1 Kuli zuwa alyo wadala saba womibata mlume yumwe na kumlonjela, "Chilyo na mivalo tochipalila twetwe, ila hegwe utusile soni ya hetwe, utukundize tuchemigwe kwa itagwa lya hegwe."

2 Mhela wanguya uwele Mkulu Nguluwi koudita muji wa heye uwe na ukulu na mafuza menji na Waisilaeli wawele nawasigala amo wochidayila kuli chila chinhu kulawa kuli muji awo. 3 Chila yumwe yawele nakalechigwa ako Yelusalemu, yawele nakasulupuka kuli kukopoligwa kuli muji wula loudumigwe, kochemigwa wa chiuyeng'ha. 4 Mkulu wa heni kouhovuga wavu wa wadala wa Siyoni, koweliza usalagwe wa danda kulawa kwa wanhu wa Yelusalemu kwa muhe wa utaguso na muhe wa chiluli. 5 Hamba, Mkulu Nguluwi kolajila kota ka hamwe na hewo kwa kuidita ng'hungugu mhela wa nemisi na iyosi na chiluli chilingwaka goya mhela wa nechilo kuli chila honhu mchanya mwa chidunda cha Siyoni na mchanya hali nhing'hano za wanhu. Mzidi wa ago ukulu wa Nguluwi wougubika na kuwamila muji weng'ha. 6 Ukulu wa heye wowa ndo lubehelo lwa hewo kuli ivuche lya nemisi na honhu ha kubilimila na ngawo ya hewo mhela wa nhigu na nhonya.