1 Kuli zuwa alyo, Mkulu Nguluwi kolihola ipanga lya heye likulu linoligwe na liwele nzinzili na kulitema lila izoka Lewiyatani* lilingusulupuka na lilinguhada. Mkulu Nguluwi kolikopola izoka alyo lilingikala kuli bahali.

2 Kuli zuwa alyo, Mkulu Nguluwi kolonga hino,

"Hemwe Waisilaeli, muwele kota mgunda unojile wa mizabibu,

mwanguganigwa kwimba!

3 Ndowalolela kota mlimi yalinguboholela goya mizuchila ja mgunda wa heye,

leka jikule goya.

Ndowamila hemwe nemisi na nechilo,

leka munhu yoneche yaleche kuwalumiza hemwe.

4 Sizudila kahi kwa chiwalo cha wanhu wa heni,

wone wang'honyo wa hemwe wojeza kuwalumiza,

kota miwa ama mikwangwasale vyojilingudita kuli migunda,

ndowavaba na kuwalakaza hewo,

5 ama ndiwaleche woye kwa heni kwa chiwalo cha kuwamila hewo,

ndowaleka woye leka kihanyisa na heni,

ena, wadite kikala goya na heni."

6 Mhela wokuya uwele walelwa wa Yakobo wokwima nzinzili,

ena, mhela wa wanhu wa Isilaeli kuzuchila na kubahula kota igodi,

na kuimemeza isi yeng'ha kwa mafuza.

7 Nguluwi hawagazile ng'hatu Waisilaeli,

kota vyoyawagazile wang'honyo wa Waisilaeli,

Waisilaeli wawele nawakopoligwa kuli ngondo,

ndo wachefu kusinda wala wang'honyo wawo.

8 Nakawagaza wanhu wa heye kwa kuwahilika kuli isi za chijenzi.

Mhela wa chivuluvumbi chikulu cha kolilawilaga isanya,

nakawalavya kwa kuwatowa ng'hatu.

9 Hoyohawifya honhu ha kulavila nhambiko ha milungu,

na maganga gake gobalaswa na kuwa kota chokaa,

izengo lya Ashela na honhu ha kufunyizila ubani kuli honhu ha kulavila nhambiko vyowifigwa ng'hatu.

Kwa kudita ahyo nongwa za walelwa wa Yakobo vyozilechelwa,

gehile ga hewo vyogokusigwa ng'hatu.

10 Muji wula uwele na ngome lelo nauwa uchiwa,

wanhu nawoka na kuuleka kota kuchiwala,

wangudimila milogota na kwesela amo.

11 Waisilaeli ndo kota nhagala za migodi,

wamamo wanguzibena na kuzilokota kwa chiwalo cha kubwinila chiluli.

Waisilaeli walihela nyhala,

ahyo, Nguluwi, yawele nakawalumba hewo,

howonela isungu ama kuwalajila igano.

12 Kuli mhela awo uwele Mkulu Nguluwi koipulula isi hagati ha lwanda lwa Eyufulate na mbaka wa isi ya Misili, kowakungajiza wanhu wa heye weng'ha. 13 Mhela awo mhalamhanda yopembigwa kwa lizi likulu na wanhu weng'ha wa Isilaeli wawele nawahilikwa kuli isi za chijenzi ako Ashulu na Misili wohiluka na kumfugamila Mkulu Nguluwi mchanya mwa chidunda chelile cha Siyoni, ako Yelusalemu.