1 अह खुशीओ समाद आसा ईशू मसीहे बारै ज़ुंण परमेशरो पूत आसा। एते शुरूआत हुई इहअ करै: 2 ज़िहअ परमेशरे गूर ईशायाहे कताबा दी आसा लिखअ द,✝

"भाल़, मंऐं छ़ाडअ आपणअ दूत ताह आजू-आजू

ताकि सह तेरै एछणें धैल़ी लै बात डाहे बणाईं।

3 शुन्‍नैं रेगीस्ताना का आसा कुंण हाक्‍का लांदअ अर इहअ बोल्दअ लागअ द,

‘प्रभू एछणें धैल़ी लै डाहा बाता शुंहीं-शोधी,

तेऊए सुआगत करना लै रहा सोभ तैर्हुई।’"

4 अह दूत थिअ जोहन्‍ना डुबकी दैणैं आल़अ। सह रहा त शुन्‍नैं रेगीस्तानै, अर सह खोज़ा त लोगा का एही गल्‍ला, "आपणैं पापो प्राश्त करा, अर परमेशरा सेटा एछा फिरी, ताकि परमेशर तम्हां माफ करे अर तेखअ दैंऊं हुंह तम्हां लै डुबकी।"

5 यहूदा मुल्ख अर एरुशलेम नगरी रहणैं आल़ै खास्सै मणछ डेऊऐ तेऊ सेटा लै अर तिन्‍नैं लई आपणैं-आपणैं पाप मनी जरदण नदी दी तेऊ का डुबकी।

6 जोहन्‍ना बान्हां त घेरी ऊँटे ऊने झिकल़ै अर आपणीं कुछी दी बान्हां त च़ाम्भल़ेओ गाचू अर खाणां लै खाआ त रैट्टै अर मखीर।✝

7 संघा करा त सह इहअ प्रच़ार, "ज़ुंण मुंह बाद एछणैं आल़अ आसा, सह आसा सोभी का महान। इधी तैणीं कि हुंह निं तेऊ सेटा एता जोगी बी आथी कि हुंह तेऊए पोलल़ै खोल्हणैं च़ाकरी करनै आल़अ दास बणी सकूं।

8 "मंऐं ता दैनी तम्हां लै पाणीं दी डुबकी पर तेऊ दैणीं तम्हां लै पबित्र आत्मां दी डुबकी।"

9 तिन्‍नां धैल़ै आअ ईशू बी गलील मुल्खे नासरत गराऊंआं का जोहन्‍ना सेटा लै, संघा लई तेऊ का जरदण नदी दी डुबकी।

10 ज़ांऊं ईशू पाणीं जैंदरा का डुबकी दैई उझै निखल़अ, तेभी खुल्हअ तेऊ लै सरग, ईशू भाल़ी सरगा का पबित्र आत्मां पालल़ी ज़ेही आप्पू प्रैंदै एछदी।

11 परमेशरै बोलअ स्वर्गा का इहअ, "तूह आसा मेरअ पैरअ पूत, हुंह आसा ताखा खुश।"

12 पबित्र आत्मां निंयं तेभी ईशू शुन्‍नैं रेगीस्ताना लै। 13 तिधी रहअ राख्स च़ाल़्ही धैल़ी तैणीं तेऊ परखदअ लागी अर ईशू रहअ शुन्‍नैं रेगीस्तानै बणें ज़ीबा संघै अर स्वर्ग दूत रहै तेऊए च़ाकरी करदै लागी।

14 जोहन्‍ना कैद करनै का बाद आअ ईशू गलील मुल्खा लै। तिधी खोज़अ लोगा का तेऊ परमेशरो खुशीओ समाद इहअ बोली, 15 "ज़ेते बारै परमेशरै बोलअ त सह बगत गअ पुजी, स्वर्गो राज़ गअ नेल़ एछी। आपणैं पापो प्राश्त करा, परमेशरा सेटा एछा फिरी, अर एऊ खुशीए समादा दी करा विश्वास।"

16 गलील समुंदरे बाढै हांढदी-फिरदी भाल़ै ईशू शमौन अर तेऊओ भाऊ आन्दरू समुंदरा दी म्हाछ़ली ढाकणा लै ज़ज़ाल़ा पांदै, किल्हैकि तिंयां थिऐ म्हाछ़ली ढाकणैं आल़ै।

17 ईशू बोलअ तिन्‍नां लै, "ज़ेही तम्हैं म्हाछ़ली कठा करदै आसा लागै दै, मुंह संघै च़ाल्‍ला, हुंह सखाऊं तम्हां मेरै च़ेल्‍लै हणां लै मणछ कठा करनै।" 18 तिंयां बी लागै तेभी ज़ज़ाल़ा छ़ाडी तेऊ संघै हांढदै।

19 थोल़ै आजू डेऊई भाल़ै ईशू दूई होर भाई, याकब अर तेऊओ भाऊ जोहन्‍ना। तिंयां थिऐ लागै दै आपणैं बाब जबदी संघै किश्ती प्रैंदै बेशी ज़ज़ाल़ा सोहरदै। 20 तेऊ शादै तेभी तिंयां बी अर तिंयां लागै आपणैं बाब जबदी होरी मज़दूरा संघै किश्ती दी छ़ाडी तेऊ संघै हांढदै।

21 तिधा का पुजै तिंयां कफरनहूम नगरी अर ईशू डेऊअ बशैघे धैल़ी सभागृहा संघा लागअ शिक्षा दैंदअ। 22 सोभ लोग हुऐ तिधी तेऊए शिक्षा शूणीं रहैन।

किल्हैकि ईशू निं यहूदी शास्त्री अर फरीसी मणछा ज़ेही शिक्षा दैंदअ त ज़ुंण लोगा का बधाने तिन्‍नां ई गल्‍ला भिई-भिई खोज़ा तै ज़ुंण पैहलै होरी आसा बोली दी। पर सह दैआ त इहै गूरू ज़ेही शिक्षा ज़ेतो तेऊ हक अर आप्पू का थोघ हआ त।

23 तिन्‍नें सभागृहा थिअ तिधी एक मणछ, तेऊ दी थिअ भूत शाचअ द। 24 तेऊ पाई ज़ोरै-ज़ोरै हाक्‍का संघा लागअ इहअ बोल्दअ, "हे ईशू नासरी, हाम्हां भूता निं ताह संघै किछ़ै काम आथी! तूह कै हाम्हां खतम करदअ आसा आअ द? मुखा आसा थोघ कि तूह कुंण आसा, तूह आसा परमेशरै छ़ाडअ द पबित्र।"

25 ईशू लागअ तिन्‍नां भूता नैरदअ, "च़ुप्पी रहा, अर एऊ मणछा का निखल़ पोर्ही।" 26 तिंयां भूत निखल़ै तेभी तेऊ मणछा मरोक्‍की करै अर लैल़ा-क्रिंगा पांदी दूर।

27 ऐहा गल्‍ला भाल़ी हुई सोभी लोगा रहैनी अर आप्पू मांझ़ै लागै गल्‍ला करदै, "अह किज़ै गल्‍ल आसा? अह ता कोई नऊंईं शिक्षा आसा! एऊ ता एतरअ हक आसा कि भूता लै बी दैआ पोर्ही निखल़णेंओ हुकम! अर तिंयां बी मना ज़िहअ एऊ बोलअ तिहअ ई!"

28 इहअ करै लागअ ईशूए बारै ओरी-पोरी गलील मुल्खै सारै दी कई ज़ैगा थोघ।

29 तेखअ डेऊअ ईशू सभागृहा का याकब अर जोहन्‍ना संघै शमौन अर आन्दरू च़ेल्‍ले घअरा लै।

30 शमौन पतरासे शाशुई त ज़अर आअ द अर तिन्‍नैं खोज़अ तेभी तेसे बारै ईशू का। 31 तेखअ ढाकअ ईशू तैहा नेल़ डेऊई तेसो हाथ संघा झ़ैऊई सह खल़ी, तेसो ज़अर बेठअ तेभी अर सह लागी नढैऊऐ च़ाकरी करदी।

32 ज़ांऊं सान्ह पल़ी, तेऊ सेटा लै आणै कई बमार अर भूत शाचै दै मणछ। 33 तैहा नगरीए खास्सै मणछ हुऐ तिधी दुआरा आजू कठा। 34 तेऊ किऐ खास्सै कई रंगे बमारी दी पल़ै दै दुखी मणछ नरोगै अर खास्सै भूत बी काढै।

ईशू निं तिन्‍नां भूता बोल़णैं ई दैनअ त कि तिंयां तेऊए बारै लोगा का खोज़े, किल्हैकि तिन्‍नां का थिअ तेऊओ थोघ कि सह आसा परमेशरै छ़ाडअ द पबित्र।

35 ईशू उझ़ुअ राची भैणै का आजी अर तिधा का डेऊअ एक कांगनरांगी ज़ैगा लै प्राथणां करदअ। 36 पिछ़ू आऐ शमौन अर तेऊए होर साथी तेऊ लोल़ै। 37 ज़ांऊं तिन्‍नां ईशू भेटअ, तिन्‍नैं बोलअ तेऊ लै, "कई लोग आसा नगरी ताह भाल़ै लागै दै।"

38 ईशू बोलअ तिन्‍नां लै, "च़ाल्‍ला, हाम्हां डेऊणअ किधी ओरी-पोरी गराऊंआं दी ताकि हुंह प्रच़ार करी सकूं, किल्हैकि हुंह आसा एते ई तैणीं आअ द।" 39 तेखअ डेऊअ ईशू गलील मुल्खै कई ज़ैगा, संघा रहअ सभागृहा प्रच़ार करदअ लागी अर भूत शाचै दै लोगा बी रहअ नरोगै करदअ लागी।

40 तिधी आअ एक मणछ ज़हा कोहल़ ती निखल़ी दी। तेऊ टेक्‍कअ ईशू सेटा माथअ संघा किई एही अरज़, "हे प्रभू, ज़ै तूह च़ाहे, तूह सका मुंह एऊ कोहल़ा का शुचअ करी।"

41 ईशू फिरी तेऊए खास्सी झींण संघा छ़ुंअ सह आपणैं हाथा करै संघा बोलअ, "हुंबी च़ाहा, तूह लोल़ी एभी शुचअ हुअ।"

42 सह मणछ हुअ तेभी कोहल़ा का नरोगअ अर शुचअ। 43 ईशू छ़ाडअ सह एही चतैनगी दैई प्रोहता सेटा लै, 44 ✝ "हेरे, ऐहा गल्‍ला निं होरी कोही का खोज़ी। हाँ, प्रोहता सेटा डेऊई एछ आप्पू रहैऊई अर कोहल़ा का शुचै हणें बारै ज़ुंण बधान परमेशरे गूर मोसा आसा खोज़अ द तेऊ साबै दै भैंट, ताकि तिंयां भाल़े कि तूह गअ कोहल़ा का शुचअ हई।"

45 पर सह डेऊअ तिधा का बागै संघा लागअ कई लोगा का खोज़दअ कि ईशू सह किहअ करै किअ कोहल़ा का शुचअ।

इहअ करै पुजी तिंयां गल्‍ला कई ज़ैगा अर ईशू बी निं लोगा सम्हनै नगरी दी डेऊई सकअ। सह रहअ नगरी बागै किधी कांगनरांगै, पर तेथ बी लागै फेरा-फेर हर ज़ैगा का लोग ईशू सेटा लै एछदै।