1 Ndə ə̈bə̈ alɔ, Jezu sə̂ kə yisə̂ əpʉ kə azü lə Anda Ndjapä â sə̂ kə mʉ Ə̂rɔ̂ Əpʉ. Aâgbɔ̂ azü nə̂ aawotokrɔ də aawoyisə̂ âgbɔ̂ əpʉ nə̂ Mayïzə gâ ndə aâgbɔ̂ azü yî kumu əndje 2 ə pâ kə ətshə ə pa: «Pä kə ä, əde kə zâ äwä kə əbə â bə mbrə aərə səkɔ wala əde kə zâ ama kə əbə â bə mbrə aərə səkɔ?» 3 Tshə kîrə əpʉ kə əndje ə pa: «Əmə ndje, mə sə kə yu e də ə̈bə̈ əpʉ. 4 E pä kə əmə əde kə wlâ Zââ ndə kə pa tshə za batamo kə azü kɔ? Ndjapä wala azü?»

5 Bale, əndje têgbɔ kumu əndje ə pâ lə takpa tə̂ əndje ə pa: «Kədə a kirə əpʉ ə pa: "Ndjapä kə wlâ Zââ", tshə sə kə yu əzə̂ ə pa: "Mbrə yekɔ də̂ e yîndə əpʉ nə̂ ye nə yî ne kɔ?" 6 Kədə a kirə əpʉ ə pa: "Azü kə wlâ Zââ kɔ", azü əgɔ nə sə kə gbo əzə̂ də badja, mbrə ə̂në əndje wûsə̂ nə ngâ ə pa Zââ sə̂ tə awopandəma Ndjapä.» 7 Bale, əndje kîrə əpʉ ə pa: «Ä wusə̂ əzü ə̂në tshə wlâ Zââ nə kɔ wu ne.» 8 Jezu pâ kə əndje ə pa: «Əmə ndje, mə sə sə kə yisə̂ əzü ə̂në tshə zâ ama kə əmə ndə kə mbrə aərə səkɔ kə e ne.»

9 Mandânə, Jezu pâ əpʉ kəwû səye kə ə̂kpû azü nə ə pa: «Ə̈bə̈ koshe djô kəndɨ vinyə ə kâtə̂ kəndɨ nə gâ lə kəna alabə̈ aawodjo kəndɨ vinyə ə nâ ana lə ə̈bə̈ əgɔ ndə kə pa əndʉ ye dɨ. 10 Ə̂në alɔ kə kɔ ə̂lê vinyə nə lî gâ ye kɔ, tshə wlâ ə̈bə̈ əyïkosəra nə̂ ye bale kə aawodjo kəndɨ nə ndə kə pa əndje ko ə̂sə̂ ənə̂ ye ə̂lê vinyə nə kə ətshə. Aawodjo kəndɨ nə dâ ətshə ə grɔ̂ ətshə də tshelə kəna ye yera ambanə. 11 Əyïnga kəndɨ nə kwâtə̂ye ə wlâ ə̈bə̈ ata əyïkosəra nə, əndje dâ ətshə ə gû ətshə ə grɔ̂ ətshə də tshelə kəna ye yera ambanə. 12 Tshə kwâtə̂ye ə wlâ ə̈bə̈ vəta əyïkosəra nə̂ ye nə, əndje mbrə̂ əku tə̂ ye ə grɔ̂ ətshə lə kəndɨ nə. 13 Əyïnga kəndɨ nə pâ mâ tə̂ lɔsu ye ə pa: "Mə sə kə mbrə yekɔ? Mə sə kə wla ɨrɨ əmə ə̂në mə yində ye tə bandanə kɔ, mə wusə̂ nə ə pa əte əndje sə kə kpe rawa ye." 14 Bale, alɔ ə̂në aawodjo kəndɨ nə wû əgblə nə kɔ, əndje pâ lə takpa tə̂ əndje ə pa: "E wü-a! Ətshə ə̂në tshə sə kə sə tə əyïnga kəndɨ nə mandâ abä nə kɔ kə səye. A wö ətshə ndə kə pa kəndɨ nə sə tə ənə̂ əzə̂." 15 Bale, əndje zâ ətshə ə wûtu də ətshə lə kəndɨ nə gashu ə wô ətshə.» Jezu yû əndje ə pa: «Rəkɔ, əyïnga kəndɨ nə sə kə mbrə yekɔ tə̂ əndje? 16 Tshə sə kə gu nə ə wo aawodjo kəndɨ nə ə sə kə za kəndɨ nə gâ lə kəna aata alabə̈ aawodjo kəndɨ nə.» Alɔ ə̂në azü nə djî əpʉ səkɔ, əndje pâ: «Ə gä marä tə̂ ərə rəke wu wutu bale ne!»

17 Bale, Jezu shêkɔ əndje ʉrrr ə pâ: «Âdâ əpʉ sə̂ ə̂në əndje tâ gâ lə Fraka nə̂ Ndjapä kɔ ə yində kə pa atâ a? Əndje tâ ə pa:

"Əkpʉ ə̂në aawombrə anda wə̂ra tə̂ əndje tə̂ nə gâ ye kɔ,

ə dô tə̂ ye tə âgbɔ̂ əkpʉ ə̂në ə sə tə ə̈nü anda nə." *

18 Əzü nɔ̂ ə̂në tshə sə kə te gâ pâ əkpʉ səkɔ, tshelə ye sə kə ngɔ nə â əzü ə̂në əkpʉ nə sə kə te gâ pâ ye, ə sə kə gba tshelə ye.»

19 Kʉ pə kôto, aâgbɔ̂ azü nə̂ aawotokrɔ nə də aawoyisə̂ âgbɔ̂ əpʉ nə̂ Mayïzə nə prâ äwä ndə kə tegbɔ Jezu nə. Bale, awa ə̂kpû azü nə mbrə̂ əndje. Əndje wûsə̂ nə ə pa tshə pâ əpʉ kəwû səkɔ mbrə alane. 20 Əndje vɔ̂tə̂ kə kpia ətshə ə kpia. Əndje wlâ alabə̈ azü ə̂në əndje mbrə̂ tə̂ əndje tə aə̂rɔ̂ azü kɔ ndə kə pa əndje na, kədə əndje sɔtə̂ ə̈bə̈ əpʉ lə ama ye kanika alane ka ətshə kə komandâ əgɔ nə. 21 Azü səkɔ yû ətshə də əpʉ ə pa: «Awoyisə̂ ərə, ä wusə̂ nə ə pa bə pa əpʉ ə yisə̂ ərə də äwänə. Bə yində azü yi mbrə ala əndje ne. Bale, bə yisə̂ äwä kə ma tə̂ əzü ə̂në Ndjapä yində nə kɔ tə̂ äwä djatra əpʉ. 22 Pä kə ä: âgbɔ̂ əpʉ zâ äwä kə ä ndə kə pa ä piyi lapɔ kə Sezarə, âgbɔ̂ əyïngerə əgɔ Rɔmə wala ə zâ äwä nə zâ kə ä ne a?»

23 Bale, Jezu wûsə̂ nə ə pa əndje yîndə kə le əne ə le. Tshə kîrə əpʉ kə əndje ə pa: 24 «E mä ə̈bə̈ ngbengewle ngendja kə əmə mə wu. Tshitshi əde də əɨrɨ əde kə sə̂ la nə kɔ?» Əndje kîrə əpʉ ə pa: «Ənə̂ Sezarə kə sə̂.» 25 Bale, tshə pâ kə əndje ə pa: «Rəkɔ, e kö aərə ə̂në ə sə tə ənə̂ Sezarə kɔ kə Sezarə, e kö aərə ə̂në ə sə tə ənə̂ Ndjapä kɔ kə Ndjapä.» 26 Əndje lî lî ndə kə za ətshə tə̂ äwä ə̈bə̈ əpʉ ə̂në tshə pâ kə azü nə kɔ ne. Bale, kumu əndje kpê pâ əndu əndje mbrə kə kirə əpʉ nə̂ ye nə â əndje â ama əndje â ne.

27 Alabə̈ Asadusa nâ gâ ngotə̂ Jezu. Asadusa nə pa azü sə sə kə she nə ne. Əndje yû Jezu də əpʉ ə pa: 28 «Awoyisə̂ ərə, Mayïzə tâ əpʉ səye gâ lə âgbɔ̂ əpʉ kə əzə̂ ə pa: "Kədə ə̈bə̈ əzü â sə də yashe â sə sə də aneshe ne â tshu, aye nə sə kə za yashe nə ndə kə pa tshə zu aneshe də əɨrɨ kuzu nə."* 29 Kandää, alabə̈ alaye azü mindû amanə bishi sə̂ je. Angbʉlî əzü nə zâ yashe ə zû əgblə zû ne ə tshû. 30 Bishi əzü nə zâ yashe koya nə. 31 Mandânə, vəta əzü nə zâ ətshə, əndje mindû amanə bishi nə zâ ətshə bale bale nɔ̂, əndje tshû nɔ̂ ə zû əgblə zû tə̂ ye ne. 32 Mandâ əndje nɔ̂, yashe nə tshû ndje. 33 Rəkɔ, tə̂ alɔ kə she akuzu, yashe nə sə kə sə tə ənə̂ əde lə takpa tə̂ əndje? Mbrə ə̂në əndje mindû amanə bishi nə nɔ̂ zâ ətshə tə yashe gâ ye kɔ?» 34 Jezu kîrə əpʉ kə əndje ə pa: «Akoshe də ayashe tshepashɔ səye sə kə ko tə̂ əndje. 35 Bale, azü ə̂në əndje sə tə aə̂rɔ̂ azü ə̂në Ndjapä wu ə pa əndje lï ndə kə she ə sə də sorô lə Əgɔngerə nə̂ ye ə̂në ə sə kə na gu nə kɔ, əndje sə sə kə ko ayashe də akoshe ne. 36 Əndje lï lï ndə kə tshu nə kwatəndje ne, mbrə ə̂në əndje sə kə sə mata atrawaya nə̂ Ndjapä ə sə kə sə tə aləvu Ndjapä mbrə ə̂në əndje sə tə azü ə̂në əndje shê gâ ye kɔ. 37 Mayïzə yîsə̂ nə ə pa akuzu sə kə she nə. Tshə pâ əpʉ səkɔ gâ lə Fraka ə̂në tshə pâ ndə ə̂mî ə̂në əwo tshê tə̂ nə ə jû jû ne kɔ, alɔ ə̂në tshə ê Əyïlingû ə pa: "Ndjapä nə̂ Abraamo, Ndjapä nə̂ Izakə, Ndjapä nə̂ Jakɔbə."* 38 Ndjapä sə sə tə Ndjapä nə̂ akuzu ne, bale tshə sə tə Ndjapä nə̂ asorô, mbrə ə̂në, ənə̂ ye, azü nɔ̂ sə tə asorô.» 39 Alabə̈ aawoyisə̂ âgbɔ̂ əpʉ nə̂ Mayïzə nə pâ əpʉ ə pa: «Awoyisə̂ ərə, bə pâ əpʉ nə də äwänə.» 40 Mandânə, əgo kə yu ətshə kwatəndje də ə̈bə̈ əpʉ mî əndje mî ne.

41 Jezu pâ kə əndje ə pa: «Mbrə yekɔ də̂ azü lï ndə kə pa nə ə pa Kristə sə tə ɨrɨ Davidə kɔ? 42 Mbrə ə̂në Davidə nə də ə̂tə̂ ye pâ lə fraka Aətshi ə pa:

"Əyïlingû pâ kə Âgbɔ̂ Əyïngerə nə̂ əmə ə pa:

Sə̈ gâ tʉ gâ ndə ndəkɔ əmə,

43 ʉrrr ndjɔ mə mbrə alayïkowɔ nə̂ zə tə mbata ə̈nü zə gâ ye kane."*

44 Ə̂në Davidə nə ê Kristə nə ə pa Âgbɔ̂ Əyïngerə kɔ, rəkɔ, Kristə nə ə sə tə ɨrɨ Davidə nə atâ a?»

45 Ə̂në ə̂kpû azü nə nɔ̂ sə̂ kə dji əpʉ nə̂ ye kɔ, tshə pâ kə atrawaya nə̂ ye ə pa: 46 «E bäta tə̂ e ndə kə pa e sə sə mata aawoyisə̂ âgbɔ̂ əpʉ nə̂ Mayïzə ne. Əndje yində kə na ana kʉ də aə̈ngrʉ̈ aləba tə̂ əndje ə yində nə ə pa azü afɔ a ka ə bla alane tə̂ aətshe ə̂në azü ə kpu tə̂ əndje tə̂ nə kɔ ə yində kə sə kʉ gâ pâ angende tshitshinə lə aanda aangbɔ â yində kə sə kʉ gâ ə̂sə̂ əgbro azü lə asandaga. 47 Əndje sə kə ko aərə tshelə aanda nə̂ ayashe koya nɔ̂ tə̂ äwä əterə, â ndə kə pa azü wu alane, əndje sə kə yu Ndjapä, əndje yu ətshə ʉrrr əndʉ nə dɨ. Ndjapä sə kə wa ngbanga gâ pâ əndje ə rô pâ nə.»