1 "सरदीस नगरी दी विश्वासी टोलीए स्वर्ग दूता लै लिख तूह इहअ समाद,

"हुंह आसा सह ज़हा का परमेशरे सात आत्मां अर सात तारै आसा, हुंह बोला इहअ कि मुखा आसा तेरै सोभी कामों थोघ, कि तूह ज़िऊंदी, शुझिआ पर तूह आसा मूंईं दी।

2 "तैही रह बिऊंतअ, अर तिन्‍नां च़िज़ा ज़ुंण बाकी आसा रही गई दी, अर ज़ुंण खतम ती हणैं आल़ी, तिन्‍नां कर पाक्‍की। किल्हैकि मंऐं निं तेरअ कोई बी काम परमेशरा सेटा पूरअ भाल़अ। 3 होशा दी एछ, कि ताह केऊ साबै आसा शिक्षा भेटी दी अर शूणीं ती, तिन्‍नां दी रह बणी अर पाप करनअ छ़ाड, ज़ै तूह बिऊंतअ नांईं रहे, मुंह एछणअ च़ोरा ज़िहै अर ताखा निं कधि थोघ लागणअ कि मुंह कहा घल़ी पल़णअ ताह दी चुटी।

4 "पर हाँ, सरदीस नगरी आसा ताह सेटा थोल़ै इहै विश्वासी बी ज़ुंणी आझ़ तैणीं कोई गलत काम निं किअ। अह आसा एता ज़िहअ कि तिन्‍नैं निं आपणैं झिकल़ै दी छ़ोत लाई। इहअ करै आसा तिंयां मुंह संघै रहणैं जोगी, तिंयां रहणैं मुंह ई संघै अर हर गल्‍ला दी हणैं तिंयां तिन्‍नां मणछा ज़िहै शुचै ज़ुंणी शेतै झिकल़ै आसा बान्हैं दै। 5 ज़ुंण ज़िते तेऊ लै बन्हैऊंणैं इहै ई करै शेतै झिकल़ै, अर तेऊओ नाओं निं हुंह ज़िन्दगीए कताबा का काटदअ। पर तेऊओ नाओं बोल़णअ मुंह आपणैं बाब अर आपणैं स्वर्ग दूता सम्हनै।*प्रका. 21:27

6 "ज़ै कुंण समझ़णअ च़ाहे तै दैऐ ऐहा गल्‍ला दी धैन कि परमेशरे आत्मां टोली लै किज़ै बोला!

7 "फिलेदीलफिया नगरी दी विश्वासी टोलीए स्वर्ग दूता लै लिख इहअ समाद कि हुंह आसा सह ज़ुंण सत्त अर पबित्र आसा, ज़हा का दाबेदे कुंज़ी आसा। ज़ांऊं हुंह कुंज़ी करै दुआर खोल्हा, तेता निं कोहै बुदरी सकदअ, ज़ांऊं हुंह कुंज़ी लाई दुआर हूल़ी हेरा, तेता निं कोहै घुआल़ी सकदअ।*आयू. 12:14; ईशा. 22:22

8 "मुखा आसा तेरै कामों थोघ, भाल़, मंऐं आसा डाहअ द ताह सम्हनै एक दुआर घुआल़ी, ज़ेता कोह निं बुदरी सकदअ, कि तेरी शगती आसा थोल़ी ज़ेही, तंऐं किअ तिहअ ई ज़िहअ मंऐं ताल्है बोलअ त अर ऐहा गल्‍ला लै निं तूह हुधूई कि तूह करा मुंह दी विश्वास। 9 भाल़, मुंह करनै राख्से सभा आल़ै तेरै बशै। ज़ुंण आप्पू लै यहूदी बोला, पर असली दी निं तिंयां आथी, तिंयां घल़ा शल़ैघा ई। हेर, मुंह करनअ इहअ कि तिन्‍नां पल़णअ तेरै च़रणैं, अर तेभै लागणअ तिन्‍नां का थोघ कि हुंह आसा ताल्है झणैल़ू।

10 "ज़िहअ मंऐं ताल्है बोलअ कि खरीए पलका डाहै सबर, तंऐं किअ ज़िहअ मंऐं बोलअ तिहअ ई। तैही करनी मुंह तेभै तेरी फाज़त ज़ेभै घोर आफ़त एछणी। अह आफ़त पल़णीं संसारै सोभी लै। एता करै लागणअ मुखा थोघ कि कुंण मणछ किहअ आसा। 11 हुंह आसा छ़ेक्‍कै एछणैं आल़अ, ज़ुंण ताह सेटा आसा, तेता डाहै मेरै फिरी एछणैं तैणीं थम्हीं कि कोई तेरअ मुगट नां छ़ड़ैऊई सके। 12 ज़ुंण ज़िते सह बणाणअं मुंह परमेशरे भबनै एक थाम्ह, अर सह निं भिई कधि बागै निखल़णअ, अर मुंह आपणैं परमेशरो नाअं अर आपणैं परमेशरे नगरी पबित्र ज़ैगा, मतलब-नऊंईं एरुशलेम नगरी दी परमेशरे भबनो नाअं ज़ुंण मेरै परमेशरा सेटा स्वर्गा का एछणैं आल़अ आसा, आपणअ नऊंअ नाअं लिखणअ मुंह तेऊ दी।*प्रका. 21:2; ईशा. 65:15; एज. 48:35

13 "ज़ै कुंण समझ़णअ च़ाहे तै दैऐ ऐहा गल्‍ला दी धैन कि परमेशरे आत्मां टोली लै किज़ै बोला!

14 "लौदिकिया नगरी दी विश्वासी टोलीए स्वर्ग दूता लै लिख इहअ समाद,

"हुंह आसा सह ज़हा लै एवमस्तू बोला, किल्हैकि हुंह आसा शुचअ-पाक्‍कअ अर हुंह करा परमेशरो सत्त प्रगट अर सह ज़हा करै परमेशरै सोभै गल्‍ला बणाईं, हुंह बोला ताल्है इहअ, 15 मुखा आसा तेरै कामों थोघ कि तूह नांईं ता ठांढी आथी अर नांईं ता तात्ती आथी। भलअ हणअ त इहअ कि या; तूह ठांढी हंदी या तात्ती। 16 तूह आसा स्तोती, तूह नां ठांढी अर नां तात्ती आथी, तैही लाई मंऐं तूह आपणीं खाखा का पोर्ही हुकरी। 17 तूह ज़ुंण इहअ बोला कि हुंह आसा सेठ, अर हुंह आसा गअ द सेठ हई, अर मुंह निं किछ़ी गल्‍ले कामीं पेशी आथी। ताखा निं इहअ थोघ आथी कि तूह आसा नभागी, निक्‍की, गरीब, कांणी अर नांगी।*होश. 12:8

18 "तैही दैआ हुंह ताल्है एही सलाह कि च़ोखअ सुन्‍नअ लऐ, ताकि तूह सेठ होए, अर शेतै झिकल़ै लअ ताकि तिन्‍नां बान्हीं तूह नांगै हणें नशर्मीं का बच़े अर आपणीं आछी मल़णा लै लअ काज़ल़ ताकि ताखा शुझदअ लागे। 19 हुंह ज़हा-ज़हा संघै झ़ूरी डाहा, तिन्‍नां लै दैआ हुंह नैरनीं समझ़ाऊंणी बी। तैही कर ऐबै भलअ अर आपणैं पापा लै प्राश्त।*सैणीं. 3:12

20 "हेर, हुंह आसा दुआरै खल़्हुई टोक्‍कदअ लागअ द, ज़ै मेरअ बोल शूणीं कोई मुल्है दुआर खोल्हे, तेऊ सेटा लै एछणअ मुंह भितरी अर तेऊ संघै खाणीं मुंह रोटी, अर तेऊ खाणीं मुंह संघै। 21 ज़ुंण ज़िते मुंह बशैल़णअ सह आप्पू संघै राज़गाद्दी प्रैंदै, ज़िहअ हुंबी राख्सा का ज़िती करै आपणैं बाबे राज़गाद्दी दी बाब संघै बेठअ।

22 "ज़ै कुंण समझ़णअ च़ाहे तै दैऐ ऐहा गल्‍ला दी धैन कि परमेशरे आत्मां टोली लै किज़ै बोला।"