1 Kochona hegwe gwa ulingudumya,

ulingudumya ne hegwe kudumigwa!

Kochona hegwe ulingubelenhuka,

uwele haduhu yakubelenhuche!

Houleka kudumya nagwe kodumigwa!

Housinda kuwabelenhuka wanhu, nawo wokubelenhuka.

2 Gwa Mkulu Nguluwi, tonele isungu,

kwa vila twangitumbila kwa hegwe.

Uwe mong'ho wa hetwe chila mitondo,

na ulohozi wa hetwe kuli mhela wa magazo.

3 Kwa kubuma kwa lizi lya hegwe, wang'honyo wangubilima,

houkwinuka, wanhu wa isi zinji wangusambalukaga.

4 Wang'honyo wa hetwe howosumigwa,

tohola vinhu vya hewo vyeng'ha,

kota ikugusi lya nzije vyolilingulya mahamba ga mizuchila.

5 Mkulu Nguluwi nakatogoligwa, kwa vila kangikala kuchanya kilanga,

koumemeza muji wa Yelusalemu kwa hachi na kutanganika.

6 Mbuli ayo hoikoleka, heye kowadita hemwe mikale kuli kikala goya,

na kowadita hemwe muwe na luhala na kuvizela,

kumdumba Mkulu Nguluwi kowa ndo mwaluko wa ng'hano ayi.

7 Ulole lelo, wazidahe wa hetwe wangulila kwa lizi likulu mbalabala,

wasenga wa hetwe nawaluta kuli isi ziyage leka kikundiza kuwala kikala goya,

ila wolila kwa usungu ng'hatu kwa vila hawoweza kudita ahyo.

8 Haduhu yoneche yalingukola kuli nzila za hetwe,

kikundiza kuwala kikala goya nakumala,

nawawabeza wanhu wawele nawekundiza kuwala kikala goya,

na hawalinguwahulichiza.

Haduhu yoneche yalinguhulichizwa.

9 Isi yangukala na yanguwa mhende,

mielezi ja Lebanoni jangukala na kola,

ibindi linojile lya Shaloni lyanguwa kugunuche,

ako Bashani na kuli chidunda cha Kalimeli

migodi jangulagaza mahamba gake.

10 Mkulu Nguluwi kangulonga hino,

"Lelo ndokwinuka,

lelo ndotogoligwa,

lelo ndokwinuligwa.

11 Namwali na himila ya mhumba,

namlela mabeleje,

lweselo lwa hemwe ndo chiluli chilinguwalakaza hemwe.

12 Wanhu wa isi wolakazwa mbaka mizeje jawo jeng'ha jiwe chokaa,

wolakala himahima kota miwa na visosolo vikalile.

13 Mhulichize mbuli zonditile, hemwe muwele kutali,

namwe muwele habehi muuzele ukulu wa heni."

14 Wawele na gehile kuli muji wa Yelusalemu wana lunhwinhwi,

kukakama nakuwafika wohambe wamdumbe Nguluwi, wangulonga,

"Whaani hali hetwe koweza kikala na chiluli achi ching'hang'hale?

Whaani hali hetwe koweza kikala na chiluli chilingwaka mazuwa gose?"

15 Yalingikala kwa kutanganika na kulonga kukomya,

munhu yalingulema chinhu cha mzidi chilinguya kwa kubunza,

yalingulemeza ng'hatu moko ga heye kubochela chinhu kwa chiwalo cha kwajiliza hachi,

yalingulemeza makutu ga heye kuhulichiza ulonzi wa kukopola,

na yalingudinya meho ga heye leka yaleche kona wihe,

16 ayo ndo munhu yawele kochikala honhu ha kuchanya,

yawele honhu ha heye ha kubilimila howa ngome ya kuchidunda.

Kopegwa ibumunda lya heye,

na mazi gake ga kunwa hagoweza kumala.

17 Meho ga hemwe gomona mndewa kuli kunoga kwa heye,

na kuyona isi yoyalinguilongoza, isi ng'hulu na ngazi.

18 Kuli majesa ga hemwe mowa mchijesa kuwala kudumba kukolile na kiwuza,

"Wa kohi wala wejesile na kuwika kodi?

Wa kohi wala vilongozi waholile ushulu?

Wa kohi wala wakulu walingulolela ilingo?"

19 Hamuweza kuwona kahi wala wanhu wawele na ujuvi,

wawele na ndonga ya chijenzi, yohambe izeleche.

20 Mlole Siyoni, muji wa mnvina za hetwe,

meho ga hemwe goulola muji wa Yelusalemu,

honhu ha kikala goya ha kikala, ihema liwele haliweza kusigwa,

vigingi vyake haviweza kung'humbuligwa mazuwa gose,

haduhu ng'weso yake iwele yoweza kudumuka.

21 Amo Mkulu Nguluwi kotulajila ukulu wa heye.

Tochikala habehi na nzanda ng'hulu na nzanda ndodo,

kuwele meli za ngondo haziweza kukola,

ne meli ng'hulu kwinjila.

22 Kwa vila Mkulu Nguluwi ndo mtagusa wa hetwe,

heye ndo chilongozi wa wamizi wa hetwe,

Mkulu Nguluwi ndo mndewa wa hetwe,

heye ndo yalingutulohola.

23 Gwa Siyoni, ng'weso za meli za hemwe nazilejela.

Izengo lyake halimile nzinzili,

na tanga lyake haligonzoligwe.

Ila winji wa vinhu vilawile kuli ngondo wopegwa wanhu,

mbaka vyete woweza kuhola vinhu vyawo.

24 Haduhu yoneche yalingikala Siyoni yolonga, "Heni nda mtamwa,"

na gehile ga hewo walingikala amo golechigwa.