga hewo wawo,

3 wanhu wa isi walingunzudizaga,

wangujilavilaga nhambiko milungu ja hewo kuli kagunda,

na kujifunyizila ubani kuli honhu ha kulavila nhambiko.

4 Walingikalisaga kuli vilaga leka kulongasa na mihoka,

na kuli honhu ha kivisa mhela wa nechilo,

wangulyaga miwunde ja migubi,

na viya vya hewo vina mhuzi wa miwunde jikokomoche,

5 wanguwalonjelaga wala walingiting'hana nawo,

‘Mikale kutali na heni,

mleche kuwa habehi na heni kwa vila heni ndo yelile kusinda hegwe!’

Wanhu kota awo wangunzudiza ng'hatu,

ng'halazi ya heni ndo kota chiluli chohambe chizimye.

6 "Nanyamula kuwagaza hewo,

na utaguso wa hewo nawandichigwa.

Siweza kunyamalila kuwala chowaditile,

ila ndowadita wahilule kwa kiwhana na gehile ga hewo.

7 Heni Mkulu Nguluwi, ndowahilulila chibida kwa chiwalo cha gehile ga hewo,

na gehile ga wasekulu wa hewo.

Nawandiga kwa kujifunyizila ubani milungu ja hewo kuli vidunda,

aho, ndowadita walipe kwa winji,

kwa kiwhana na madito ga hewo."

8 Mkulu Nguluwi kangulonga hino kahi,

"Wone munhu yachifiche chizabala cha zabibu zinojile,

wanhu wangulongaga,

‘Tuleche kuchiwifya, china utambichizo.’

Ahyo ndo vyondidita kwa chiwalo cha vitumagwa wa heni,

kwa vila hana wanhu wamwenga kuli Yuda,

walingung'holela mijito kwa kukundigwa,

siwadumya weng'ha.

9 Ndowahagula wanhu wa Isilaeli na Yuda,

na ndowatambichiza leka wawe na walelwa wenji.

Wochikala hano kuli isi ya vidunda,

nayo yowa ya hewo.

10 Hamba ibindi lya Shaloni lyowa honhu ha kudila ming'holo.

Ibindi lya Akoli lyowa honhu ha kwesela ha misenga.

Avi vyeng'ha vyowa kwa chiwalo cha wanhu wa heni,

kwa chiwalo cha wanhu walingumhala.

11 "Ila ndodita choni na hemwe,

mlingundeka heni Mkulu Nguluwi,

wohambe mijese kuwala Siyoni, chidunda cha heni chelile,

hemwe mlingumfugamila mlungu ‘Gadi*,’

na mwangumlavila nhambiko ya divai mlungu ‘Meni*?’

12 Nandiwawichila hemwe kubagama kwa ipanga,

mweng'ha mochinamiza kuli honhu ha kudumulila singo,

kwa vila hamnyhidichile londiwachemile,

londonjile hamnyhulichize.

Namdita gehile hali heni,

namhagula gala gawele silingugagana."

13 Ahyo, heni Mkulu Nguluwi ndangulonga,

"Vitumagwa wa heni wolya

ila hemwe wehile mokona nzala,

vitumagwa wa heni wonwa,

ila hemwe mowa na ng'halu,

vitumagwa wa heni wosangalala,

ila hemwe modeula.

14 Vitumagwa wa heni wokwimba na kusangalala,

ila hemwe mowa na masinzo na molila kwa usungu.

15 Ndowapa itagwa linyale wala wawele nandiwahagula,

ila itagwa lya hemwe lyolonjigwa kwa chiwalo cha kupanjila hela,

wolonga, ‘Mkulu Nguluwi yawakopole kota awo wehile.’

16 Yoneche kuli isi yalingulanda utambichizo,

kotambichizwa na Nguluwi wa kukomya.

Yoneche yalingugana kilaha,

kochilaha kwa itagwa lya Nguluwi wa kukomya,

kwa vila magazo ga katali gokola na kusemwigwa.

17 "Lelo, ndolumba ulanga unyale na isi inyale,

mbuli za katali hazikumbuchilwa kahi.

18 Msangalale, mlutilile kusangalala mazuwa gose,

kwa chiwalo cha vinhu viwele ndovilumba.

Muji wa Yelusalemu ndoudita uwe wa kunojeza,

na wanhu wake wosangalala.

19 Nani ndosangalala kwa chiwalo cha muji wa Yelusalemu,

na kwa chiwalo cha wanhu wa heni.

Lizi lya chililo haluhulikwa kahi,

kulombocheza na magazo havyowa amo.

20 Vyali havibagama,

wasekulu hawobagama kung'hali mhela wa hewo kufika.

Wone munhu kobagama yawele na miyaka makumi kumi,

kowa nakabagama yang'hali msongolo,

ila wone kobagama yang'hali kuwa na miyaka makumi kumi,

ayo kowa nakapanjilwa.

21 Wanhu wa heni wozenga ng'handa na kikala amo,

wonyhala mizabibu na kulya mafuza gake.

22 Hawozenga ng'handa leka wekale wanhu wanji,

ne kunyala nyhadikwa leka mafuza gake walye wanhu wanji.

Kwa vila wanhu wa heni wondiwahagule,

wochikala miyaka minji lukami,

wosangalala kwa chiwalo cha mafuza ga chituguti cha hewo.

23 Mijito ja hewo hajiwa ja hihi hela,

ne kuponda wana leka wafichigwe na mbuli zihile,

kwa vila wowa watambichizwe na Mkulu Nguluwi,

hewo hamwe na walelwa wa hewo.

24 Lowowa wang'hali kunyhema,

ama kundanda, ndowa ndiwedichile.

25 Mibwa ja kisolo na ming'holo myana jolya hamwe,

misimba jolya misolo kota misenga,

ila nhimbwisi yowa chilyo cha mizoka.

Hajiweza kumluma ama kumdumya yoneche,

kuli chidunda chelile cha heni cheng'ha.

Heni Mkulu Nguluwi nandonga."