16 Əpʉ nɔ̂ lə Fraka nə̂ Ndjapä tô lə ama Ndjapä də ə̂tə̂ ye, â ə lï ndə kə yisə̂ ərə kə əzü, ə yisə̂ əmbrʉ ərə ə̂në əzü mbrə kɔ kə ətshə, ə kirə də əzü gâ tə̂ ə̂rɔ̂ äwä, ə yisə̂ äwä kə mbrə ərə də äwänə kə əzü, 17 ndə kə pa əzü nə̂ Ndjapä gamba tə̂ ye ə sə də aərə nɔ̂ ndə kə mbrə də ə̂rɔ̂ kosəra nɔ̂.

15 Kerə pə lə əgblə tə̂ zə, bə wûsə̂ Fraka nə̂ Ndjapä gâ ye; ə lï ndə kə pa ə za äwä kə wusə̂ âdâ ərə kə əbə, ə̂në ə sə kə yisə̂ äwä kə she lə kuzu tə̂ äwä əpʉ lɔsu ə̂në bə zâ kə Jezu Kristə nə kɔ. 16 Əpʉ nɔ̂ lə Fraka nə̂ Ndjapä tô lə ama Ndjapä də ə̂tə̂ ye, â ə lï ndə kə yisə̂ ərə kə əzü, ə yisə̂ əmbrʉ ərə ə̂në əzü mbrə kɔ kə ətshə, ə kirə də əzü gâ tə̂ ə̂rɔ̂ äwä, ə yisə̂ äwä kə mbrə ərə də äwänə kə əzü, 17 ndə kə pa əzü nə̂ Ndjapä gamba tə̂ ye ə sə də aərə nɔ̂ ndə kə mbrə də ə̂rɔ̂ kosəra nɔ̂.

20 Angbʉlînə, e wüsə̂ nə ə pa ə̈bə̈ əzü bale lï lï ndə kə pa tshə yisə̂ tshelə âdâ ndəma Ndjapä ə̂në əndje tâ gâ lə Fraka nə̂ Ndjapä kɔ kʉ ndə kumu ye ne. 21 Mbrə ə̂në ə̈bə̈ əzü bale a afɔ ndə tshelə ye alɔ bale ə pa ndəma Ndjapä ne. Bale, Âgbɔ̂ Yîrə̂ kə yisə̂ əpʉ nə â azü ə pa ndəma Ndjapä nə kɔ.

15 Gbɔ̈ ə gbɔ̈ ndə kə pa bə na ə ka gâ ətshi Ndjapä tə ə̈bə̈ əzü ə̂në tshə yisə̂ nə gashu ə pa əne lï gâ ye kɔ, tə əyïkosəra ə̂në gana sə sə kə ngɔ ətshə mbrə kosəra nə̂ ye ne kɔ, ə̂në tshə sə kə yisə̂ əpʉ gâ pâ djatra əpʉ də äwänə kɔ.

2 mʉ̈ Əpʉ Ndjapä kə azü, ə də̂ tə̂ ə̂rɔ̂ alɔ nə wala ə də̂ tə̂ ə̂rɔ̂ alɔ nə də̂ ne o! Mʉ̈ kʉtə̂ nə, yïsə̂ aəmbrʉ aərə nə̂ azü nə kə əndje kpə lə ala əndje, ə ngä kə əndje, ə gbɔ̈gbɔ lɔsu əndje, ə yïsə̂ nə ə pa bə wusə̂ kə kânga lɔsu zə lə kə yisə̂ ərə nə kə əndje.

13 Ʉrrr ndjɔ gâ tə̂ əlo kə gu əmə, zä lɔsu zə gâ pâ kə dɨ Fraka nə̂ Ndjapä kə azü nɔ̂, gâ pâ əpʉ kə gbɔgbɔ lɔsu azü, gâ pâ kə yisə̂ ərə kə əndje.

12 Mbrə ə̂në Əpʉ Ndjapä sə tə sorô ə sə kə mbrə ərə. Ama nə kî ə rô ama ə̈ngrʉ̈ kamba ə̂në aama nə sə bishi kɔ gâ ye; ə sə kə li əzü ʉrrr ndjɔ ə kru tshelə takpa tə̂ lɔsu ye də yîrə̂ ye, ə kru tshelə takpa tə̂ akəshe də ayerɔngɔ; ə sə kə wa tshelə aəpʉ ə̂në ə sə tə̂ lɔsu əzü kɔ də aəpʉ kə tegbɔ kumu ye.

35 Tshelafɔ də ashɔ sə kə ro nə, bale, aəpʉ ama əmə sə sə kə ro nə bale ne.»

4 Jezu kîrə əpʉ ə pa: «Əpʉ Ndjapä pâ: "Ə də̂ kʉ mbrə rəgo də̂ əzü ə sə tə sorô ne, bale, əzü sə tə sorô tə̂ äwä aəpʉ ama Ndjapä nɔ̂."»*

17 Kö əndje kpî mbrə əbə tə̂ äwä djatra əpʉ. Əpʉ nə̂ zə də̂ djatra əpʉ nə.

39 «E sə kə pra tshelə âdâ Fraka nə̂ Ndjapä mbrə ə̂në, e-e, e wusə̂ nə ə pa e sə kə sɔtə̂ sorô nə̂ alɔnɔ̂ lə nə. Kandää, Fraka nə̂ Ndjapä nə kə pa əpʉ gâ pâ əpʉ nə̂ əmə nə kɔ.

25 bale əpʉ nə̂ Âgbɔ̂ Əyïngerə daka pə piii.»*

Əpʉ səkɔ kə də̂ Ə̂rɔ̂ Əpʉ ə̂në əndje mʉ̂ kə e gâ ye kɔ.

11 Lɔsu Ajuwufu nə mâ je sə̂ tə ə̂rɔ̂nə ə rô lɔsu əndje nə̂ əgɔ Tesalɔnikə nə. Əndje yîndə Əpʉ Ndjapä nə də əgo nə tə̂ lɔsu əndje. Alɔnɔ̂, əndje sə̂ kə pra tshelə Fraka nə̂ Ndjapä ndə kə pa əndje wu, wala əpʉ nə ə̂në Palɔ nə ə pa kə əndje kɔ, ə sə də äwänə a?

2 Palɔ nə lî gâ lə anda aangbɔ nə, mata ə̂në tshə mbrə tə mandʉnə kɔ. Tə̂ aəlo saaba vəta pə mandânə pə mandânə, əndje də azü nə pâ əpʉ gâ pâ Fraka nə̂ Ndjapä; 3 tshə yîsə̂ əpʉ nə ə yîsə̂ tshelə âdâ nə kə əndje ə pa Kristə lï ndə kə pa tshə wu əyo, ə she lə takpa tə̂ akuzu. Tshə pâ kə əndje ə pa: «Jezu nə ə̂në mə mʉ əpʉ nə̂ ye kə e kɔ, ətshə kə sə tə Kristə nə.»

30 Flipə nə nâ də ärɔ̈ ə djî əzü əgɔ Etiɔpi nə ə̂në tshə sə̂ kə dɨ fraka nə̂ awopandəma Ndjapä Ezayi nə kɔ. Tshə yû ətshə ə pa: «Bə dji tshelə əpʉ səye ə̂në bə dɨ kɔ a?» 31 Tshə kîrə əpʉ kə Flipə nə ə pa: «Ə̂në əzü kə yisə̂ tshelə âdâ nə kə əmə sə sə je ne kɔ, mə dji tshelə âdâ nə atâ?» Bale, tshə pâ kə Flipə nə ə pa tshə o ə sə gâ tʉ gâ ngotə̂ əne. 32 Ə̂sə̂ əpʉ nə lə Fraka nə̂ Ndjapä nə ə̂në tshə sə̂ kə dɨ nə kɔ ə pâ:

«Əndje nâ də ətshə mata ndalimi

ə̂në əndje sə kə na də ətshə gâ ə̂sə̂ kə wo aagia kɔ,

mata aya ndalimi ə̂në tshə kɨ kɨ ətshi əzü

ə̂në tshə sə kə wa aəsu ye kɔ ne,

tshə â ama ye â ne.

35 Bale, Flipə nə zâ əpʉ ə vɔ̂tə̂ kə pa əpʉ gâ pâ ə̂sə̂ əpʉ səkɔ ə̂në ə sə̂ lə Fraka nə̂ Ndjapä nə kɔ, ə mʉ̂ Ə̂rɔ̂ Əpʉ nə̂ Jezu kə ətshə.

25 Bale, Jezu pâ kə əndje ə pa: «E-e, azü ə̂në e wusə̂ ərə wu ne kɔ, ə̂në kə yində aəpʉ nɔ̂ ə̂në aawopandəma Ndjapä pâ kɔ gbɔ ə gbɔ tə̂ e kɔ! 26 Kristə nə lï lï ndə kə pa tshə wu marä tə̂ əyo rəke əlînə ka ə li gâ lə ə̂yî ye ne a?» 27 Mandânə, tshə vɔ̂tə̂ nə tə əpʉ ə̂në Mayïzə də aawopandəma Ndjapä nɔ̂ tâ gâ lə fraka kɔ ə yîsə̂ âdâ Fraka nə̂ Ndjapä ə̂në ə wû ətshə nɔ̂ kɔ kə əndje.

18 Jezu nâ trö ə pâ kə əndje ə pa: «Əndje zâ awlra nɔ̂ kə əmə gâ ye mâ lafɔ ndje pâ ashɔ. 19 E nä na ye mâ ndə azü tshepashɔ nɔ̂, ə mä əndje tə atrawaya nə̂ əmə, ə zä batamo kə əndje də əɨrɨ Abä, də ənə̂ Ɨrɨ nə də ənə̂ Âgbɔ̂ Yîrə̂, 20 ə yïsə̂ ərə kə əndje ndə kə pa əndje bata aərə nɔ̂ ə̂në mə zâ ama kə e də nə gâ ye kɔ. Bale, e wüsə̂ nə ə pa mə sə də e alɔnɔ̂, ʉrrr ndjɔ gâ tə̂ ama tshepashɔ.»

7 E nä na ye ə mʉ̈ əpʉ ə pa: "Əgɔngerə nə̂ tshelafɔ sə trö!"

18 Əmə Zââ, mə pa orâ kə azü nɔ̂ ə̂në əndje sə kə dji ndəma Ndjapä ə̂në ə sə lə fraka səke kɔ ə pa: kədə ə̈bə̈ əzü kə za ə̈bə̈ əpʉ gâ pâ nə, Ndjapä ə ko aəmbrʉ aərə ə̂në əndje pâ ndə nə lə fraka səke kɔ gâ lə akrɔ ye je. 19 Â kədə ə̈bə̈ əzü kə gi alabə̈ aəpʉ tshelə fraka ndəma Ndjapä səke gashe, Ndjapä ə gi ətshə gashe je tə̂ ə̂sə̂ ənə̂ ye leyɔ ə̂në ə za sorô kɔ də tshelə gala nə ə̂në ə sə kpî mbrə Ndjapä nə kɔ, ə̂në əndje pâ ndə nə lə fraka səke kɔ.

6 Kumu əmə kpe pâ əndu əmə mbrə ə̂në e tshi äwä Ndjapä ə̂në tshə ê e tə̂ äwä ə̂rɔ̂tə̂ Kristə kɔ tʉ kʉ diawû rə, ndə kə pa e ro gâ tə̂ ə̈bə̈ Ə̂rɔ̂ Əpʉ kpî kɔ! 7 Tə djatra əpʉ, ə̈bə̈ ata Ə̂rɔ̂ Əpʉ kpî sə sə je ne, bale, alabə̈ azü sə je ə̂në əndje sə kə djingli tshelə akrɔ e â yində kə do tshelə Ə̂rɔ̂ Əpʉ nə̂ Kristə nə ə do. 8 Bale, kədə ä-ä də ə̂tə̂ ä, wala kədə ə̈bə̈ trawaya nə̂ Ndjapä mâ lafɔ kə mʉ ə̈bə̈ ata Ə̂rɔ̂ Əpʉ kpî tə̂ ənə̂ sə̂ ə̂në ä mʉ̂ əpʉ nə kə e gâ ye kɔ, Ndjapä drä ətshə gâ ye! 9 Ä pâ ndə əpʉ nə kə e ətshinə gâ ye, â mə sə kə kwatə̂mə ə pa ndə nə kpəsəye kə e: kədə ə̈bə̈ əzü kə mʉ ə̈bə̈ ata Ə̂rɔ̂ Əpʉ kpî kə e tə̂ ənə̂ sə̂ ə̂në e djî gâ ye kɔ, Ndjapä drä ətshə gâ ye!

15 E wü ə pa kədə Âgbɔ̂ Əyïngerə nə̂ əzə̂ nə kə kânga tshelə ye ndə kə ka ə ka ʉrrr, âdâ nə kə də̂ kə pa e tshɔ lə kuzu, mata ə̂në aye əzə̂ də Palɔ, ə̂në a yində ye ngbatshe kɔ, tâ ndje ngrowô də əpʉ nə kə e gâ ye, də kə wusə̂ ərə ə̂në Ndjapä zâ kə ətshə kɔ. 16 Əpʉ ə̂në tshə sə kə pa nə lə angrowô nɔ̂ ə̂në tshə tâ kɔ gâ pâ aəpʉ səkɔ kə sə̂. Alabə̈ aəpʉ nə lə angrowô nə gbɔ ə gbɔ ndə kə pa əzü dji tshelə nə, â azü ə̂në əndje wusə̂ ərə wu ə gbɔ gbɔ tə̂ äwä Əpʉ Ndjapä ne kɔ, sə kə do tshelə âdâ aəpʉ nə, mata ə̂në əndje sə kə mbrə ndje tə̂ aə̂dû aəpʉ lə Fraka nə̂ Ndjapä nə kɔ; əndje mbrə rə ndə kə pa əndje liwu äwä sorô əndje də ə̂tə̂ əndje.

4 Kandää, əpʉ nɔ̂ ə̂në əndje tâ gâ lə Fraka nə̂ Ndjapä leme-e kɔ, əndje tâ ndə kə pa ə yisə̂ ərə kə əzə̂, kanika a sə də ərə ə̂në a za lɔsu əzə̂ gâ pâ nə, tə̂ äwä kə ru tshelə əzə̂ də kə gbɔgbɔ lɔsu əzə̂ ə̂në Əpʉ Ndjapä nə ə na də nə kɔ.

14 Bale, əndje sə kə e ətshe nə kə ətshə atâ ə̂në əndje za lɔsu əndje za kə ətshə ne kɔ? Â əndje sə kə za lɔsu əndje nə kə ətshə atâ ə̂në əndje dji əpʉ gâ pâ ye dji ne kɔ? Â əndje sə kə dji əpʉ nə gâ pâ ye atâ ə̂në ə̈bə̈ əzü bale mʉ əpʉ nə mʉ ne kɔ? 15 Â əzü sə kə mʉ əpʉ nə atâ kədə əndje wla azü wla ndə kə mʉ əpʉ nə ne? Mata ə̂në Fraka nə̂ Ndjapä nə pa: «Ə̈nü aawomʉ Ə̂rɔ̂ Əpʉ fʉ ə fʉ.»* 16 Bale, ə də̂ azü nɔ̂ də̂ kə yində Ə̂rɔ̂ Əpʉ nə kɔ ne. Mbrə ə̂në Ezayi pâ əpʉ ə pa: «Âgbɔ̂ Əyïngerə, əde kə yində əpʉ nə ə̂në ä mʉ kɔ də lɔsu ye?»* 17 Rəkɔ, əpʉ lɔsu nə to tə̂ əpʉ ə̂në əzü ə dji kɔ â əpʉ nə ə̂në əzü nə ə dji kɔ sə tə əpʉ nə̂ Kristə nə.

16 Mbrə ə̂në gana mbrə əmə mbrə ndə kə pa mə mʉ Ə̂rɔ̂ Əpʉ nə ne. Ə sə tə awlra nə̂ Ndjapä ndə kə pa tshə she azü nɔ̂ ə̂në əndje za lɔsu əndje kə ətshə kɔ lə kuzu tə̂ äwä nə: Ajuwufu angbʉlînə, ndje də azü ə̂në əndje sə sə tə Ajuwufu nə ne kɔ. 17 Mbrə ə̂në Ə̂rɔ̂ Əpʉ səkɔ yisə̂ nə ə pa Ndjapä sə kə wu azü tə aə̂rɔ̂ azü lə ala ye kʉ tshî tə̂ äwä ə̂në əndje za lɔsu əndje kə ətshə kɔ, mata ə̂në Fraka nə̂ Ndjapä pâ: «Ə̂rɔ̂ əzü sə kə sə də sorô tə̂ äwä lɔsu.»*

12 Ənə̂ əzə̂, ə də̂ yîrə̂ tshepashɔ səye də̂ a sɔ̂tə̂ nə kɔ ne, bale a sɔ̂tə̂ Yîrə̂ ə̂në ə tô mâ ndə Ndjapä â nâ kɔ, ndə kə pa a wusə̂ ərə ə̂në Ndjapä za kə əzə̂ tə̂ äwä ə̂rɔ̂tə̂ ye kɔ. 13 Bale, ä sə kə pa əpʉ ərə səkɔ, ä pa pa tə̂ äwä kə wusə̂ âdâ ərə nə̂ azü ne. Bale, ä pa əpʉ nə tə̂ äwä ərə ə̂në Yîrə̂ Ndjapä nə ə yisə̂ nə kə ä kɔ. Âdâ ərə ə̂në ä sə kə yisə̂ âdâ əpʉ aərə nə̂ Yîrə̂ nə kə azü tə̂ äwä aəpʉ ə̂në Yîrə̂ nə ə ko gâ lə ama ä kɔ.

14 Bale, əzü ə̂në tshə sə sə də Yîrə̂ Ndjapä nə ne kɔ, tshə sə sə kə yində əpʉ aərə nə̂ Yîrə̂ Ndjapä nə ne. Mbrə ə̂në ə sə tə aərə yïrə̈ lə ala ye â tshə lï lï ndə kə pa tshə wusə̂ nə ne. Əzü lï ndə kə pa tshə wusə̂ âdâ əpʉ nə kʉ tə̂ äwä Yîrə̂ nə.

21 Mbrə ə̂në azü tshepashɔ səye də kə wusə̂ âdâ ərə nə̂ əndje, wûsə̂ Ndjapä wû tə̂ äwä kə wusə̂ âdâ ərə nə̂ Ndjapä nə ne. Âdârə ə̂në Ndjapä wû tə ə̂rɔ̂nə lə ala ye ndə kə pa tshə she azü ə̂në əndje zâ lɔsu əndje kə ətshə gâ ye kɔ lə kuzu tə̂ äwä əpʉ ə̂në ä sə kə yisə̂ nə kə azü, ə̂në ə sə mata əpʉ yïrə̈ kɔ.

22 Ajuwufu yində kə wu aərə ə̈lü â Agrakə sə kə pra äwä kə wusə̂ âdâ ərə. 23 Bale, ənə̂ ä, ä sə kə yisə̂ əpʉ nə̂ Kristə ə̂në azü kû ətshə gâ ala masheyɔ gâ ye kɔ. Əpʉ nə sə tə əpʉ ərə kə te tə̂ nə lə ala Ajuwufu â sə tə əpʉ yïrə̈ lə ala azü ə̂në əndje sə sə tə Ajuwufu ne kɔ. 24 Bale, ənə̂ azü ə̂në Ndjapä ê əndje gâ ye kɔ, əndje â sə kəmə tə Ajuwufu wala Agrakə, Kristə nə sə tə awlra nə̂ Ndjapä də kə wusə̂ âdâ ərə nə̂ Ndjapä nə.

17 Mbrə ə̂në Kristə nə wlâ əmə wlâ ndə kə pa mə na ə za batamo kə azü ne, bale tshə wlâ əmə ndə kə pa mə na ə mʉ Ə̂rɔ̂ Əpʉ kə azü. Rəkɔ, mə mʉ Ə̂rɔ̂ Əpʉ nə mʉ tə̂ äwä kə wusə̂ kə pa əpʉ nə̂ azü ne, kanika əpʉ kuzu Kristə nə la masheyɔ do tə̂ ye do tə amba ərə ne.

9 Bale ənə̂ e, e sə tə angwa ə̂në Ndjapä kê gâ ye, tə aangbɔ aawotokrɔ nə̂ Əyïngerə, tə marä ə̂në ə sə kpî, tə azü ə̂në Ndjapä kô e tə ənə̂ ye gâ ye. Tshə kê e nə ndə kə pa e mʉ əpʉ aâgbɔ̂ aərə nə̂ ətshə ə̂në tshə ê e lə əbutshe ndə kə ro gâ tə̂ ə̂yîtshe nə̂ ye ə̂në kumu azü kpe pâ əndu əndje tə̂ nə kɔ.