1 Mkulu Nguluwi kangulonga,

"Gwa Babuloni, uduliche kulawa kuli chigoda cha hegwe cha undewa,

wikalise hasi kuli nhimbwisi.

Hegwe nawali kota yohanating'hana na mlume,

muji uwele haunawahika kusumigwa,

ila sambi hauchemigwa kahi udedemche ama unojile.

2 Uhole maganga ga kubalasa, ubalase nyhule,

uvule shela ya hegwe na mivalo ja hegwe ja chiundewa,

kota kwangiwika goya kuloka nzanda kwa magulu.

3 Wanhu wowona umwanzi wa hegwe,

ena, woyona soni ya hegwe.

Ndohilula chibida,

simonela isungu yoneche."

4 Mgombozi wa hetwe ndo Yelile wa Isilaeli,

Mkulu Nguluwi Yawele na Mong'ho, ndo itagwa lya heye.

5 Mkulu Nguluwi kangulonga,

"Gwa Babuloni, wikalise kuli jiza na winyamalile,

kwa vila wanhu hawolonga kahi kota hegwe ndo mndewa wa chidala uwele kolongoza hali undewa wunji.

6 Nandiwazudila wanhu wa heni Waisilaeli,

na kuubasa soni uhalizi wa heni.

Nandiwawika mmoko mwa hegwe,

nagwe huwonele isungu,

mbaka nakuwadwika wasekulu itunyo ikulu ng'hatu.

7 Nakilonjela mnhumbula, ‘Ndolutilila kuwa mndewa wa chidala mazuwa gose.’

Ila hawijesile mbuli azi zilingulawila,

ne chila chiwele cholawila hamba.

8 "Ahyo lelo, uhuliche gwa ulinguhulichiza maya geng'ha ga lukuli lwako,

hegwe ulingijesa kota kuna kikala goya,

na kilonjela, ‘Ndo heni ndiliyeka,

haduhu yunji ila heni.

Mazuwa gose siweza kufililwa na mlume,

ne wana wa heni.’

9 Aga geng'ha meli gokufika,

baho du kuli zuwa limwe.

Kofililwa wana wa hegwe na kofililwa na mlume wa hegwe,

hanga kwa mhawi ng'hatu na kwangulagula lukami.

10 "Nakijesa kota kwa kuli kikala goya kuli wihe wa hegwe,

nakilonjela, ‘Haduhu munhu yalingumbona.’

Luhala na uwanzi wa hegwe navikwajiliza,

nakilonjela mnhumbula ya hegwe, ‘Ndo heni,

haduhu yunji yanojile kusinda heni.’

11 Ila kubagama kokufika

kuwele hauweza kiwika kutali.

Mbuli zihile zokufika,

ziwele hauweza kitwanza nazo,

kudumigwa kukulu kokufika,

kuwele hauweza kulagula.

12 Lelo ulutilile na ulaguzi wa hegwe,

na winji wa uhawi wa hegwe.

Hegwe nakunuwila ago kulawila kuli usongolo wa hegwe,

hanji kokweneza gounuwile,

ama hanji kokwambuza lunhwinhwi kwa wanhu.

13 Utanzi weng'ha wouubochele, naukutunya hihi hela.

Walingulola nhondwe wa hegwe woye kumwando,

wala walingulola goya nhondwe na kulavya uloli kuli chila mwezi,

wawalohole hemwe kulawa kwa lilinguya mchanya mwa hemwe.

14 "Ukumbuchile, hewo ndo kota mibeleje jikalile,

chiluli chowalakaza.

Hawalinguweza kilohola hewo wawo,

kulawa kuli chiluli acho ching'hang'hale.

Chiluli acho hachiwele kwa chiwalo cha kulavya chipute,

hachiwele chiluli cha kotela.

15 Ndo vyowowa awo ulinguwatumbila,

awo uwele nakitunya kwa chiwalo cha hewo kulawila usongolo wa hegwe.

Wolubaluba chila yumwe na nzila ya heye,

haduhu ne yumwe yawele koweza kukulohola."