Lucas 7

एकी सुबैदारो विश्वास

1 ज़ांऊं ईशू लोगा संघै सारी गल्‍ला करी मुक्‍कअ, तेखअ आअ सह कफरनहूम नगरी लै। 2 एक सुबैदार झ़ूरा त आपणैं एकी दासा लै खास्सअ। एकी धैल़ै हुअ सह दास इहअ बमार कि सह थिअ मरदअ तैर। 3 तेऊ बी थिई ईशूए बारै गल्‍ला शूणीं दी। तेऊ छ़ाडै यहूदी मणछे कई सैणैं ईशू सेटा लै एही अरज़ करी कि हे प्रभू मेरै घअरै एछी बच़ाऊ मेरै दासे ज़ान। 4 तिन्‍नैं ईशू सेटा एछी अरज़ किई, "हे प्रभू तेऊ लै कर क्रिप्पा सह आसा एता जोगी, 5 किल्हैकि सह करा म्हारी ज़ाती लै झ़ूरी अर तेऊ ई आसा हाम्हां लै सभागृहा बी बणाअं द।"

6 ईशू लागअ तिन्‍नां संघै हांढदअ अर ज़ांऊं सह घअरा नेल़ पुजअ, सुबैदारै दैनअ आपणैं कई साथी का समाद, "हे प्रभू, खास्सअ कष्ट निं करी, हुंह निं एता जोगी आथी कि तूह मेरै घअरै एछी सके। 7 नां हुंह एता जोगी आथी कि ताह सेटा आप्पै एछी सकूं, तैही निं हुंह ताह सेटा लै आअ, पर आपणीं खाखा का बोल एक बोल अर मेरअ दास जाणअ ठीक हई। 8 किल्हैकि हुंह आसा आप्पू बी सरकारी दास अर मुंह आसा आप्पू उंधै काम करनै आल़ै सपाही लै ढेऊआ करनैओ हक। ज़ांऊं हुंह कहा लै पोर्ही डेऊणा लै बोला, सह डेओआ पोर्ही अर ज़हा लै ओर्ही एछणा लै बोला, सह एछा ओर्ही अर आपणैं दासा लै बोला हुंह कि इहअ कर, सह करा तिहअ ई।"

9 ईशू बी हुअ तेऊए गल्‍ला शूणीं रहैन, सह फिरअ पिछ़ू अर ज़ुंण तेऊ पिछ़ू हांढदै तै लागै दै तेऊ बोलअ तिन्‍नां लै, "हुंह खोज़ा तम्हां का सत्त कि मंऐं निं एतरअ विश्वास पूरै इज़राईला दी भाल़अ" 10 सुबैदारै ईशू सेटा लै छ़ाडै दै तिंयां लोग ज़ांऊं बापस घअरै पुजै, तिन्‍नैं भाल़अ सह दास ठीक-ठाक।

मूंईं दी शोहरी ज़िऊंदी हणीं

11 थोल़ै धैल़ै बाद ईशू डेऊअ एक नाईन नाओंऐं नगरी लै अर तेऊए च़ेल्‍लै अर पिछ़ू तै खास्सै मणछ संघा लागै दै एछदै। 12 ईशू पुजअ नगरीए प्रऊल़ी सेटा। तिधी थिऐ लोग एकी ल्हासा बागा लै निंदै लागै दै। ज़ुंण सह मूंअ, सह थिअ बिधबा बेटल़ीओ एक्‍कै पूत अर नगरीए खास्सै मणछ तै तेऊए ल्हासा पिछ़ू हांढदै लागै दै। 13 तैहा बिधबा भाल़ी आई प्रभू ईशू झींण अर तैहा लै बोलअ, "लेरा लांदी निं लागे।" 14 तेखअ ईशू ल्हासा सेटा लै डेऊअ अर सह खाट छ़ुंहीं अर तिंयां च़कणै आल़ै खल़्हुऐ अर ईशू बोलअ, "हे ज़ुआन मणछा, हुंह बोला ताल्है खल़अ उझ़ू।" 15 तेखअ सह मुल्दअ उझ़ुअ खल़अ अर सह लागअ गल्‍ला करदअ अर ईशू सभाल़अ सह तेऊए ईजा का।

16 ऐहा गल्‍ला भाल़ी डरै तिंयां सोभ लोग अर तिंयां लागै परमेशरे ज़ै-ज़ैकारा करदै अर इहअ बोल्दै, "हाम्हां मांझ़ै आअ परमेशरो एक महान गूर अर परमेशरै किई आपणैं लोगा लै क्रिप्पा।" 17 ईशूए बारै ईंयां गल्‍ला पुजी सारै यहूदा अर ओरी-पोरी सारै मुल्खै कई ज़ैगा।

ईशू अर जोहन्‍ना डुबकी दैणैं आल़अ

18 जोहन्‍ना डुबकी दैणैं आल़ै लै बी दैनअ तेऊए च़ेल्‍लै इना गल्‍लो समाद। 19 तेखअ शादै जोहन्‍ना आपणैं च़ेल्‍लै मांझ़ै दूई ज़ण्हैं अर तिंयां छ़ाडै प्रभू सेटा इहअ पुछ़दै, "ज़ुंण सह एछणैं आल़अ थिअ, सह मसीहा तूह ई आसा कि अज़ी हाम्हैं कहा होरी न्हैल़ै रहूंमै लागी?"

20 अर तिन्‍नैं च़ेल्‍लै बी ईशू का बोलअ, "जोहन्‍ना डुबकी दैणैं आल़ै आसा छ़ाडै दै हाम्हैं इहअ पुछ़दै कि ज़ुंण सह एछणैं आल़अ थिअ, सह तूह ई आसा कि अज़ी हाम्हैं कहा होरी न्हैल़ै रहूंमै लागी?"

21 ईशू किऐ तैहा ई घल़ी कई दाह-खिज़ा अर भूत शाचै दै मणछ नरोगै अर कई कांणै मणछ किऐ शरैछै। 22 ईशू दैनअ तिन्‍नां लै ज़बाब, "ज़ुंण बी तम्हैं भाल़अ अर शूणअ, तिन्‍नां गल्‍ला खोज़ा जोहन्‍ना का कि कांणै लागै भाल़ै, लाट्टै लागै हांढदै-फिरदै। कोहल़े रोगी किऐ शुचै अर टौणैं लागै शूणैं। मुल्दै लागै ज़िऊंदै हंदै अर रैनै-गरीबा का खोज़ा खुशीओ समाद।✝7:22 ईशा. 35:5-6; 61:1 23 परमेशरा दैणीं तेऊ लै बर्गत ज़ुंण मेरै काम भाल़ी अर शिक्षा शूणीं मुंह दी भरोस्सअ करा अर बैहम निं करे।"

24 ज़ांऊं जोहन्‍ना छ़ाडै दै दूत तिधा का डेऊऐ, ईशू लागअ जोहन्‍ने बारै लोगा का बोल्दअ, "तम्हैं रेगीस्तानै किज़ू भाल़ै डेऊऐ तै, बागरी करै च़ुक्‍कदी नगाल़ै? 25 तै तम्हैं किज़ू भाल़ै डेऊऐ तै? नरम झिकल़ै बान्हैं दै मणछा? शूणां, इहै झिकल़ै ज़ुंण लोगा लोभा तिन्‍नां बान्हणैं आल़ै अर आल-मस्ती दी रहणैं आल़ै रहा राज़ मैहलै। 26 तै तम्हैं किज़ू भाल़ै डेऊऐ तै? कहा परमेशरे गूरा भाल़ै? हाँ, हुंह खोज़ा तम्हां का कि तम्हैं डेऊऐ तै परमेशरे गूरा का बी बडै भाल़ै। 27 अह आसा सह ई ज़सरै बारै पबित्र शास्त्रा दी इहअ आसा लिखअ द,

* 7:27 मला. 3:1; ईशा. 40:3 ‘भाल़, मंऐं छ़ाडअ आपणअ दूत ताह आजू-आजू

ताकि सह तेरै एछणें धैल़ी लै ताल्है लोगा तैरी डाहे।’

28 "हुंह खोज़ा तम्हां का ज़ुंण बेटल़ी का ज़ल्मैं दै आसा, तिन्‍नां मांझ़ै निं जोहन्‍ना का बडअ कोहै आथी। पर ज़ुंण परमेशरे राज़ा दी होछ़ै का होछ़अ आसा, सह आसा तेऊ का बी बडअ।"

29 तिन्‍नैं सोभी लोगै ज़ांऊं ईशूए ईंयां गल्‍ला शूणीं, तिधी थिऐ कारै गराहणै आल़ै बी ज़ुंणी जोहन्‍ना का डुबकी ती लई दी, तिन्‍नैं मनअ परमेशर शुचअ। 30 पर फरीसी अर शास्त्री समझ़ी परमेशरे सह सोठ नकदरी ज़ुंण तिन्‍नां लै ती किल्हैकि तिन्‍नैं निं जोहन्‍ना का डुबकी लई।

31 "एऊ जुगे लोगा हुंह किहै खोज़ूं कि किहै आसा? 32 तिंयां आसा तिन्‍नां लान्हैं ज़िहै ज़ुंण बज़ारै बेशी एकी-दुजै लै हाक्‍का लांदै आसा लागै दै,

‘हाम्हैं बाज़ी तम्हां लै बशूरी

पर तम्हैं निं नाच़ै।

हाम्हैं किअ हिक्‍का पटाक्‍की शोग

पर तम्हैं निं लेरै।’

33 "किल्हैकि जोहन्‍ना डुबकी दैणैं आल़ै नां होरी लोगा ज़ेही भांती-भांतीए रोटी खाई अर नां दाखो रस झुटअ अर तम्हैं बोलअ तेऊ लै इहअ कि एऊ दी आसा भूत? 34 हुंह मणछो पूत आअ खांदी पिंदी अर तम्हैं बोला इहअ कि भाल़ा छ़ाकू, साबा का बाधू दाखो रस झुटणैं आल़अ मणछ अर कारै गराहणै आल़ै अर पापी मणछो साथी। 35 पर ज्ञैन आसा आपणैं सोभी बच्च़ै का शुचअ किअ द।"

फरीसी मणछे घअरै पापी बेटल़ी लै माफी

36 तेखअ किई एकी फरीसी मणछे ईशू का अरज़, "हे प्रभू, मुंह संघै खाआ रोटी, अर ईशू डेऊअ तेऊए घअरै रोटी खांदअ।" 37 तैहा नगरी ती एक पापी बेटल़ी ज़ुंण कंज़रैई करा ती, ज़ांऊं तैहा का थोघ लागअ कि ईशू बेठअ फरीसी मणछे घअरै रोटी खांदअ, तैहा आणअ संगमरमरे भांडै भितरी खुशबूदार किम्मती तेल।

38 तेखअ लागी सह ईशूए च़रणा सेटा, पिछ़ू खल़्हुई करै लेरदी-लेरदी ईशूए च़रणा आछिए आशू करै भेऊंदी अर आपणैं मुंडे शराल़ा करै लागी ईशूए च़रणा टुशदी अर तैहा ईशूए च़रणैं माख्खू दैनै अर तेथ मल़अ सह खुशबूदार किम्मती तेल।

39 इहअ भाल़ी तेऊ फरीसी ज़ुंणी ईशू आपणैं घअरा लै शादअ त, सह लागअ आपणैं मन्‍नैं सोठदअ, "ज़ै अह परमेशरो गूर हंदअ, तै लागणअ त एऊ का थोघ कि अह बेटल़ी ज़ुंण एऊ छुंहंदी आसा लागी दी अह कुंण आसा अर अह केही बेटल़ी आसा? किल्हैकि अह आसा पापी बेटल़ी।"

40 ईशू हेरी तेऊए मन्‍नें गल्‍ल भुझ़ी अर तेऊ लै बोलअ, "शमौन, मंऐं लाअ ताखा किज़ै बोली।"

तेऊ बोलअ, "हाँ गूरू बोल।"

41 तेखअ खोज़ी ईशू तेऊ का एक कथ्या, "एकी सेठे तै दूई दैणदार, एकी तै पांज़ शौ च़ंदीए सिक्‍कै अर दुजै तै पज़ाह च़ंदीए सिक्‍कै तेऊओ ऋण भरना लै। 42 तिन्‍नां का निं दैणा लै किछ़ै त अर तेऊ सेठै किऐ तिन्‍नें ढब्बै माफ। तै तिन्‍नां दूई मांझ़ै सेठा लै कहा करनी खास्सी झ़ूरी?"

43 शमौनै दैनअ ज़बाब, "मेरी समझ़ा दी करनअ तेऊ ज़सरै खास्सै ढब्बै माफ हुऐ।"

ईशू बोलअ, "तंऐं बोलअ बिलकुल ठीक।" 44 तेखअ बोलअ ईशू तैहा बेटल़ी बाखा फिरी शमौना लै, "ऐहा बेटल़ी बी भाल़ा तूह? हुंह आअ तेरै घअरै पर तंऐं निं मुल्है खूरा धोणा लै पाणीं बी दैनअ पर ऐहा धोऐ मेरै खूर आशू करै अर आपणैं मुंडे शराल़ा करै टुशै।✝7:44 मूल. 18:4 45 तंऐं निं मुल्है मल़्हैची दैनी पर ज़ेभा ओर्ही हुंह आअ द आसा, तेभा ओर्ही निं ऐहा मेरै खूरा दी माख्खी दैणीं छ़ाडी। 46 तंऐं निं मेरै मुंडै तेल मल़अ पर ऐहा मल़अ मेरै च़रणैं खुशबूदार किम्मती तेल।✝7:46 भज. 23:5 47 तैही बोला हुंह ताल्है कि एसे पाप ज़ुंण खास्सै तै तिंयां हुऐ माफ, किल्हैकि ऐहा किई मुंह संघै खास्सी झ़ूरी पर ज़सरअ थोल़अ माफ हुअ तेऊ करनी थोल़ी झ़ूरी।" 48 तेखअ ईशू तैहा बेटल़ी लै बोलअ, "तेरै पाप हुऐ माफ।" 49 तेखअ ज़ुंण लोग ईशू संघै तिधी रोटी खांदै तै बेठै दै तिंयां लागै आपणैं मन्‍नैं सोठदै, "अह कुंण आसा कि पाप बी करा माफ?" 50 पर ईशू बोलअ तैहा बेटल़ी लै, "तेरै विश्वासै हेरी तूह बच़ाऊई, ऐबै डेऊ शांती दी आपणैं घअरा लै।"