1 इना गल्‍ला भाल़णैं का बाद शुझुअ मुखा स्वर्गै एक घुआल़ी दुआर। तेखअ शूणअ मंऐं कि मुल्है आसा कुंण बोल्दअ लागअ द अर सह थिअ सह ई ज़ुंणी मुंह संघै पैहलै गल्‍ला किई ती अर ज़सरै बोल नादा ज़िहै तै। तेखअ बोलअ तेऊ मुल्है, "उझै एछ इधा लै, अर मुंह रहैऊंणीं ताखा तिंयां गल्‍ला, ज़ुंण आजू पाक्‍कै दी हणीं।"*प्रका. 22:6

2 तेभी ज़ाण्हुंअ मुखा कि हुंह किअ परमेशरे आत्मां आपणैं बशै अर मंऐं कै भाल़अ कि स्वर्गै आसा एक राज़गाद्दी अर तैहा राज़गाद्दी दी आसा कुंण बेठअ द।✝

3 ज़ुंण तेथ प्रैंदै बेठअ द आसा, सह शुझिआ किम्मती पात्थर यशब अर मानिक ज़िहअ अर तैहा राज़गाद्दी फेर शुझुई च़ऊ बाखा मरकते किम्मती पात्थरा ज़ेही फणैरी।✝

4 संघा तैहा राज़गाद्दी च़ऊ बाखा आसा च़ौबी राज़गाद्दी होर अर तिन्‍नां राज़गाद्दी दी आसा च़ौबी विश्वासी टोलीए सैणैं शेतै झिकल़ै बान्हीं बेठै दै अर तिन्‍नें मुंडै आसा सुन्‍नें मुगट।✝

5 राज़गाद्दी का आसा बिज़ल़ी अर गुल़ूबिज़ल़ू ज़ेही छ़ेल़ लागी दी अर राज़गाद्दी सम्हनै आसा आगीए सात मसाल्‍लै लागै दै ज़ल़दै, ईंयां आसा परमेशरे सात आत्मां।✝

6 तैहा राज़गाद्दी आजू आसा, सह ज़ाण्हिंआं शिश्शै ज़िहअ आर पार शुझणैं आल़अ समुंदर।

राज़गाद्दी मांझ़ा-मांझ़ी अर च़ऊ बाखा आसा च़ार प्राणीं, तिन्‍नां आजू पिछ़ू आसा आछी ई आछी।✝

7 पैहलअ प्राणीं आसा सिहा ज़िहअ, अर दुजै प्राणींओ मुंह आसा बाछ़ू ज़िहअ अर चिऊथै प्राणींओ मुंह आसा मणछा ज़िहअ अर च़ौथै प्राणींओ मुंह आसा गरली ज़िहअ।✝

8 तिन्‍नां च़ऊ प्राणींए आसा छ़ह फैंख अर च़ऊ बाखा आसा आछी ई आछी, अर तिंयां रहा राची धैल़ी, बाझ़ी बशैघ किऐ इहअ बोल्दै लागी,✝

"पबित्र, पबित्र, पबित्र परमेशर बिधाता, सर्वशक्तिमान

ज़ुंण आझ़ आसा, ज़ुंण आझ़ा का आजी त अर आजू बी आसा एछणैं आल़अ।"

9 तिंयां च़ार प्राणीं करा तेऊए ज़ै-ज़ैकार, अदर अर शूकर ज़ुंण तैहा राज़गाद्दी प्रैंदै बेठअ द आसा। अह आसा सह ई ज़ुंण सदा-सदा ज़िऊंदअ रहा।✝ 10 ज़ेभै-ज़ेभै तिंयां च़ार प्राणीं इहअ करा, तेभै पल़ा तिंयां च़ौबी सैणैं तेऊ सम्हनै उटी बाखा माथै टेक्‍कदै ज़ुंण जुगै-जुगै ज़िऊंदअ आसा। अर तिंयां काढा आपणैं मुंडा मुगट राज़गाद्दी सम्हनै ज़ोरै-ज़ोरै इहअ बोल्दी धरनीं कि✝

11 "म्हारै परमेशर बिधाता,

तूह ई आसा प्रतप्प, अदर, अर शगती जोगी।

किल्हैकि तंऐं ई आसा सोभै गल्‍ला बणाईं दी

अर इना बणाणैं पिछ़ू ती तेरी ई मरज़ी।"