1 Jezu pâ kə atrawaya nə̂ ye ə pa: «Aərə ə̂në ə sə kə ma ndə kə pa azü te gâ lə nyaka mbrə nə kɔ sə kə sə je alɔnɔ̂. Bale, əyo gâ pâ əzü ə̂në tə̂ äwä ye ə̈bə̈ ngâ nə sə kə te gâ lə nyaka! 2 Ə sə tə ə̂rɔ̂nə mbrə ətshə ndə kə pa əndje i əgerə əkpʉ gâ tə̂ əgʉ ye ə wli ətshə də nə gâ lə ə̂ngû əngbrʉ ə rô ndə kə pa tshə mbrə ə̈bə̈ aya əgblə səye bale te gâ lə nyaka. 3 E bäta tə̂ e tə̂ äwä kə mbrə tə̂ e!

«Kədə aye zə kə mbrə ə̈bə̈ əmbrʉ ərə kə əbə, pä ndə nə kə ətshə kpə lə ala ye. Kədə tshə tshi äwä nə tʉ, gbä tshelə ködä nyaka nə lə kumu ye. 4 Kədə tshə â mbrə nyaka kə əbə äwä mindû amanə bishi lə əlo bale â kədə tshə â kpe ndje äwä mindû amanə bishi gâ tə̂ zə â pa kə əbə ə pa: "Mə kâtə̂ äwä nə gâ ye", gbä tshelə ködä nyaka nə lə kumu ye.»

5 Azü-awla nə pâ kə Âgbɔ̂ Əyïngerə nə ə pa: «Mbrə̈ ndə kə pa lɔsu ä gerə!» 6 Âgbɔ̂ Əyïngerə nə kîrə əpʉ ə pa: «Kədə lɔsu e â sə̂ kəmə teashe mata ə̂ndjî ayɔ ə̂në əɨrɨ nə kə də̂ mutardə ə̂në ə sə teashe kɔ â e pa kə ayɔ səye ə pa: "Äfɔ də əshe zə nɔ̂ ə kä ndji mâ la ə̂ngû əngbrʉ" ə sə kə dji əpʉ ama e.»

7 «Əde lə takpa tə̂ e də̂ tshə sə də ə̈bə̈ əyïkosəra ə̂në tshə sə kə djo kəndɨ wala tshə sə kə bata aagia â tshə â to mâ lə kəndɨ â gu, tshə sə kə pa kə ətshə ə pa: "Nä katshä ə sə̈ gâ tʉ ə zɨ̈ rəgo?" 8 Bale, tshə sə kə pa kə ətshə ə pa: "Fä rəgo kə əmə ə yï ə̈bə̈ ləba kpî ə kö rəgo nə kə əmə, mə zɨ ərə ə ndju ərə kanika bə zɨ ənə̂ zə ərə nə ə ndju ərə nə." 9 Tshə sə kə za mərshe kə əyïkosəra nə mbrə ə̂në tshə ma ərə ə̂në əndje zâ ama kə ətshə ndə kə pa tshə mbrə kɔ a?

10 «E-e, äwä bale ndje, alɔ ə̂në e mbrə aərə nɔ̂ ə̂në əndje zâ ama kə e ndə kə pa e mbrə nə kɔ, e pa: "Ä sə tə aamba alayïkosəra, ä mbrə̂ kʉtə̂ ərə ə̂në ä lï ndə kə mbrə nə kɔ gâ ye."»

11 Ə̂në Jezu sə̂ kə na na ye mâ Jeruzalamə kɔ, tshə rô lə aama ashɔ aəgɔ Samari də Galile. 12 Alɔ ə̂në tshə yî kumu ye gâ lə ə̈bə̈ aya əgɔ, alayïbroma morofo nâ ə tê ətshə. Əndje kâ ngrʉ̂ tə̂ ye ə tâ râwâ ə pa: 13 «Jezu, Âgbɔ̂ Əzü, wü əyo ä!» 14 Tshə wû əndje ə pâ kə əndje ə pa: «E nä ə mä tə̂ e kə aawotokrɔ əndje wu akwa e.*»

Alɔ ə̂në əndje sə̂ kə na na ye kɔ, broma nə kâtə̂ əndje gâ ye. 15 Ə̈bə̈ nə bale lə takpa tə̂ əndje wûsə̂ nə ə pa broma nə̂ alane kâ gâ ye kɔ, tshə dô tə̂ ye ə nâ ə mbê Ndjapä tə âgbɔ̂. 16 Tshə tê gâ tshekudu Jezu ə zâ kumu ye su ashɔ ə zâ mərshe kə ətshə. Tshə sə̂ tə ə̈bə̈ əzü əgɔ Samari. 17 Bale, Jezu zâ əpʉ ə pa: «Ə də̂ əndje morofo nɔ̂ də̂ broma nə̂ əndje nə nglɔ̂ kɔ ne a? Bale, ə̂dû əndje mindû amanə vəna sə kotâ a? 18 Ə̈bə̈ əzü ndə kə pa tshə do tə̂ ye ndə kə mbe Ndjapä guta gu ne, kʉtə̂ tshângâ səye bale a?» 19 Mandânə, Jezu pâ kə əzü əgɔ Samari nə ə pa: «Äfɔ ə gü na ye, lɔsu zə shê əbə lə kuzu gâ ye.»

20 Afariza yû Jezu ə pa: «Gorɔ də̂ Ndjapä sə kə ma Əgɔngerə nə̂ ye?» Tshə kîrə əpʉ kə əndje ə pa: «Əgɔngerə nə̂ Ndjapä sə sə tə ərə ə̂në ə wutu əzü ə wu də ala ye ne. 21 Əzü bale sə sə kə pa nə ə pa: "Ə tə kə sə mâtəye" wala "Ə tə kə sə mâko-e" ne. Mbrə ə̂në Əgɔngerə nə̂ Ndjapä wûtu gâ lə takpa tə̂ e gâ ye.»

22 Mandânə, tshə pâ kə atrawaya nə̂ ye ə pa: «Ə̈bə̈ alɔ sə je ə̂në e sə kə sə də əgo kə wu Əgblə nə̂ Əzü â sə kəmə mbrə kʉtə̂ əlo bale, e sə sə kə wu ətshə bale ne. 23 Əndje sə kə pa kə e ə pa: "Tshə sə mâtəye" wala "Tshə sə mâko-e." Bale, e nä nä mâ je ne, e zä äwä əndje zä ne. 24 Mbrə ə̂në, mata kə sro yavrɨ ə̂në â srô ə kpe ndjɔ mâ budu nə kɔ, əlo kə gu Əgblə nə̂ Əzü sə kə sə ndje äwä bale rə. 25 Bale, angbʉlînə, tshə lï ndə kə wu əyo tə bandanə, tshelə azü tshe kpəsəye sə kə wəra tə̂ əndje tə̂ ye. 26 Ərə ə̂në ə wûtu leme-e tə̂ alɔ Nɔwe kɔ, ə sə kə wutu nə äwä bale tə̂ əlo Əgblə nə̂ Əzü. 27 Leme-e, azü sə̂ kə zɨ ərə ə sə̂ kə ndju ərə, akoshe də ayashe kô tə̂ əndje ʉrrr gâ tə̂ əlo ə̂në Nɔwe lî gâ lə bato. Əgerə yavrɨ nî, ə̂ngû sû ə zâ tshepashɔ nɔ̂ â wô azü nə nɔ̂.* 28 Ərə nə sə kə wutu nə mata ə̂në ə wûtu leme-e tə̂ alɔ Lɔtə kɔ. Leme-e, azü sə̂ kə zɨ ərə ə sə̂ kə ndju ərə ə sə̂ kə yɔ aərə ə sə̂ kə ka aərə ə sə̂ kə djo kəndɨ ə sə̂ kə mbrə anda, 29 bale, alɔ ə̂në Lɔtə wûtu lə əgɔ Sɔdɔmə, Ndjapä wlâ əwo də abadja ə̂në əwo sə̂ tə̂ nə kɔ mâ lafɔ gâ pâ azü nə mata yavrɨ â ə wô əndje nɔ̂.* 30 Ərə nə sə kə sə ndje äwä bale rə tə̂ əlo ə̂në Əgblə nə̂ Əzü sə kə yi kumu ye lə ə̂yî ye kɔ.

31 «Tə̂ alɔ nə̂ səkɔ, əzü ə̂në tshə sə gâ pâ anda, tshə jë jërə ndə kə pa tshə ko aərə nə̂ ye ə̂në ə sə pə mâ lə anda kɔ ne; äwä bale, əzü ə̂në tshə sə ndje mâ lə kəndɨ, tshə dö tə̂ ye dö gu nə gâ lə manda ne. 32 E lï tshelə e gâ tə̂ ərə ə̂në ə wûtu gâ tə̂ əwɔ Lɔtə kɔ. 33 Əzü ə̂në tshə pra äwä ndə kə bata əwu ye, tshə sə kə tshu nə ngâ, bale, əzü ə̂në tshə sə trö ndə kə tshu mbrə əmə, tshə sə kə sə tə sorô. 34 Mə pa kə e: də tsheləbu nə səkɔ azü bishi sə kə sho gâ pâ klʉngbʉ bale, əndje sə kə za ə̈bə̈ nə bale ə katə̂ bale nə. 35 Ayashe bishi ə̂në əndje sə kə tɔ ərə kpə ə̂sə̂ nə bale kɔ, əndje sə kə za ə̈bə̈ nə bale ə katə̂ bale nə. [36 Akoshe bishi ə̂në əndje sə kə sə mâ lə kəndɨ, əndje sə kə za ə̈bə̈ nə bale ə katə̂ bale nə.]*» 37 Atrawaya nə̂ Jezu nə yû ətshə ə pa: «Âgbɔ̂ Əyïngerə, ərə səye sə kə wutu kotâ a?» Tshə kîrə əpʉ kə əndje ə pa: «Tə̂ ətshe ə̂në əko agia sə tə̂ nə kɔ də̂ amɔlɔ sə kə ngbo tə̂ əndje tə̂ nə.»