17 तधा पोर्ही किई ईशू लोगा का एही गल्‍ला खोज़णीं शुरू, "आपणैं पापो प्राश्त करा, अर परमेशरा सेटा एछा फिरी, स्वर्गो राज़ गअ नेल़ एछी।"

8 इहै काम ता करा ज़ेता करै थोघ लागे कि तम्हैं हेरअ प्राश्त करी पाप करनअ छ़ाडी।

13 डेओआ संघा एछा भाल़ी कि पबित्र शास्त्रा दी किज़ै आसा लिखअ द, परमेशर बोलअ तेथ इहअ, ‘हुंह निं थारै डागै-चैणैंओ बल़ीदान च़ाहंदअ, हुंह च़ाहा इहअ कि तम्हैं झींण करे।’ किल्हैकि ज़ुंण आप्पू लै इहअ समझ़ा कि तिंयां आसा धर्मीं, तिन्‍नां शधाणूं निं हुंह आथी आअ द, पर हुंह आसा तिन्‍नां लै आअ द ज़ुंण इहअ समझ़ा कि तिंयां आसा पापी।"*होश. 6:6

15 "ज़ेते बारै परमेशरै बोलअ त सह बगत गअ पुजी, स्वर्गो राज़ गअ नेल़ एछी। आपणैं पापो प्राश्त करा, परमेशरा सेटा एछा फिरी, अर एऊ खुशीए समादा दी करा विश्वास।"

3 हुंह बोला तम्हां लै कि तिंयां नांईं तै पापी आथी। पर ज़ै तम्हैं आपणैं पापो प्राश्त करी परमेशरा बाखा नांईं फिरे, थारअ बी हणअ इहअ ई बनाश।

32 हुंह निं तिन्‍नां लै आथी आअ द ज़ुंण आप्पू धर्मीं समझ़ा! पर हुंह आसा पापी मणछा शधाणूं आअ द तिंयां पापो प्राश्त करी पाप करनअ छ़ाडे।"

38 पतरासै बोलअ तिन्‍नां लै, "आपणैं पापो प्राश्त करा संघा लआ तम्हैं सोभै आपणैं-आपणैं पाप माफी लै मसीहा ईशूए नाओंऐं डुबकी, तै भेटणीं तम्हां पबित्र आत्मां ज़ुंण परमेशरो दान आसा।

19 "तैही बोला हुंह आपणैं पापो प्राश्त करा, संघा फिरा परमेशरा बाखा, ताकि थारै पाप माफ होए।

30 "तैही निं परमेशरै म्हारी बेसमझ़ीए घल़ी धैन दैनअ पर ऐबै दैआ सह सोभी मणछा लै हुकम कि तिंयां प्राश्त करी तिन्‍नें कदुष्ट काम करनै छ़ाडे।

19 हुंह ज़हा-ज़हा संघै झ़ूरी डाहा, तिन्‍नां लै दैआ हुंह नैरनीं समझ़ाऊंणी बी। तैही कर ऐबै भलअ अर आपणैं पापा लै प्राश्त।*सैणीं. 3:12

9 कई लोग सोठा इहअ कि प्रभू आसा आपणीं फिरी एछणें करारा पूरी करना लै बल़ैग पांदअ लागअ द। पर प्रभू निं एऊ साबै बल़ैग करदअ आथी लागअ द। तेऊ आसा तम्हां लै सबर डाहअ द। किल्हैकि सह निं कोही बरैबाद करनअ च़ाहंदअ। पर सह च़ाहा इहअ कि हरेक मणछ आपणैं पापो प्राश्त करे अर परमेशरा सेटा फिरी एछे।✝

32 हुंह निं कोही मरना लै राज्ज़ी हंदअ। तम्हैं छ़ाडा पाप करनअ, संघा रहा ज़िऊंदै। अह गल्‍ल डाही मंऐं मालक बिधाता बोली।’"

14 तेखअ ज़ै तिंयां मुंह सेटा अरज़ करे अर ज़ै तिंयां दिला का पाप करनअ छ़ाडे, तै हेरनी मुंह स्वर्गा का तिन्‍नें अरज़ शूणीं अर तिन्‍नें पाप माफ करी करनी मुंह तिन्‍नें ज़िम्मीं-ज़ैगा भिई रज़दी-पज़दी।

1 राज़ै हिजकिया दैनअ इज़राईल अर यहूदा मुल्खै सोभी लै समाद, एप्रैम अर मनिश्शे गोत्रा लै बी दैनअ तेऊ च़िठी लिखी समाद। तेऊ किअ सोभी लै छ़ांदअ कि राज़धानी एरुशलेम मनाऊंणअ इज़राईले परमेशर बिधाता लै ऊवार्णैओ थैर, तेता लै लोल़ी सोभै आऐ। 2 राज़ै अर कार-करिंदै किई आप्पू मांझ़ै सट-सलाह कि ऐहा बारी मनाऊंणअ हाम्हां ऊवार्णैओ थैर बशाहै। 3 एही ता मनाऊंआं तै ऊवार्णैओ थैर च़ैत्रै पर अज़ी ती कई प्रोहते शुधी हणीं बाकी अर सारै का होर लोग बी निं एरुशलेम अज़ी पुजै तै। 4 तेखअ हुऐ ऐहा गल्‍ला लै राज़अ अर सारी सभा दी सोभ राज्ज़ी कि ऊवार्णैओ थैर मनाऊंणअ बशाहै। 5 तेखअ पजैल़अ तिन्‍नैं दखण बेर्शेबा उझै उतर दान तैणीं सोभी इज़राईली सेटा समाद कि सोभै लोल़ी बधाने साबै आपणैं परमेशर बिधाते ऊवार्णे थैरा मनाऊंदै एरुशलेम आऐ। तधू आऐ तेऊ थैरा लै एतरै खास्सै मणछ कि तेतरै निं कधि आऐ तै। 6 राज़ै हिजकिया ज़ुंण दूत छ़ाडै, तिंयां डेऊऐ इज़राईल अर यहूदा मुल्खै सारै दी तिन्‍नां का थिअ च़िठी लिखी इहअ सारी परज़ा लै इहअ छ़ांदअ दैनअ द,

"इज़राईली मणछो, ज़ुंण तम्हैं अश्शूरी राज़ै का बच़ै दै आसा, ऐबै फिरा आपणैं दाद-बाब आबराम, इसहाक अर इज़राईले परमेशर बिधाता बाखा, तै जाणअ बिधातो कोप तम्हां का दूर हई। 7 थारै दाद-बाब अर इज़राईली मांझ़ै होर भाई-बंध ज़ुंण आपणैं परमेशर बिधाता लै शुचै-पाक्‍कै नांईं रहै, तम्हां निं तिन्‍नां ज़िहै हई। तम्हैं भाल़अ आपणीं आछी कि बिधाता तिन्‍नां लै केही सज़ा दैनी। 8 तम्हैं निं तिन्‍नां ज़िहै जर्ड हई अर तम्हैं करै तिहअ ज़िहअ बिधाता हुकम करा। तम्हैं लोल़ी एरुशलेम बिधाते भबना लै आऐ, ज़ुंण भबन म्हारै परमेशर बिधाता सदा लै पबित्र किअ कि तिधी तेऊए पूज़ा होए। तेखअ जाणअ बिधातो कोप तम्हां का दूर हई। 9 ज़ै तम्हैं बिधाता बाखा बापस एछे, तै जाणीं दुशमणा थारै तिन्‍नां भाई-बंधा लै झींण फिरी ज़ुंण तिन्‍नैं कैद करी गलामी दी आसा निंयैं दै अर तिंयां हेरनै तिन्‍नां घअरा लै बापस छ़ाडी। म्हारअ परमेशर बिधाता आसा झणैल़ू अर सह झ़ूरा हाम्हां लै खास्सअ। ज़ै तम्हैं तेऊ बाखा फिरे, तेखअ निं लाई तेऊ तम्हां बाखा पिठ डाही फरेऊई।"

10 नगरी-नगरी हांढदी पुजअ अह समाद एप्रैम, मनिश्शे, उतरा बाखा बस्सै दै ज़बलून गोत्रा आल़ै सेटा, पर तिंयां सोभै लागै तिन्‍नां लै हास्सदै अर सुहांगा करदै। 11 पर तज़ी बी थिऐ आशेर, मनिश्शे अर ज़बलून गोत्रा मांझ़ै कई भलै मणछ अर तिंयां आऐ एरुशलेम नगरी लै। 12 यहूदा सारै देशै बी हुअ बिधातो इहअ प्रतप्प कि तिंयां तैर्हुऐ ज़िहअ बोलअ तिहअ ई करना लै ज़िहअ राज़ै हिजकिया अर तेऊए कार-करिंदै हुकम किअ त।

13 बशाहै झाल़्हुऐ राज़धानी एरुशलेम ऊवार्णे अर आखरी रोटीए थैरा मनाऊंदै खास्सै मणछ। 14 बिधाते भबना छ़ाडी एरुशलेम होर्ती नगरी ज़िधी बी बल़ीदान अर धूप ज़ाल़णा लै बेदी थिई बणाईं दी, तिंयां काढी तिन्‍नैं पोर्ही संघा शोटी किद्रोन नाल़ै। 15 ज़ांऊं च़ौदा बशाहै लोग ऊवार्णै लै मिम्मूं काटदै लागै, प्रोहत अर लेबी पल़अ आप्पू लै शर्मिंदै हणअ, तेखअ किई सोभी आपणीं शुधी संघा आणै बिधाते भबनै हूम बल़ीदान। 16 तेखअ हुऐ तिंयां तेऊ साबै बिधाते भबनै आपणीं-आपणीं ज़ैगा खल़ै ज़िहअ परमेशरे दास मोसा तिन्‍नां लै बधाना दी आसा लिखी डाहअ द। लेबी आणअ बल़ीदान किऐ दै पशूओ लोहू प्रोहता सेटा अर तिन्‍नैं छ़ल़िकअ सह बेदी दी। 17 किल्हैकि लोगा मांझ़ै बी थिऐ इहै ज़ुंण अज़ी बी छ़ोतलै थिऐ। तिन्‍नैं लोगै ज़ुंण ऊवार्णे चैणैं बिधाता लै ज़ुदै शुचै तै डाहै दै, तिन्‍नें तिंयां मिम्मूं काटै तेखअ लेबी आप्पै संघा किऐ बिधाता लै अर्पण।

18 इना का लाऊआ ज़ुंण एप्रैम, मनिश्शे, इस्साकार अर ज़बलून गोत्रा का थिऐ आऐ दै, तिन्‍नां मांझ़ै निं खास्सै ज़ण्हैं बधाने साबै आपणीं शुधी आथी ती किई दी। पर तिंयां बी हुऐ ऊवार्णे मिम्मूंए शिखा खाणां लै साझ़ू। राज़ै हिजकिया भाल़अ कि तिन्‍नैं किज़ै किअ अर तेऊ किई तिन्‍नां लै बिधाता सेटा अरज़, "परमेशर बिधाता, 19 एही ता निं आसा ईंयां बधाने साबै शुचै आथी हुऐ दै! तूह करै इनो पाप-दोश माफ, किल्हैकि ईंयां बी आसा इने दादा-बाबा ज़िहै तत्त-दिला का ताह बिधाता सेटा तेरी पबित्र ज़ैगा माथै टेक्‍कदै आऐ दै।" 20 बिधाता शूणीं हिजकिया राज़े अरज़ संघा किऐ तिन्‍नें पाप-दोश माफ अर तिन्‍नें निं किछ़ हान्‍नी हुई। 21 इज़राईली मांझ़ा का ज़ेतरै लोग एरुशलेम नगरी कठा हुऐ तै, तिन्‍नैं मनाऊंअ खुशी-खुशी साता धैल़ी तैणीं आखरी रोटीओ थैर अर हर धैल़ै करा तै लेबी अर प्रोहत गाज़ै-बाज़ै संघै बिधाते ज़ै-ज़ैकार। 22 ऊवार्णे थैरा लै लेबी अर प्रोहतै ज़ेही समझ़कारी संघै काम किअ, तेते किई राज़ै हिजकिया खास्सी तिन्‍नें सर्राफी।

तेखअ रहै तेता बाद साता धैल़ै तैणीं भिई सोभ लोग थैरा मनाऊंदै लागी। संघा किअ मेल़-ज़ोल़े बल़ीदान करी सोभी लोगै आपणैं दादा-बाबे परमेशर बिधातो शूकर। 23 सोभै हुऐ ऐहा गल्‍ला लै राज्ज़ी संघै रहै तेता बाद भिई होर साता धैल़ी तैणीं खुशी-खुशी ऊवार्णे थैरा मनाऊंदै लागी। 24 यहूदा मुल्खे राज़ै हिजकिया दैनै लोगा लै एक हज़ार बाछ़ू, सात हज़ार भेडा-बाकरी हेल़्ही बल़ीदान करी धाम। कार-करिंदै बाखा बी दैनै लोगा लै एक हज़ार बल्द अर दस हज़ार भेडा। तेखअ किई खास्सै प्रोहतै बधाने साबै आपणीं शुधी। 25 यहूदा मुल्खे प्रोहत, लेबी संघी सारी सभा, यहूदा बस्सै दै सोभ लोग, इज़राईल मुल्खा का आऐ दै लोग अर परदेसी बी ज़ुंण ऊवार्णे थैरा लै थिऐ आऐ दै तिंयां थिऐ सोभ खुश हुऐ दै। 26 सारी नगरी ती फेर-फिरदी खुशी किल्हैकि एचल़अ बडअ थैर निं आझ़ तैणीं एरुशलेम नगरीए बस्सै दै लोगै इज़राईले राज़ै दाबेदे शोहरू सुलैमाने ज़मानै ओर्ही भाल़अ ई आथी त। 27 तेखअ हुऐ खिरी प्रोहत अर लेबी खल़ै संघा मांगी सोभी लोगा लै बिधाता का बर्गत। बिधाता शूणीं स्वर्गै तिन्‍नें अरज़।

13 सिधै घेरीए झिकल़ै धेल़ी निं दुख रहैऊंदै लागा,

मुखा लोल़ी शुझुअ कि तम्हैं आसा दिला का दुखी।’

आपणैं परमेशर बिधाता बाखा फिरा!

सह आसा खास्सअ झ़ूरनै अर झींण करनै आल़अ।

सह करा सबर अर आपणीं ज़बान करा सह पूरी।

सह निं झ़ट च़ारै रोश्श करदअ, हाम्हां लै आफ़त पल़दी भाल़ी हआ सह बी दुखी।

1 हुंह आसा बेरेक्यो शोहरू ईदूओ पोचअ जकर्या बिधातो गूर।

फारसी राज़ा दी आसा त माहा राज़अ दारा, तेऊए राज़ा दी दुजी साला काती दैनअ बिधाता मुखा समाद।

2 बिधाता बोलअ इहअ, "मुंह बिधाता ती थारै दादा-बाबा लै रोश्शै आई दी, 3 पर ऐबै बोला हुंह तम्हां लै इहअ, ‘मुंह सेटा लै एछा बापस फिरी अर तै एछणअ मुंह बी तम्हां सेटा लै फिरी।’ 4 तम्हैं निं आपणैं दादा-बाबा ज़िहै हआ, तिन्‍नें ज़मानै खोज़अ मेरै गूरै तिन्‍नां का समाद, ‘कदुष्ट काम अर पाप करनअ छ़ाडा।’ पर तिन्‍नैं निं मेरअ शूणअ अर नां मेरअ हुकम मनअ। अह गल्‍ल बोली मंऐं बिधाता ज़ुंण स्वर्गे सारी सैनो मालक आसा। 5 ईंयां आसा खास्सै पराणैं ज़मानें गल्‍ला, थारै तिंयां दाद-बाब डेऊए मरी अर तिंयां गूर बी निं आथी रहै दै। 6 मेरी च़ाकरी करनै आल़ै मेरै गूरा का बोलअ मंऐं थारै दादा-बाबा लै चतैनगी दैणा लै अर मेरअ समाद खोज़णा लै, पर तिन्‍नैं निं तिंयां गल्‍ला मनी अर तेतो नतिज़अ बी पल़अ तिन्‍नां भुगतणअ। तेखअ फिरै तिंयां मुंह सेटा लै बापस अर इहअ बी गअ तिन्‍नां का ज़ाण्हुंई कि मंऐं बिधाता दैनी तिन्‍नें पापा पिछ़ू तिन्‍नां लै सज़ा ज़िहअ मंऐं पैहलै ई त हेरअ द बोली कि मुंह करनअ इहअ।"

7 माहा राज़ै दारा ती राज़ करदी दुजी साल लागी दी, तेऊए राज़ा दी तैहा साला इक्‍की च़ौबी माघै किई बिधाता मुंह बेरेक्ये शोहरू अर ईदूए पोचै जकर्या गूरा संघै धैनै-सुपनै भिई गल्‍ला।

8 मुखा शुझुअ राची सुपनै कि कुंण स्वर्ग दूत आसा लाला घोल़ै प्रैंदै बेठअ द। सह घोल़अ आसा एकी खागै मैहंदीए डाल़ा-बूटा जैंदरी खल़्हुअ द अर तेऊ पिछ़ू आसा लाल, भौंरै अर शेते रांगे घोल़ै अर तिन्‍नां प्रैंदै शुंआर।

9 मंऐं पुछ़अ, "मालक, ईंयां घोल़ै किज़ै आसा?"

ज़ुंण स्वर्ग दूत मुंह संघै गल्‍ला करदअ थिअ लागअ द, तेऊ दैनअ मुल्है ज़बाब, "हुंह रहैऊं ताखा कि ईंयां किज़ै आसा।"

10 तेखअ दैनअ मैहंदीए डाल़ा-बूटा जैंदरी खल़्हुऐ दै घोल़ै प्रैंदै शुंआर स्वर्ग दूतै ज़बाब, "बिधाता आसा ईंयां घोल़ै पृथूई लै छ़ाडै दै कि तेथ हर ज़ैगा हांढदै रहे लागी।"

11 तेखअ किई तिन्‍नां घोल़ै प्रैंदै शुंआरै तेऊ स्वर्ग दूता संघै गल्‍ला ज़ुंण मैहंदीए डाल़ा-बूटा जैंदरी आसा त खल़्हुअ द, "हाम्हैं आऐ सारी पृथूई दी हांढ दैई, हाम्हां का शुझुअ इहअ कि सारी पृथूई आसा सोभ देश शांत अर निहंचै।"

12 तेखअ बोलअ तेऊ स्वर्ग दूतै बिधाता लै, "स्वर्गे सारी सैने मालक बिधाता, राज़धानी एरुशलेम अर यहूदा मुल्खे नगरी लै तेरअ रोश्श कधू हणअ फांभअ? तूह आसा तिन्‍नां का पिछ़ली सत्तर साला ओर्ही रुश्शअ द!" 13 तेखअ दैनअ बिधाता हैअ दैई तेऊ स्वर्ग दूता लै ज़बाब ज़ुंण मुंह संघै गल्‍ला करदअ त लागअ द।

14 तेऊ स्वर्ग दूतै बोलअ मुल्है इहअ, "तूह खोज़ सोभी का इहअ कि स्वर्गे सारी सैनो मालक बिधाता बोला इहअ, ‘हुंह झ़ूरा एरुशलेम नगरी लै खास्सअ, अह आसा मेरी पबित्र नगरी। 15 मुंह आसा तिन्‍नां देशा लै खास्सी रोश्शै आई दी ज़ुंण शांत अर निहंचै आसा। थोल़ी घल़ी हटअ हुंह रोश्शै मेरी परज़ा का पिछ़ू अर इनै शरेरै देशै किअ मेरी परज़ो बेअन्त बनाश!

16 "‘तैही बोला हुंह स्वर्गे सारी सैनो मालक बिधाता कि मुंह एछणअ एरुशलेम नगरी लै फिरी कि मुंह ऐहा नगरीए केही खास्सी झींण लागा। मेरअ भबन बणाणअं इधी भिई अर नगरी च़िणनी भिई।’"

17 स्वर्ग दूतै बोलअ मुल्है इहअ कि तूह लऐ लोगा का इना गल्‍ला ज़रूर खोज़ी कि स्वर्गे सारी सैनो मालक बिधाता बोला इहअ, "मेरी ईंयां नगरी हणीं भिई सेठ, मुंह करनी भिई एरुशलेम नगरी लै झींण अर अह नगरी छ़ांटणीं मुंह भिई आप्पू लै।"

18 तेखअ लागअ हुंह उझै भाल़अ अर मुखा शुझुऐ डागे च़ार शींग। 19 ज़ुंण स्वर्ग दूत मुंह संघै गल्‍ला करदअ थिअ लागअ द, मंऐं पुछ़अ तेऊ का, "ईंयां शींग किज़ै आसा?"

तेऊ स्वर्ग दूतै बोलअ मुल्है इहअ, "ईंयां आसा संसारै सोभी का बलबान च़ार देश ज़ुंणीं यहूदा, इज़राईल मुल्ख अर राज़धानी एरुशलेम नगरी का बिधाते परज़ा कैद करी देशै-देशै पजैल़ी।"

20 तेखअ रहैऊऐ बिधाता मुखा च़ार लुहार, तिन्‍नां का आसा च़ार घौण। 21 मंऐं पुछ़अ, "ईंयां किज़ू करदै आऐ?"

तेऊ स्वर्ग दूतै दैनअ ज़बाब, "इनै शींगै छिंगी यहूदा मुल्खे परज़ा देशै-देशै, इनै हंतै तै तिंयां ज़िहै नां किहै। ईंयां लुहार आऐ इना तिन्‍नां शींगा डरैऊंदै अर इना ज़ाक्‍कर्नै तिंयां शींग ज़िहै नां किहै।"

13 ज़ुंण आपणैं पाप च़ोरी डाहा, सह निं ज़िन्दगी दी सफल हंदअ।

पर ज़ुंण तिन्‍नां मना अर आजू पाप करनअ छ़ाडा, तेऊ लै करा बिधाता झींण।

23 अज़ी बी शूणां मेरी गल्‍ल,

हुंह आसा लागी दी तम्हां नैरदी,

हुंह खोज़ूं तम्हां का असली ज्ञैन,

मंऐं निं लाऐ तम्हैं कबाता पाई।

9 ज़ै हाम्हैं परमेशरा सेटा आपणैं पाप मने, तै आसा परमेशर म्हारै पाप माफ करनै अर हाम्हां म्हारै सारै पापा का शुचै करना लै विश्वास करनै जोगी अर धर्मीं।✝

7 "हुंह बोला तम्हां का इहअ कि ठीक इहअ ई करै पापो प्राश्त करनै आल़ै पापी मणछे बारै बी हआ स्वर्गै एही ई खुशी, ज़ेतरअ कि तम्हां ज़िहै नडिनुंऐं धर्मीं मणछे बारै निं हंदी, ज़ुंण ऐबै पाप निं करदै!

10 "हुंह खोज़ा तम्हां का कि परमेशरे स्वर्ग दूता सम्हनै हआ स्वर्गै एही ई खुशी नंद ज़ेभै एक मणछ आपणैं पापो प्राश्त करी परमेशरा बाखा लै फिरा।"

8 परमेशरा नेल़ एछा, तै एछणअ सह तम्हां नेल़ बी, ओ पापी मणछो, पाप करनअ छ़ाडा, ओ दोगल़ै लोगो, आपणैं दिल करा शुचै।✝