1 Mhiliche ming'holo myana kota ushulu,

kwa mndewa wa isi ya Yuda,

kulawa Sela kukolela kuchiwala,

mbaka kuli chidunda cha Siyoni.

2 Kota videje vyovilingusumajila na kugulukaguluka,

viwele naviwinjigwa kuli vimvulila vyawo,

ndo vyowawele wadala wa Moabu,

kuli honhu ha kulochela ha Alinoni.

3 Wanhu wa Moabu wanguwalonjela wanhu wa Yuda,

"Mlongoze na kwamula kuwala hetwe.

Mhela wa nemisi mtwamile kota igodi vyolilinguwika isisila.

Kota vila nechilo vyoilingweneza chisisila chake,

mtuvise kwa vila natubilima kuli isi ya hetwe,

mleche kutulema tuwele natuwinjigwa.

4 Muwaleche wanhu wa Moabu wawele nawasulupuka wekale hali hamwe,

muwe honhu ha hewo ha kubilimila leka kumbilima yalingudumya."

Kudumya komala wone yalingugaza kodumigwa,

yalingigala ngondo kokwajilila kuli isi.

5 Kwa igano lya kwimilila, chigoda cha undewa chowichigwa nzinzili,

munhu kochikalisa mchanya mwake na kulongoza kwa kugoloka,

heye yalingulawa kuli ivyazi lya Daudi,

heye yawele kuli kutagusa kangupalaga hachi,

na kukudita kutanganika kulutilile.

6 Wanhu wa Yuda wangulonga hino,

"Natuhulika mbuli za ujuvi wa Moabu,

ujuvi wake wa kidaya na uhadi,

ila kidaya kwake hakulingutanza chinhu."

7 Wanhu wa Moabu wangulila,

kwa chiwalo cha magazo galinguwafika.

Weng'ha wangulila kuno wokumbuchila chilyo chinojile,

chiwele nawali wolya kuli muji wa Kili-heleseti.

8 Migunda jiwele habehi na Heshiboni na migunda ja mizabibu ja Sibuma janguwifigwa,

vilongozi wa wanhu wa isi nawajibiga jila mizabibu jinojile lukami.

Katali mizabibu najenela mbaka kuli muji wa Yaseli,

na mbaka kolilawilaga isanya kulutila kuli chiwala,

na mbaka kolizinjilaga isanya, ubanzi uyage wa Bahali ya Mwino.

Najifika mbaka kumwambu mwa bahali.

9 Lelo ndangulila hamwe na muji wa Yaseli,

kwa chiwalo cha mizabibu ja Sibuma.

Mahozi gangulagala kwa chiwalo cha miji ja Heshiboni na Eleale.

Kwa vila kwa haduhu mbena zilinguwadita wanhu wasangalale.

10 Haduhu yoneche yalingusangalala kuli migunda jiwele na mboto.

Haduhu yoneche yalingutowa iyowe ama kwimba kuli migunda ja mizabibu.

Haduhu yoneche yalingukama zabibu kuli honhu ha kukamila,

kwa vila Nguluwi nakawadita wanyamalile.

11 Muhe wa heni wangulombocheza kwa chiwalo cha Moabu, kota ching'hweleng'hwele,

na kwa nhumbula ya heni yeng'ha, kwa chiwalo cha Kili-heleseti.

12 Hailingutanza chinhu kwa wanhu wa Moabu,

kitunya kwa kuluta kuli honhu ha kulavila nhambiko ha hewo,

kwa chiwalo cha kulanda na kufugamila.

13 Awu ndo ulonzi uwele Mkulu Nguluwi nakalonga kuwala Moabu. 14 Lelo Mkulu Nguluwi kangulonga hino, "Kuli mhela wa miyaka jidatu, ne kupuluta ama kupungula, lufufu lukulu lwa Moabu lokwajilila. Hanga wanhu wake ndo wenji, wosigala wachefu na wowa ng'hochele."