1 Awu ndo usenga wa Nguluwi ulinguwala muji wa Tilo.

Mlombocheze, hemwe meli za Talishishi,

kwa vila muji wa Tilo nauwifigwa,

naulechigwa ne ng'handa ne bandali.

Usenga awu mouhulika kwaluchila kuli isi ya Kitimu.

2 Mnyamalile, hemwe mlingikala mhwani,

ena, mlombocheze hemwe mlingugula na kuguza vinhu ako Sidoni,

walingudaha kojelela wa hemwe nawaumemeza muji kwa lufufu.

3 Walingugula na kuguza vinhu wa hemwe nawali mmajendo kwa kukolela kuli bahali,

wopala lufufu lwa hewo kulawa kwa wanhu wa isi zinji.

Nawegala nyhule iwele naibetigwa hafungo ha lwanda lwa Naili.

4 Ubasigwe soni gwa Sidoni,

muji uwele hafungo ha bahali,

kwa vila bahali naiwalema hemwe kwa kulonga,

"Siwahiche kuwa na usungu wa kuponda,

ahyo wano hawawele wana wa heni!"

5 Mbuli ayi hoifika kuli isi ya Misili,

kota muji wa Tilo naudumigwa,

Wamisili wowa na masinzo ng'hatu.

6 Mlombocheze hemwe wenyeng'haye wa mhwani,

mjeze kubilimila Talishishi.

7 Ndaze, awu ndo muji wa hemwe wa Tilo uwele naumema kusangalala,

muji uwele nauzenjigwa katali ng'hatu,

uwele meli zake naziwahola walingudaha kojelela na walingugula na kuguza vinhu wake,

na kuwahilika kuli isi za kutali kwa chiwalo cha kikala ako?

8 Whaani yanuwile kuuditila muji wa Tilo mbuli ayi,

muji wa chiundewa,

uwele walingugula na kuguza vinhu wake ndo wakulu ng'hatu,

wawele na lutogo kuli isi yeng'ha?

9 Mkulu Nguluwi Yawele na Mong'ho ndo nakanuwila mbuli ayi,

leka kuwifya kidaya kwa hewo,

na kuwabasa soni wala weng'ha walinguzeleka lukami muisi.

10 Wanhu wa muji wa Tilo, bandali za hemwe nazidumigwa!

Lelo mwanguganigwa muwe walimi kota wanhu wa Misili.

11 Mkulu Nguluwi nakagolola moko wa heye mchanya mwa bahali,

nakazidita isi zinji zikakame.

Nakalavya ilajizo kuwala isi ya Kanaani,

kota ngome zake zidumigwe.

12 Nakalonga, "Gwa mhinza Sidoni hauweza kahi kudita mnvina,

hanga kobilimila Kitimu,

ako kahi haupata kwesela!"

13 Ulole kuli isi ya Wakalidayo, wanhu wano wawele sambi hawalingoneka kota wabaha. Waashulu nawaidita isi ayo iwe kota honhu ha vilumbigwe vya kuchiwala. Nawagongomanya milingo kwa chiwalo cha wamizi leka waloche lukanzi lwa muji wa Babuloni leka kuutowa, nawazihola ngome na kuzileka zilihela chinhu na kuudita muji uwe mahame.

14 Mlombocheze hemwe meli za Talishishi,

kwa vila bandali ya hemwe naidumigwa.

15 Aho muji wa Tilo wosemigwa kwa mhela wa miyaka makumi saba, uwele ndo mhela wa ukomu wa mndewa. Ila kuli kuduma kwa miyaka ajo makumi saba, muji wa Tilo wozenjigwa kahi. Achi ndo cholawila, wowa kota mng'hondwa kuli lwimbo lulinguhulikwa hino,

16 "Uhole ching'hweleng'hwele cha hegwe,

ujendejende kuli muji weng'ha,

gwa mng'hondwa usemwigwe!

Wimbe zimbo zinojile,

wimbe zimbo nyinji leka ukumbuchilwe kahi."

17 Hojimala miyaka ajo makumi saba, Mkulu Nguluwi kowonela isungu muji wa Tilo kota hamwande. Walingugula na kuguza vinhu wake wopegwa kahi sendi nyinji kwa chiwalo cha kugula vinhu vinji, wovihola na kuvihilika vinhu avyo kwa wanhu wanji wa isi zinji. 18 Mzidi wa sendi zowopata zolavigwa kwa Mkulu Nguluwi. Hawoweza kuzihola sendi azo kwa chiwalo cha hewo, ila watambika wa Mkulu Nguluwi ndo wotumiya kwa kugulila chilyo cha kuhega na kugula mivalo jinojile.