1 Mhela mndewa Ahasi, mwana wa Yotamu, mwana wa Usiya, loyawele mndewa wa Yuda, mndewa Lesini, wa Alamu na Peka, mwana wa Lemaliya, mndewa wa Isilaeli, nawaluta kuutowa muji wa Yelusalemu, ila hawawezile kuuhola. 2 Mndewa wa Yuda loyahuliche kota Waalamu nawelumba na Waefulaimu, heye hamwe na wanhu wake weng'ha wa Yuda nawadumba na kukakama kota migodi ja kuchihulo jilingutigaswa kwa mbeho. 3 Mkulu Nguluwi nakamlonjela Isaya, "Hegwe na mwanago Sheali-Yashubu mlute kiting'hana na mndewa Ahasi. Komfika mnzila hawele hana wanhu walingugongomanya nguwo, kuli kuduma kwa chikolola chilingigala mazi kulawa kuli ilamba lya kuchanya. 4 Mlonjele yelolele goya na yasindamale na yaleche kudumba. Yaleche kutweguka nhumbula kwa chiwalo cha wanhu awa weli wawele kota vibichi vya ngodi vilingufung'ha iyosi. Chiluli cha ng'halazi ing'ang'ale ya Lesini wa Alamu na ya mwana wa Lemaliya cha habehi kuzimya. 5 Kwa vila nawewika goya leka kukudumya kuno wolonga, 6 ‘Tulute kuivaba isi ya Yuda, tuwadite wanhu wawe na lunhwinhwi leka tuihole isi na tumuwiche mwana wa Tabeeli leka yawe mndewa wa hewo.’

7 "Ila heni Mkulu Nguluwi ndangulonga kota,

mbuli ayi haikoleka ne kulawila,

8,9 kwa vila muji ukulu wa Alamu ndo Damasiko,

na ayo Lesini ndo chilongozi wa Damasiko hela.

Muji ukulu wa Efulaimu ndo Samaliya,

na mwana wa Lemaliya ndo mkulu wa Samaliya hela.

Kuli miyaka makumi sita na jihano jilinguya,

ulongozi wa Efulaimu wowifigwa,

Efulaimu haiweza kuchemigwa isi kahi.

Wone makundo ga hemwe hagowa nzinzili, hamuweza kwimilila."

10 Mkulu Nguluwi nakalajiza usenga wunji kwa mndewa Ahasi kwa kukolela Isaya, ulingulonga, 11 "Mlande Mkulu Nguluwi, Nguluwi wa hegwe yakupe ulajilo, hanji uwe kulawa mgati ng'hatu ama kulawa kuchanya ng'hatu." 12 Ila Ahasi nakedichila, "Silanda ulajilo! Silingugana kumjeza Mkulu Nguluwi."

13 Lelo Isaya nakalonga, "Uhulichize lelo hegwe ivyazi lya Daudi! Ihega kuwajeza wanhu. Dedede, mleche kumjeza Nguluwi wa heni. 14 Ahyo, Mkulu Nguluwi kowapa ulajilo. Mhinza kowa na himila na koponda mwana mlume, naye komchema itagwa lyake Imanweli*. 15 Kolya jibini na hanombwa mbaka hoyoweza kulema gehile na kuhagula ganojile. 16 Ila mhela mwana hoyowa yang'hali kuvizela kulema gehile na kuhagula ganojile, isi za wandewa awo weli ulinguwadumba zowa mahame. 17 Mkulu Nguluwi kokugalila hegwe hamwe na wanhu wa hegwe na ivyazi lyeng'ha lya chiundewa mazuwa ga magazo kusinda mazuwa gala gawele nagalawila kulawa mhela uwele wanhu wa Efulaimu lowebagule na isi ya Yuda, mina kowegalila hemwe mndewa wa Ashulu."

18 Kuli zuwa alyo Mkulu Nguluwi kowatowela mluli wanhu wa Misili woye kota ng'honzi kulawa kuli vikolola vya lwanda lwa Naili na wanhu wa Ashulu woye kota nzuchi kulawa kuli isi ya hewo. 19 Weng'ha wokuya na kikala kuli mibindi jiwele uchiwa na kuli mhalika ziwele kuli mitalawe na kuli visosolo vyeng'ha viwele na miwa na kuli honhu hawele migongolo jangunwaga mazi. 20 Kuli zuwa alyo Mkulu Nguluwi kotumiya nzembe kulawa kumwambu mwa lwanda lwa Eyufulate, iwele ndo mndewa wa Ashulu, kobeya mnvili za kumutwi mwa hemwe na milaika ja kuli ng'huli za hemwe na kusa kahi lulevu lwa hemwe. 21 Kuli zuwa alyo, munhu koweza kuwa na ilogota limwe na ming'holo mili hela, 22 najo jolavya matombo kwa winji mbaka kowa na jibini ya kulya. Wanhu wawele wosigala kuli isi wolya jibini na hanombwa. 23 Mhela awo, chila honhu kuli mgunda wa mizabibu uwele na mizabibu elufu imwe jiwele chila mzabibu nawali uwhanizwa na sendi igwala limwe, wowa na mikwangwasale na miwa yeka. 24 Wanhu woluta ako kupelemba wawele na mipinde na misale, kwa vila isi yeng'ha yowa igubikwe na miwa na mikwangwasale. 25 Kuwala vidunda vyeng'ha viwele navyali vilimigwa kwa ihuka, hamuweza kuluta ako kahi, kwa chiwalo cha lunhwinhwi lwa kuhomwa na miwa. Howa ndo honhu ha kudimila misenga na ming'holo hela.