1 Mkulu Nguluwi kangulonga,

"Muye, hemwe mweng'ha muwele na ng'halu,

muye kuli mazi hemwe mlihela sendi,

mbochele ngano mkalye,

mbochele divai na itombo,

moweza kubochela ne sendi.

2 Lekachoni mwangulavya sendi za hemwe

kwa chiwalo cha chinhu hachiwele cha kulya,

na kitunya kwa chinhu chohambe chigutize?

Mnyhulichize goya,

namwe molya viwele goya

na kusangalala kwa vinonile.

3 "Muwiche goya makutu hemwe wanhu wa heni, muye kwa heni,

mnyhulichize, leka mikale.

Heni ndodita ilagano lya mazuwa gose na hemwe,

ndowapa igano lya kwimilila lyondilagane na Daudi.

4 Ulole, nandimdita Daudi yawe mlolezi wa wanhu wa isi,

chilongozi na mkulu wa wamizi wa wanhu wa isi.

5 Lelo hemwe mowachema wanhu wa isi wohamuwazelele,

nawo wokuya kwa hemwe himahima,

kwa vila heni ndo Mkulu Nguluwi, Nguluwi wa hemwe,

Yelile wa Isilaeli,

ndo ndiwaditile hemwe mpegwe ukulu."

6 Mumpale Mkulu Nguluwi mhela yang'hali kangoneka,

mumlande utanzi mhela yang'hali ka habehi.

7 Wehile waleche nzila za hewo zihile,

wawele na gehile wagaleche majesa ga hewo gehile,

wamhiluchile Mkulu Nguluwi leka yawonele isungu,

wamlutile Nguluwi wa hetwe, kwa vila kowalechela hewo.

8 Kwa vila Mkulu Nguluwi kangulonga hino,

"Majesa ga heni hagawele kota majesa ga hemwe,

ne nzila za heni haziwele kota nzila za hemwe.

9 Kota vila ulanga vyouwele kuchanya ng'hatu kusinda isi,

ndo nzila za heni vyoziwele kuchanya ng'hatu kusinda nzila za hemwe,

na majesa ga heni vyogawele kuchanya ng'hatu kusinda majesa ga hemwe.

10 Kota vila nhonya na seluji vyovilingudulika kulawa kilanga,

havilinguhiluka ako kahi, ila vyangujidodezaga misanga,

na kujidita mizuchila jizuche na kukula,

vyangumhaga mlimi nyhadikwa na kuwapa wanhu chilyo.

11 Hihyo du na ulonzi wa heni,

hauhiluka kwa heni kahi ne kulutilila goya,

ila wokweneza lila lyonuwile,

wolutilila goya kuli kunuwila kondikuwichile.

12 "Molawa Babuloni kwa kusangalala,

molongozwa leka mlute kwa kikala goya.

Vidunda na vigongo hali hemwe vyotowa iyowe na kwimba,

migodi jeng'ha kuli migunda jowatowela hemwe vimbamba.

13 Honhu ha chisosolo cha miwa, jozuka misonobali,

na honhu ha mikwangwasale jozuka mihadasi.

Ayo yowa mbuli iwele yowadita wanhu wakumbuchile,

kuwala mbuli zonditile heni Mkulu Nguluwi,

ndo ulajilo wa mazuwa gose uwele hauwifigwa."