1 Mkulu Nguluwi kangulonga,

"Towa iyowe ne kilemeza,

ulandule lizi lya hegwe kota mhalamanda.

Uwikule nongwa za wanhu wa heni,

walonjele walelwa wa Yakobo gehile ga hewo.

2 Kwa vila chila zuwa wangumhala heni,

wangugana kuzizela nzila za heni,

kota vila hewo ndo wanhu wa isi walingudita mbuli za hewo kwa hachi,

wanhu wa isi wohambe wasemwe malajizo ga heni, Nguluwi wa hewo.

Wangugana nyamule kwa hachi,

na kugana kikala habehi na heni.

3 "Mwangulonga,

‘Twangwesela kulya ila hegwe haulingutulola!

Twangunyenyetela hali hegwe ila haulingijesa kuwala hetwe!’

Ila, ndikomya kuli zuwa lya kwesela kulya kwa hemwe, mwangudita vyomlingugana,

na kuwabunza wakola mijito wa hemwe.

4 Mwangwesela kulya kahi mwangilewa na kitowa.

Kwa kudita ahyo, mwangijesa kota kulanda kwa hemwe,

kofika kwa heni kilanga?

5 Ndaze, aku ndo kwesela kulya kondikuhagule,

zuwa limwe hela kwa munhu kunyenyetela?

Ndaze, kwa kinamiza mutwi kota idete,

na kuwasa mchanya mwa migunila na mivu kwa masinzo?

Ndaze, alyo ndo mwangulichema zuwa lya kwesela kulya lilingukundigwa na heni, Mkulu Nguluwi?

6 Hebu! Kwesela kulya kondilingukugana ndo aku,

kuwadoholela wawichigwe mchinweng'ho ne hachi,

kusa minyololo ja upogozi kwa wanhu,

kuwapa kilejeha walingukola mijito kwa lupichi,

na kubena chila ngwamo.

7 Kwesela kulya kwa kukomya ndo kuwagawila chilyo cha hegwe wawele na nzala,

kuwalalika kaye kwa hegwe wazunwa walihela honhu ha kikala,

kuwapa mivalo walihela na kuwatanza wang'holozo.

8 "Wone mdite ahyo mopulika kota kubwemwenzuka,

mopona himahima.

Madito ga hemwe ganojile gowalongola hemwe,

na ukulu wa heni Mkulu Nguluwi, wowamila hemwe.

9 Aho ndo homlanda,

nani, Mkulu Nguluwi ndowedichila,

molila kwa lizi kulanda utanzi, nani ndowedichila, ‘Nda hano!’

Homleka kubunza hali hemwe,

homleka kuwabeza wanji,

homleka kulonga wihe,

10 homuwapa chilyo kwa isungu wawele na nzala,

homkweneza galinguganigwa kupata kwa walihela chinhu,

lumuli lowalangazila mhela wa jiza,

jiza lya hemwe lyowa kota nemisi.

11 Heni Mkulu Nguluwi ndowalongoza hemwe mazuwa gose,

ndokweneza gomlingugana mhela wa magazo na mhela wa kugunuka,

ndowadita muwe nzinzili kuli ng'huli za hemwe,

mowa kota kagunda kalinguboholelwaga mazi,

kota nzasa ya mazi iwele mazi gake mazuwa gose hagalingukala.

12 Mahame ga hemwe ga katali gozenjigwa kahi,

mozenga unyale kuli misisi jilechigwe katali,

mochemigwa wanhu wagongomanyile kahi ng'hanzi,

waziditile nzila za muji leka wanhu wakole kahi.

13 "Wone mleche kukola mijito kuli zuwa lya Kwesela,

na kudita choneche choulingugana kuli zuwa alyo lya heni lyelile,

wone mlidite zuwa lya heni liwe lya kusangalala,

wone mlihulichize zuwa lyelile lya heni, Mkulu Nguluwi,

wone mleche kudita vyomlingugana na kuleka kulonga upoka,

14 mopata kusangalala kwa hemwe kuli heni, Mkulu Nguluwi,

ndowapa kusumya kuli chila kitwanza kuli isi,

ndowapa uhalizi wa Yakobo, sekulu wa hemwe.

Heni Mkulu Nguluwi nandonga."