1 Âgbɔ̂ əzü Teɔfilə, azü ə̂në əndje vɔ̂tə̂ kə ta gâ lə fraka aərə ə̂në ə wûtu lə takpa tə̂ əzə̂ kɔ ngba ə ngba. 2 Əndje pâ ndə nə mata ə̂në azü nə ə̂në əndje sə̂ gâ tə̂ ama aərə nə ə wû də ala əndje â dô tə̂ əndje tə awomʉ Əpʉ nə̂ Ndjapä kɔ. 3 Âdârə ə̂në əmə ndje, mə wû tə ə̂rɔ̂nə ndə kə ta nə gâ lə fraka mbrə əbə kpə tə̂ äwänə mandânə ə̂në mə prâ âdâ aərə sə̂ ndjɔ mâ tə̂ ama nə kɔ. 4 Ka bə wusə̂ nə ə pa aərə ə̂në əndje yîsə̂ nə kə əbə kɔ ə sə tə djatra əpʉ.

5 Alɔ ə̂në Erɔdə sə̂ tə əyïngerə əgɔ Jude kɔ, ə̈bə̈ awotokrɔ sə̂ je, əɨrɨ ye kə də̂ Zakari. Tshə sə̂ lə aangbɔ nə̂ Abia, əɨrɨ əwɔ nə kə də̂ Alizabatə, ə̈bə̈ ätä Aarɔ. 6 Əndje bishi nɔ̂ sə̂ tə aə̂rɔ̂ azü lə ala Ndjapä ə mbrə̂ tə̂ əndje də äwänə Lïndə̂ âgbɔ̂ əpʉ nə̂ Əyïlingû də aərə ə̂në tshə za ama də nə kɔ. 7 Bale, əndje sə̂ sə̂ də əgblə ne mbrə ə̂në Alizabatə nə sə̂ tə märä. Əndje bishi nɔ̂ gbɔ̂ ndje gâ ye.

8 Ndə ə̈bə̈ alɔ, Zakari sə̂ kə ma kosəra nə̂ ye nə̂ awotokrɔ lə Anda Ndjapä mbrə ə̂në əlo kosəra nə̂ aangbɔ nə̂ əndje kə sə̂. 9 Aawotokrɔ nə kê Zakari nə Lïndə̂ mandʉ ərə nə̂ əndje ə pa ətshə ka tshə li ə sho yombo nə mâ tə̂ ətshe ə̂në ə sə kpî mbrə Əyïlingû nə kɔ. 10 Ə̂kpû azü nə nɔ̂ sə̂ kə yu Ndjapä mashu tə̂ alɔ ə̂në əndje sə̂ kə sho yombo nə kɔ. 11 Bale, ə̈bə̈ trawaya nə̂ Əyïlingû bʉ̂ gâ tə̂ Zakari nə ə kâ gâ tə̂ ndəkɔ gblaka kə sho yombo nə pâ nə kɔ. 12 Zakari nə wû ətshə, lɔsu ye tɔ̂, awa mbrə̂ ətshə tə bandanə. 13 Trawaya nə̂ Ndjapä nə pâ kə ətshə ə pa: «Zakari, awa mbrə̈ əbə mbrə̈ ne, mbrə ə̂në Ndjapä djî əbə də ərə ə̂në bə yû tshuku nə kɔ gâ ye. Əwɔ zə də Alizabatə sə kə zu əgblə koshe kə əbə ə̂në bə sə kə dji əɨrɨ ye Zââ. 14 Mbrə ətshə, tshelə zə sə kə mɔ nə tə bandanə. Azü ə̂në tshelə əndje sə kə mɔ mbrə kə zu ətshə kɔ sə kə ngba nə. 15 Mbrə ə̂në tshə sə kə sə tə âgbɔ̂ əzü lə ala Ndjapä, tshə sə sə kə ndju duva wala ə̂pî ne, Âgbɔ̂ Yîrə̂ sə kə su ətshə trɔ̂ pə mâ lə əyï nə. 16 Tshə sə kə mbrə ndə kə pa ə̂kpû azü əgɔ Isərayalə do tə̂ əndje gu nə gâ ndə Əyïlingû tə Ndjapä nə̂ əndje. 17 Tshə sə kə na ətshi Ndjapä də yîrə̂ gâ ndə awlra nə̂ Eli ndə kə pa tshə kirə lɔsu alabä aneshe gâ tə̂ aneshe nə̂ əndje. Tshə sə kə mbrə ndə kə pa azü ə̂në əndje dji əpʉ dji ne kɔ, əndje mbrə tə̂ əndje tə aə̂rɔ̂ azü. Tshə sə kə gamba azü ndə kə pa əndje sə trö mbrə Əyïlingû.»

18 Zakari nə pâ kə trawaya nə̂ Ndjapä nə ə pa: «Mə sə kə wusə̂ nə atâ ə pa əpʉ səye sə tə banda əpʉ? Mbrə ə̂në mə gbɔ̂ gâ ye â əwɔ əmə ndje sə tə yawaza.» 19 Trawaya nə̂ Ndjapä nə kîrə əpʉ kə ətshə ə pa: «Əmə, mə sə tə Gabriyalə ə̂në mə sə ka gâ ətshi Ndjapä. Tshə wlâ əmə ndə kə pa əpʉ kə əbə, ndə kə na də ə̂rɔ̂ əpʉ səye kə əbə. 20 Aərə əpʉ ama əmə sə kə wutu nə alɔ ə̂në əlo nə sə kə lï nə. Mbrə ə̂në bə yîndə əpʉ nə̂ əmə yî ne kɔ, ama zə sə kə kânga nə, bə sə kə tə sələndu ʉrrr gâ tə̂ əlo ə̂në ərə nə sə kə wutu nə.»

21 Kandää, azü nə nɔ̂ sə̂ kə ka mbrə Zakari nə, əndje sə̂ kə li tshelə əndje mbrə ə̂në əndʉ ye dɨ̂ wââ mâ lə anda nə mâ je. 22 Alɔ ə̂në Zakari nə wûtu gashu kɔ, äwä kə pa əpʉ kə azü nə gûta gû ne, əndje wûsə̂ nə ə pa tshə wû ə̈bə̈ ərə mâ lə anda nə mâ je gâ ye. Tshə vɔ̂tə̂ kə ma kʉtə̂ kəna ye kə əndje, ama ye kânga gâ tə̂ nə gâ ye.

23 Alɔ ə̂në əlo kosəra nə̂ Zakari nə mâ lə Anda Ndjapä nə kâ gâ ye kɔ, tshə gû na ye gâ lə manda nə̂ ye. 24 Alabə̈ əlo mandânə, əwɔ nə də Alizabatə nə zâ əndu â zâ tə̂ ye wû tə̂ azü lə yipʉ mindû. Tshə pâ mâ lə ye ə pa: 25 «Ərə ə̂në Əyïlingû mbrə̂ kə əmə kɔ kə səye. Kpəsəye, tshə yində nə ndə kə gba gana tə̂ əmə lə ala azü.»

26 Tə̂ mindû amanə bale yipʉ əndu nə̂ Alizabatə nə, Ndjapä wlâ trawaya Gabriyalə gâ lə ə̈bə̈ gala əgɔ Galile, ə̂në əɨrɨ nə kə də̂ Nazaratə kɔ. 27 Tshə wlâ ətshə kə ə̈bə̈ amvera ə̂në tshə wusə̂ akoshe wu ne, əɨrɨ ye kə də̂ Marə̂ ə̂në ə̈bə̈ koshe nâ ndə ye ndə kə za ətshə; əɨrɨ koshe nə kə də̂ Jozafu, ə̈bə̈ ätä əyïngerə Davidə. 28 Trawaya nə̂ Ndjapä nə lî gâ tə̂ ye ə pâ kə ətshə ə pa: «Wanda, Marə̂. Bə sɔ̂tə̂ ə̂rɔ̂tə̂ Ndjapä gâ ye. Əyïlingû sə də əbə.» 29 Ə̂në Marə̂ nə djî əpʉ səkɔ, kumu ye kpê pâ əndu ye. Tshə têgbɔ kumu ye gâ pâ âdâ kə blatshe səkɔ. 30 Bale, trawaya nə̂ Ndjapä nə pâ kə ətshə ə pa: «Marə̂, awa katə̂ kə mbrə bə gâ ye, mbrə ə̂në Ndjapä mâ ə̂rɔ̂tə̂ ye kə əbə gâ ye. 31 Bə sə kə za əndu ə zu əgblə koshe ə̂në bə sə kə dji əɨrɨ ye Jezu. 32 Tshə sə kə sə tə âgbɔ̂ əzü, əndje sə kə e ətshə Ɨrɨ Ndjapä ə̂në tshə sə mâ ngâ lafɔ kɔ. Əyïlingû Ndjapä sə kə mbrə ətshə tə əyïngerə mata ätä nə də Davidə nə. 33 Tshə sə kə sə tə əyïngerə nə̂ azü əgɔ Isərayalə nɔ̂ piii. Ngerə nə̂ ye sə sə kə nglɔ nə bale ne.» 34 Marə̂ nə pâ kə trawaya nə̂ Ndjapä nə ə pa: «Ərə nə sə kə ma atâ, mbrə ə̂në mə wusə̂ akoshe wu ne kɔ?» 35 Trawaya nə̂ Ndjapä nə kîrə əpʉ kə ətshə ə pa: «Âgbɔ̂ Yîrə̂ sə kə jerə gâ pâ zə, awlra nə̂ Ndjapä ə̂në tshə sə mâ ngâ lafɔ kɔ sə kə sə gâ pâ zə mata tshekojerɔ. Âdârə ə̂në əgblə nə ə̂në bə zu ətshə je kɔ, tshə sə kə sə kpî mbrə Ndjapä; əndje sə kə e ətshə Ɨrɨ Ndjapä. 36 Alizabatə, əyɔ zə, sə də əndu lə yawaza tə̂ ye ndə kə zu əgblə koshe. Azü ê ətshə tə yashe märä, kpəsəye, tshə sə lə mindû amanə bale yipʉ əndu nə̂ ye. 37 Mbrə ə̂në ə̈bə̈ ərə bale kə kra Ndjapä guta gu ne.» 38 Marə̂ pâ: «Mə sə tə yashe kanga nə̂ Əyïlingû. Ərə nə ma kə əmə Lïndə̂ əpʉ ama zə.» Mandânə, trawaya nə̂ Ndjapä nə tshî ətshə tʉ ə rô.

39 Tə̂ tshekɨ nə səkɔ, Marə̂ âfɔ ə nâ na ye katshä mâ lə ə̈bə̈ gala ə̂në akaga sə tə̂ nə kɔ lə əgɔ Jude. 40 Tshə lî gâ lə anda nə̂ Zakari ə blâ Alizabatə nə. 41 Pa nə ə̂në Alizabatə nə djî kə blatshe nə̂ Marə̂ nə kɔ, əgblə nə mâ lə ye je vɔ̂tə̂ kə mbrə tə̂ ye â Âgbɔ̂ Yîrə̂ sû Alizabatə nə. 42 Tshə tâ râwâ tə âgbɔ̂ ə pa: «Ndjapä tô ngwarə gâ pâ zə ə rô ayashe nɔ̂. Tshə tö ngwarə gâ pâ əgblə nə ə̂në tshə sə lə zə kɔ. 43 Mə sə tə əde ndə kə pa əyï Âgbɔ̂ Əyïngerə nə̂ əmə na gâ ndə əmə? 44 Mbrə ə̂në alɔ ə̂në mə djî wanda nə̂ zə kɔ, əgblə nə dɔ̂ tə̂ ye lə əmə də ə̂rû. 45 Ənə̂ zə tə ə̂rɔ̂nə, əbə ə̂në bə yîndə əpʉ aərə ə̂në ə sə kə wutu nə Lïndə̂ əpʉ ə̂në Əyïlingû mʉ̂ kə əbə kɔ.» 46 Bale, Marə̂ nə pâ:

«Mə tɔlɔ Əyïlingû!

47 Lɔsu əmə sə də âgbɔ̂ ə̂rû mbrə Ndjapä awoshe əmə.

48 Mbrə ə̂në tshə yində nə ndə kə ti gâ tə̂ əmə, amba əyïkosəra nə̂ ye.

Mbrə ə̂në mandânə səye azü nɔ̂ də ə̂ngû də ə̂ngû sə kə pa kə əmə ə pa ənə̂ zə tə ə̂rɔ̂nə.

49 Mbrə ə̂në Ndjapä, Âgbɔ̂ Əyïworɔgbɔ mbrə̂ aâgbɔ̂ aərə mbrə əmə.

Əɨrɨ ye sə kpî.

50 Də ə̂ngû də ə̂ngû, tshə sə kə wu əyo azü

ə̂në əndje sə kə kpe rawa ye kɔ.

51 Tshə yîsə̂ awlra nə̂ ye tə̂ äwä kə mbrə aâgbɔ̂ aərə.

Tshə grɔ̂ azü ə̂në əndje dâ əkro əndje tə̂ əpʉ ə̂në ə sə̂ tə̂ lɔsu əndje kɔ.

52 Tshə gêta alayïngerə pâ mbata ngerə nə̂ əndje gâ tʉ

â kô aamba azü tɔ gâ lafɔ.

53 Tshə kô aə̂rɔ̂ aərə ngbatshe kə azü ə̂në əgo mî əndje

â grɔ̂ alayï kə sə də aərə də tshelə kəna əndje ambanə.

54 Tshə tô kəna ye tə̂ azü əgɔ Isərayalə, alayïkosəra nə̂ ye,

lɔsu ye tê gâ pâ kə mbrə ə̂rɔ̂tə̂ ye,

55 kə Abraamo gâ ndə aləvu nə də ə̂ngû də ə̂ngû

mata ə̂në tshə pâ ndə nə kə alätä əzə̂ gâ ye kɔ.»

56 Marə̂ nə sə̂ mâ ndə Alizabatə nə ə mâ mata yipʉ vəta â dô tə̂ ye â gû na ye.

57 Əlo Alizabatə nə ndə kə zu nə lî gâ ye, tshə zû əgblə koshe. 58 Azü tshe ngotə̂ ye də alayɔ nə djî ndə nə ə pa Əyïlingû mâ ə̂rɔ̂tə̂ ye ngâ kə ətshə gâ ye, tshelə ye də aəndje mɔ̂. 59 Tə̂ mindû amanə vəta əlo əgblə nə, mandâ kə zu ətshə nə, əndje nâ ndə kə wa ətshə də gandja. Əndje yîndə kə za Zakari, əɨrɨ abä nə, gâ pâ ye. 60 Əyï nə zâ əpʉ ə pâ: «Bale ne! Əndje sə kə e ətshə Zââ.» 61 Əndje pâ kə ətshə ə pa: «Əɨrɨ səye sə sə tə əɨrɨ ə̈bə̈ əyo zə bale ne.» 62 Bale, əndje mâ kəna əndje kə abä əgblə nə ndə kə yu ətshə tə̂ əɨrɨ ə̂në tshə yində kə za gâ pâ əgblə nə̂ ye nə kɔ. 63 Zakari nə yû tshuku ayɔ kə ta ngrowô gâ ala nə â tâ əpʉ nə ə pa: «Əɨrɨ ye kə də̂ Zââ.» Kumu azü nə nɔ̂ kpê pâ əndu əndje. 64 Pə mandânə, tshema Zakari nə sɔ̂, tshə vɔ̂tə̂ kə pa əpʉ. Tshə tɔ̂lɔ Ndjapä. 65 Awa mbrə̂ azü tshe ngotə̂ ye nɔ̂. Lə aəgɔ nɔ̂ ə̂në ə sə̂ pâ akaga lə Jude kɔ, azü pâ kʉtə̂ ndə aərə səkɔ. 66 Azü nɔ̂ ə̂në əndje djî ndə əpʉ səkɔ, əndje bâta gâ tə̂ lɔsu əndje â sə̂ kə pa nə ə pa: «Əgblə səye sə kə sə tə əde?» Kəna Əyïlingû sə̂ ngâ gâ pâ ye.

67 Âgbɔ̂ Yîrə̂ sû Zakari nə, abä əgblə nə, â tshə pâ əpʉ də əɨrɨ Ndjapä ə pa:

68 «A tɔ̈lɔ Əyïlingû, Ndjapä nə̂ azü əgɔ Isərayalə.

Mbrə ə̂në tshə nâ ə wû azü nə̂ ye ə djɔ̂ əndje lə kanga gâ ye.

69 Tshə wlâ ə̈bə̈ worɔgbɔ Awoshe azü kə əzə̂

ə̂në tshə sə lə takpa tə̂ alätä Davidə, əyïkosəra nə̂ ye kɔ.

70 Mata ə̂në tshə pâ ndə nə kerə lə ama aawopandəma ye ə̂në əndje sə kpî kɔ.

71 Tshə pâ ndə kə tshɔ əzə̂ lə kəna alayïkowɔ nə̂ əzə̂ ndje lə kəna azü ə̂në tshelə əndje yində əzə̂ yi ne kɔ.

72 Tshə yîsə̂ ə̂rɔ̂tə̂ ye kə alätä əzə̂

â lɔsu ye tə̂ gâ pâ mbʉkʉ nə̂ ye ə̂në tshə mbrə̂ də aəndje, mbʉkʉ ə̂në ə sə kpî kɔ.

73 Lïndə kə dra ama ye kə Abraamo, ätä əzə̂, ndə kə pa

74 tshə sə kə za äwä kə əzə̂ ndə kə vrɔ ətshə vrɔ də awa ne,

mandânə ə̂në tshə sə kə tshɔ əzə̂ lə kəna alayïkowɔ nə̂ əzə̂ kɔ

75 ndə kə pa əzə̂ sə kpî mbrə ətshə ə sə tə aə̂rɔ̂ azü

lə ala ye ʉrrr ndjɔ gâ tə̂ alɔ kuzu əzə̂.

76 Kâ ə də̂ ənə̂ zə, aya əgblə, əndje sə kə e əbə awopandəma Ndjapä ə̂në tshə sə mâ ngâ lafɔ kɔ.

Mbrə ə̂në bə sə kə na ətshi Âgbɔ̂ Əyïngerə ndə kə gamba äwä ye.

77 Ndə kə yisə̂ nə kə azü nə̂ Ndjapä ə pa

tshə sə kə she əndje lə kuzu tə̂ äwä kə gba tshelə anyaka nə̂ əndje.

78 Mbrə ə̂në Ndjapä nə̂ əzə̂ sə tə əyïə̂rɔ̂ lɔsu də awowu əyo azü.

Tshə sə kə tɔ pâ əzə̂ mâ lafɔ mata ə də ə̂yî alɔ ə̂në ə afɔ kɔ.

79 Ndə kə tshe pâ azü ə̂në əndje sə lə əbutshe ə sə tshekudu yîrə̂ kuzu kɔ

ndə kə pa tshə yisə̂ äwä blatshe ka əzə̂ na tə̂ nə.»

80 Əgblə nə gêrə ə sə̂ kə gbɔgbɔ tə̂ ye tə̂ äwä kə mbrə tə̂ ye. Tshə sə̂ mâ lə ngbûndû ʉrrr ndjɔ gâ tə̂ əlo ə̂në tshə mâ tə̂ ye gashu kə azü əgɔ Isərayalə nɔ̂ kɔ.