1 Tə̂ alɔ nə səkɔ, alabə̈ azü nâ ə pâ ndə əpʉ ərə ə̂në Pilatə mâ kɔ kə Jezu, ə̂në tshə wô azü əgɔ Galile tə̂ alɔ ə̂në əndje sə kə to əkrɔ kə Ndjapä kɔ. 2 Jezu kîrə əpʉ kə əndje ə pa: «E pa ənə̂ e ə pa azü əgɔ Galile səkɔ ə̂në əndje tshû marä tə̂ kuzu rə kɔ, əndje sə tə aâgbɔ̂ alayïnyaka ə rô ə̂dû azü əgɔ Galile nə nɔ̂ a? 3 Bale ne! Mə pa kə e: bale, kədə e tshi äwä angbrɔ kə mbrə tə̂ e tshi tʉ ne, e sə kə tshu nə nɔ̂ mata əndje. 4 Wala azü grʉvəta amanə vəta ə̂në əgerə anda ə̂në ə sə̂ o na ye gâ lafɔ kɔ ə tê gâ pâ əndje ə wô əndje mâ Silɔwe kɔ, e pa ənə̂ e ə pa əndje sə tə aâgbɔ̂ alayïnyaka ə rô ə̂dû azü əgɔ Jeruzalamə nɔ̂? 5 Bale ne! Mə pa kə e: kədə e tshi äwä angbrɔ kə mbrə tə̂ e tshi tʉ ne, e sə kə tshu nɔ̂ mata əndje!»

6 Mandânə, Jezu pâ əpʉ kəwû səye kə əndje ə pa: «Ə̈bə̈ əzü lû ə̈bə̈ ayɔ figə gâ lə kəndɨ nə̂ ye. Ndə ə̈bə̈ alɔ, tshə nâ ndə kə kɔ leyɔ nə, bale, tshə sɔ̂tə̂ nə sɔ̂ ne. 7 Bale, tshə pâ kə əyïkosəra kəndɨ nə ə pa: "Ə mbrə̂ ə̂ngû vəta kpəsəye â mə na ndə kə kɔ leyɔ nə, â mə sɔtə̂ nə sɔ ne. Dë gâ tʉ! Mbrə yekɔ də̂ ə sə pə lə kəndɨ nə tə ambanə kɔ?" 8 Bale, əyïkosəra kəndɨ nə kîrə əpʉ kə ətshə ə pa: "Âgbɔ̂ əzü, kätə̂ nə də ə̂ngû səye a wü kane. Mə sə kə dji ashɔ dji ndʉ nə ə tu grishi gâ tə̂ nə. 9 Tro də ə̂ngû mandânə ə sə kə le nə. Kədə tə nə kə le le ne, bə za ama əndje de gâ tʉ je."»

10 Tə̂ ə̈bə̈ əlo saaba, Jezu sə̂ kə yisə̂ əpʉ lə ə̈bə̈ anda aangbɔ. 11 Ə̈bə̈ yashe sə̂ je ə̂në afrɔ yîrə̂ mbrə̂ tə̂ ye â tshə sə̂ də rəka tə̂ ye ə mâ ə̂ngû grʉvəta amanə vəta. Rəka nə lû ətshə gâ tə̂ nə, äwä kə gbətɔ tshelə ye ndji gûta gü ne. 12 Jezu wû ətshə ə ê ətshə ə pâ kə ətshə ə pa: «Yashe, rəka nə̂ zə nglɔ̂ gâ ye.»

13 Tshə zâ kəna ye gâ pâ yashe nə â trale tshə gbə̂tɔ tshelə ye ndji â vɔ̂tə̂ kə mbe Ndjapä. 14 Tshelə makɔndji anda aangbɔ nə kô ətshə mbrə ə̂në Jezu grɔ̂ rəka tə̂ yashe nə tə̂ əlo saaba. Bale, tshə pâ kə ə̂kpû azü nə ə pa: «Aəlo mindû amanə bale sə tə aəlo kə ma kosəra lə nə. E nä lə aəlo nə səkɔ ka əndje grɔ arəka tə̂ e, ə də̂ tə̂ əlo saaba də̂ ne!» 15 Âgbɔ̂ Əyïngerə nə kîrə əpʉ kə ətshə ə pa: «Alayïama bishi ə̂në e lə ye! Tə̂ əlo saaba, əzü bale bale lə takpa tə̂ e wora pagra wala kunda nə̂ ye wora lə ângâ ndə kə pa tshə na də ətshə ndə kə pa tshə ndju ə̂ngû ne a? 16 Bale, yashe səye ə̂në tshə sə tə ätä Abraamo, ə̂në Sataa î ətshə ə mâ ə̂ngû grʉvəta amanə vəta kɔ, mə lï lï ndə kə pa mə wora ətshə lə əyo ə̂në tshə sə lə nə kɔ tə̂ əlo saaba ne a?» 17 Alɔ ə̂në Jezu kîrə əpʉ rəkɔ, gana mbrə̂ alayïəpʉ nə̂ ye nə nɔ̂. Ə̂kpû azü, ənə̂ əndje, tshelə əndje mɔ̂ mbrə aə̂rɔ̂ aərə ə̂në tshə mbrə̂ kɔ.

18 Jezu pâ kwatə̂ye ə pa: «Əgɔngerə nə̂ Ndjapä sə mata yekɔ? Mə yisə̂ nə gâ tə̂ yekɔ? 19 Ə sə mata ə̂ndjî ayɔ ə̂në əɨrɨ nə kə də̂ mutardə kɔ* ə̂në ə̈bə̈ əzü zâ ə lû gâ lə kəndɨ nə̂ ye. Ə kô ə mâ tə əgerə ayɔ â ayanu mbrə akomɔ əndje gâ lə ayana nə.»

20 Jezu pâ kwatə̂ye ə pa: «Mə yisə̂ Əgɔngerə nə̂ Ndjapä gâ tə̂ yekɔ? 21 Ə sə mata əyï mapa ə̂në ə̈bə̈ yashe zâ ə vɔ̂ gâ lə əgerə ndjuwu kə ma də mapa ə zâ tshelə nə ʉrrr â ômɔ nɔ̂.»

22 Alɔ ə̂në Jezu zâ äwä ndə kə na mâ Jeruzalamə kɔ, tshə rô lə agala də atshelagɔ ə yîsə̂ Əpʉ nə̂ Ndjapä kə azü na na ye. 23 Ə̈bə̈ əzü yû ətshə ə pa: «Âgbɔ̂ Əyïngerə, kʉtə̂ azü bale bale kə she lə kuzu a?» Jezu kîrə əpʉ kə əndje ə pa: 24 «E prä äwä də awlra ndə kə pa e li lə əngʉ tshelə manda, mbrə ə̂në, mə pa kə e, azü ngbatshe sə kə pra äwä ndə kə li nə, bale əndje to tro.

25 «Alɔ ə̂në əyïnga anda nə sə kə afɔ ə sə kə tshu manda nə gâ tə̂ nə, e sə kə sə pə mashu. E vɔtə̂ kə da manda ə sə kə pa nə ə pa: "Âgbɔ̂ əzü, krɔ̈ manda kə ä!" Tshə sə kə kirə əpʉ kə e ə pa: "Mə wusə̂ ətshe ə̂në e âfɔ tə̂ nə ə nâ kɔ wu ne!" 26 Bale, e vɔtə̂ kə pa nə ə pa: "A da e zɨ̂ rəgo ə ndju ərə äwä bale, bə yîsə̂ əpʉ lə äwä lə gala nə̂ ä." 27 Tshə sə kə kirə əpʉ kə e ə pa: "Mə wusə̂ e wu ne. E gï tə̂ e ngrʉ̂ gashe tə̂ əmə, e-e nɔ̂ də̂ azü kə mbrə nyaka!" 28 Kôto də̂ e sə kə kɨ nə də ngɔla e ə sə kə lo tshelə əji e alɔ ə̂në e sə kə wu Abraamo də Izakə də Jakɔbə gâ ndə aawopandəma Ndjapä nɔ̂ mâ lə Əgɔngerə nə̂ Ndjapä â e-e, əndje sə kə ko e wli gashu. 29 Azü sə kə afɔ djoko tə̂ tshepalɔ də lɔtebanga gâ ndə tshepagəle də tshepakɔnɔ ə na ə sə gâ tʉ ndə kə zɨ rəgo lə Əgɔngerə nə̂ Ndjapä. 30 Bale, alabə̈ azü tshe mandânə sə kə sə tə azü tshitshinə â alabə̈ azü tshitshinə sə kə sə tə azü tshe mandânə.»

31 Tə̂ alɔ nə səkɔ, alabə̈ Afariza nâ ə pa kə Jezu ə pa: «Äfɔ kotəye ə rö tə̂ ə̈bə̈ ətshe mbrə ə̂në Erɔdə pra äwä ndə kə wo əbə.» 32 Tshə pâ kə əndje ə pa: «E nä ə pä kə gbagraba səkɔ ə pa: "Mə sə kə grɔ aafrɔ ayirə̂ də arəka tə̂ azü kpəsəye də tshekratshe, tə̂ vəta əlo nə kosəra nə̂ əmə sə kə nglɔ nə. 33 Bale, mə lï ndə kə pa mə daka pə tə̂ ana nə̂ əmə kpəsəye də tshekratshe gâ ndə tshekrapanə, mbrə ə̂në ə̈bə̈ awopandəma Ndjapä lï lï ndə kə tshu lə ə̈bə̈ ətshe kpî tə̂ Jeruzalamə ne."

34 «Azü əgɔ Jeruzalamə! Azü əgɔ Jeruzalamə! E-e ə̂në e wo aawopandəma Ndjapä ə gbo azü ə̂në Ndjapä wlâ əndje kə e kɔ də badja ndə kə wo əndje kɔ. Äwä ngbatshe mə yîndə kə ngbo e gâ tə̂ əmə mata ə̂në əyï ngatə ə ngbo aaya nə gâ tshekudu kombo ye kɔ, bale e yîndə nə yî ne. 35 E wü-a, mandânə səye, Ndjapä tshî anda nə̂ e tʉ kə e gâ ye. Bale mə pa kə e: e sə sə kə wu əmə kwatə̂-e ne ʉrrr ndjɔ gâ tə̂ əlo ə̂në e sə kə pa nə ə pa: "Ndjapä tö ngwarə gâ pâ ətshə ə̂në tshə sə kə na də əɨrɨ Əyïlingû kɔ!"»*