1 Kota nhagala inyale kuli chibichi cha igodi,

kolawila mlelwa wa mndewa Daudi yawele kowa mndewa.

2 Muhe wa Mkulu Nguluwi wochikala mchanya mwake,

muhe wa luhala na kuvizela ng'hatu,

muhe wa ulonzi unojile na mong'ho,

muhe wa uwanzi na kumdumba Mkulu Nguluwi.

3 Kusangalala kwa heye kowa kuli kumdumba Mkulu Nguluwi.

Hotagusa kwa kuwinza gala hoyogona kwa meho ga heye,

ne kwamula kwa kugawinza gala goyohulika kwa makutu ga heye,

4 ila kwa kutanganika kowapa hachi wazunwa,

kowahulichiza na kokwamula goya hali walingunyenyetela muisi.

Kwa ulonzi wa heye, koizapa isi,

kwa lweselo lwa mlomo wa heye, kowakopola wehile.

5 Hachi yowa kota isali lya kiwoha,

kugoloka kochikala naye kota isali mchuno mwa heye.

6 Libwa lya kisolo lyochikala hamwe na ing'holo lyana kwa kikala goya,

iduma lyowasa hamwe na chinyehe.

Milogota na lyana isimba jolya hamwe,

mwana mdodo kojilongoza.

7 Isenga na idubu jolya hamwe,

milogota na myana ja idubu jowasa hamwe,

na isimba lyolya misolo jikalile kota isenga.

8 Chali chodawala kuli isimo lya izoka,

mwana koweza kwinjiza moko,

kuli isimo lya izoka liwele na dunga.

9 Hawoweza kuwalumiza ne kuwadumya,

mchanya mwa chidunda cha heni cheng'ha chelile,

kwa vila isi yomema wanhu walingumzela Mkulu Nguluwi,

kota vila mazi vyogalingumemeza bahali.

10 Zuwa alyo, mlelwa wa mndewa Daudi kowa kota bendela kwa wanhu wa isi. Wanhu wa isi wompala na haluga hake howa na lutogo. 11 Zuwa alyo, Mkulu Nguluwi kogolola moko wa heye leka kuwahilula kahi wanhu wa heye wawele nawasigala ako Ashulu na Misili na Patilosi na Kushi na Elamu na Shinali na Hamati na honhu ha mhwani.

12 Mkulu Nguluwi kolavya ulajilo kwa wanhu wa isi,

kuwakungajiza Waisilaeli wawele kuli isi za chijenzi,

kowakungajiza wanhu wa Yuda wasambaluche,

kulawa kuli banzi zeng'ha za isi.

13 Fihi ya Isilaeli kwa Yuda yoduma,

kowa haduhu ung'honyo hali hewo,

Isilaeli howeza kumwonela fihi Yuda,

ne Yuda howeza kuwa mng'honyo wa Isilaeli.

14 Weng'ha hamwe wowavaba Wafilisti wawele kolizinjilaga isanya,

hamwe wowasukula wanhu walingikala kolilawilaga isanya.

Wowasumya Waedomu na Wamoabu,

Waamoni wowahulichiza hewo.

15 Mkulu Nguluwi koikaza guba ya bahali ya shamu iwele Misili,

kwa lweselo lwake lulingulakaza, kokaza lwanda lwa Eyufulate,

nawo wogawanuka kuli vikolola saba,

leka wanhu waloche amo ne kudoda magulu.

16 Kowa na nzila ng'hulu kulawa Ashulu,

kwa chiwalo cha wanhu wa heye wasigale,

kota vyoiwele kwa Waisilaeli,

mhela vyowalawile kuli isi ya Misili.