1 Lole, Mkulu Nguluwi koidumya isi na kuileka uchiwa.

Koiwifya na kwambuza iwe chiwala,

na kuwasambalula wenyeng'haye wake.

2 Chila munhu kofichigwa na mbuli zizila.

Munhu wa hihi hela na mtambika,

chitumagwa mlume na mkulu wa heye,

chitumagwa mdala na mkulu wa heye,

yalingugula na yalinguguza,

yalingwazika na yalingwazigwa,

yalingudayi na yalingudayigwa.

3 Isi yowifigwa ng'hatu na kudumigwa,

Mkulu Nguluwi nakalonga ago.

4 Isi yangukala na kuswinha,

isi yeng'ha yanguwa ng'hochele,

ulanga na isi vyeng'ha vyangola.

5 Wanhu nawaidita isi iwe ikokomoche,

nawaleka kuhulichiza malajizo ga Nguluwi,

nawajilema mizilo ja heye,

nawalibena ilagano lya heye lya mazuwa gose.

6 Kwa chiwalo acho kupanjila kwanguidumya isi,

wenyeng'haye wake wangugazika kwa chiwalo cha nongwa za hewo.

Ahyo, walingikala kuli isi nawadumigwa,

ndo wanhu wachefu hela wasigale.

7 Mizabibu jangukala,

divai yangumala.

Weng'ha wawele nawali na usangalalo

sambi wangung'ung'uta kwa masinzo.

8 Kusangalala kwa matowazi nakuduma,

luchenze lwa ching'hweleng'hwele nalunyamalila,

na iyowe lya wawele na usangalalo naliduma.

9 Haduhu wanhu walingwimba kuli mhela wa kunwa divai,

ujimbi nauwa wausungu kwa walingunwa.

10 Muji uwifigwe nauwa uchiwa,

chila ng'handa lwizi naluhindigwa.

11 Mnzila wanhu wangulila kwa chiwalo cha kuwahela divai,

usangalalo weng'ha naumala,

nauwa haduhu muisi.

12 Miji jeng'ha najali ndo mahame hela,

na lwizi jake najibenangwa vihande vihande.

13 Ndo vyoiwa kuli isi zeng'ha

na hali wanhu wa isi zinji,

kota vila zeituni vyozilingusigala nyindo hela hala mhela wa kubeta houmala,

ama kota vila mhela zabibu nyindo vyozilingusigala hala mhela wa kubeta houmala.

14 Wawele wosigala wokwimba kwa kusangalala,

kulawa kolizinjilaga isanya wowikula ukulu wa Mkulu Nguluwi.

15 Lelo wenyeng'haye wa kolilawilaga isanya walingikala mhwani wamtogole,

wanhu wa isi zinji walitogole itagwa lya Mkulu Nguluwi, Nguluwi wa Isilaeli.

16 Twanguhulika nzimbo za lutogo kulawa kuli kuduma kwa isi,

nzimbo za kumtogola Mkulu Nguluwi yawele yatanganiche.

Ila sambi ndina masinzo,

ena, ndanguganda na ndanguwa ng'hochele.

Ndochona heni!

Walingubelenhuka wangulutilila kubelenhuka,

kubelenhuka kwa hewo kwangulutilila ng'hatu.

17 Kukabusa na misimo na midiwa,

avi ndo vilinguwabeteza hemwe wenyeng'haye wa isi.

18 Chila yalingubilima kukabusa kofunhuchila kuli isimo,

na yalingulawa kuli isimo kogwilizwa kuli idiwa.

Lwizi ja mazi tendema ja kilanga najichumulwa,

misisi ja isi jangutigasika.

19 Isi yobenekanga,

yodaduka na kutigaswa ng'hatu.

20 Isi yanguzebeduka kota yagalile,

kota chibumuli kuli mbeho,

yangutunyigwa na itunyo lya gehile gake

yogwa na haiweza kwinuka kahi.

21 Kuli zuwa alyo Mkulu Nguluwi kojizapa milungu ja kilanga,

na wandewa wa kuli isi.

22 Weng'ha wokungajizwa hamwe,

kota wanweng'hwa wawele mchinhweng'ho,

wowichigwa amo hamwe kwa mhela winji hamba kowazapa.

23 Hamba lumuli lwa nyelezi lwobasigwa soni,

nalwo lumuli lwa isanya lyokoneka kota nalubilabila,

kwa vila Mkulu Nguluwi Yawele na Mong'ho kolongoza ako Yelusalemu kuli chidunda cha Siyoni,

lumuli lwa ukulu wa heye lwolangaza hali wasekulu wa Yelusalemu.