1 Jezu ê azü-awla nə morofo amanə bishi ə zâ awlra də ama tə əyïngerə kə əndje ndə kə grɔ aafrɔ ayirə̂ nɔ̂ də arəka. 2 Tshə wlâ əndje ndə kə yisə̂ əpʉ Əgɔngerə nə̂ Ndjapä ndje ndə kə grɔ arəka tə̂ azü. 3 Tshə pâ kə əndje ə pa: «E zä zä ə̈bə̈ ərə bale mbrə ana nə ne; e zä zä tshɔngblɔ wala ngbede wala rəgo wala ngendja bale ne, e kö kö ndje aləba bishi ne. 4 Anda ə̂në e li gâ lə nə, e sə̈ kôto ʉrrr ka ə afɔ ə ro. 5 Tə̂ ətshe nɔ̂ ə̂në azü nə wəra e wəra tə ə̂rɔ̂nə ne, e wütu lə gala nə ə grɔ̈ ashɔ ə̈nü e gbo əndje ndə kə yisə̂ nə ə pa Ndjapä ə wa ngbanga gâ lə kumu əndje je.» 6 Əndje rô na ye; əndje nâ lə əgɔ bale bale ə mʉ̂ Ə̂rɔ̂ Əpʉ ə grɔ̂ arəka tə̂ azü na na ye tə ətshe nɔ̂.

7 Erɔdə Atipasə, komandâ əgɔ Galile, djî əpʉ aərə sə̂ nɔ̂ ə̂në ə wûtu kɔ, tshə wû âdâ kumu ye wû də nə ne, mbrə ə̂në alabə̈ azü sə̂ kə pa nə ə pa Zââ Batistə kə sə̂ â shê lə takpa tə̂ akuzu kɔ. 8 Bale, alabə̈ əndje pâ Eli kə wûtu kɔ, alabə̈ aata əndje sə̂ kə pa nə ə pa ə̈bə̈ angbrɔ awopandəma Ndjapä bale kə shê kɔ. 9 Bale, Erɔdə sə̂ kə pa nə ə pa: «Mə dê əgʉ Zââ gâ ye, ətshə ənə̂ta kə sə̂ â mə djî ndə ye də əpʉ aərə rəkɔ?» Tshə prâ äwä ndə kə wu Jezu.

10 Azü-awla nə dô tə̂ əndje ə gû ə pâ ndə aərə nɔ̂ ə̂në əndje mbrə̂ kɔ kə Jezu nə. Tshə kô əndje ə gî tə̂ ye də əndje gashe kpî, djoko tə̂ ə̈bə̈ gala ə̂në əɨrɨ nə kə də̂ Betəsayida kɔ. 11 Ə̂kpû azü nə wûsə̂ nə ə zâ äwä ye. Jezu wə̂ra əndje tə ə̂rɔ̂nə ə pâ ndə əpʉ Əgɔngerə nə̂ Ndjapä kə əndje. Tshə grɔ̂ ndje arəka tə̂ azü ə̂në əndje yində kə sə də ə̂rɔ̂ tshelə akwa əndje kɔ. 12 Ə̂në alɔ vɔ̂tə̂ kə dɨ nə kɔ, azü-awla nə morofo amanə bishi nə gî tə̂ əndje trö də ətshə ə pâ kə ətshə ə pa: «Grɔ̈ ə̂kpû azü nə ndə kə pa əndje gu na ye gâ lagɔ də tshelə aaya aəgɔ kanika əndje sɔtə̂ ə̂sə̂ əlo də rəgo mbrə ə̂në a sə gâ lə ngbûndû.» 13 Jezu pâ kə əndje ə pa: «E kö rəgo də ə̂tə̂ e kə əndje.» Əndje kîrə əpʉ ə pa: «Ä sə kʉ də mapa mindû də agiangû bishi. Bə yində nə ə pa ä na ə yɔ rəgo mbrə azü səye nɔ̂?» 14 Kʉtə̂ akoshe sə̂ trö də sake mindû (5 000). Jezu pâ kə atrawaya nə̂ ye nə ə pa: «E pä kə əndje, əndje sə gâ tʉ ə ngbo tə̂ əndje gâ tə̂ nə zazü bishi də morofo zazü bishi də morofo.» 15 Əndje mâ mata ə̂në tshə pâ ndə nə kɔ, əndje pâ ndə nə kə azü nə nɔ̂ əndje sə̂ gâ tʉ. 16 Bale, Jezu kô amapa nə mindû nə də agiangû nə bishi nə, ə lîshi gâ lafɔ ə ê ə̂rɔ̂ əpʉ gâ pâ nə ə ngɔ̂ tshelə nə ə kô kə atrawaya nə ndə kə pa əndje kru tshelə nə tə̂ ə̂kpû azü nə. 17 Azü nə nɔ̂ zɨ̂ rəgo nə â tshelə əndje sû. Əndje rɔ̂ ə̂dû rəgo nə ə sû kakli morofo amanə bishi.

18 Ndə ə̈bə̈ alɔ, Jezu sə̂ kə yu Ndjapä tə̂ ə̈bə̈ ətshe, atrawaya nə̂ ye sə̂ gâ ngotə̂ ye. Tshə yû əndje ə pa: «Ə̂kpû azü nə pa mə sə tə əde?» 19 Əndje kîrə əpʉ ə pa: «Alabə̈ nə pa Zââ Batistə, alabə̈ əndje pa Eli, alabə̈ aata əndje pa ə̈bə̈ angbrɔ awopandəma Ndjapä bale kə shê kɔ.» 20 Bale, tshə yû əndje ə pa: «Kâ ənə̂ e, e pa mə sə tə əde?» Piarə kîrə əpʉ ə pa: «Əbə, bə də̂ Kristə nə̂ Ndjapä.» 21 Jezu ngâ kə əndje tə bandanə ə pâ əndje pa ndə nə pa kə ə̈bə̈ əzü bale ne. 22 Tshə pâ kwatə̂ye ə pa: «Əgblə nə̂ Əzü lï ndə kə wu əyo tə bandanə, aâgbɔ̂ azü də aâgbɔ̂ azü nə̂ aawotokrɔ gâ ndə aawoyisə̂ âgbɔ̂ əpʉ nə̂ Mayïzə sə kə wəra tə̂ əndje tə̂ ye, əndje sə kə wo ətshə, tshə sə kə she tə̂ vəta əlo nə.»

23 Jezu pâ kwatə̂ye kə əndje nɔ̂ ə pa: «Kədə əzü kə yində kə na mandâ əmə, tshə wə̈ra tə̂ ye tə̂ ye də ə̂tə̂ ye, ə zä masheyɔ nə̂ ye* alɔnɔ̂ ka ə za äwä əmə. 24 Əzü ə̂në tshə yində kə bata əwu ye, tshə sə kə tshu nə. Bale, əzü ə̂në tshə sə trö ndə kə tshu mbrə əmə, tshə sə kə sə tə sorô. 25 Kədə ə̈bə̈ əzü kə sɔtə̂ aərə tshepashɔ səye nɔ̂, â sə sə tə sorô* ne wala tshə â ndɨ əwu ye də ə̂tə̂ ye, ərə yekɔ də̂ tshə sə kə sɔtə̂ nə mandânə? 26 Mbrə ə̂në kədə əzü kə ma gana əmə, mbrə əpʉ nə̂ əmə, Əgblə nə̂ Əzü sə kə ma gana lə ala ye ndje, alɔ ə̂në tshə sə kə yi kumu ye lə ə̂yî ye, də ə̂yî Abä də ənə̂ atrawaya nə̂ Ndjapä ə̂në əndje sə kpî kɔ. 27 Mə pa djatra əpʉ kə e, alabə̈ azü bale bale lə takpa tə̂ azü ə̂në əndje ka kotəye kɔ, əndje sə sə kə tshu nə ne ʉrrr ə wu Əgɔngerə nə̂ Ndjapä gâ ye kane.»

28 Trö də əlo mindû amanə vəta, mandânə ə̂në tshə pâ əpʉ səkɔ, Jezu kô a-Piarə də Zââ gâ ndə Zake ə ô də əndje mâ pâ kaga ndə kə yu Ndjapä. 29 Alɔ ə̂në tshə sə̂ kə yu Ndjapä nə kɔ, tshitshi ye dô tə̂ ye kpî, aləba nə̂ ye dô tə̂ əndje tə ə̂mbînə ə tshê. 30 Pə mandânə, azü bishi wûtu ə sə̂ kə pa əpʉ kə ətshə, azü nə kə də̂ Mayïzə də Eli. 31 Əndje wûtu lə ə̂yî ə sə kə pa ndə äwä ə̂në tshə sə kə tshu də nə mâ Jeruzalamə kɔ. 32 Əlo mbrə̂ Piarə nə də agbɔbəngâ nə, əndje tshû də əlo gâ ye. Alɔ ə̂në əndje jô lə əlo nə gâ ye kɔ, əndje wû ə̂yî Jezu də akoshe nə bishi ə̂në əndje sə̂ ngotə̂ ye kɔ. 33 Alɔ ə̂në akoshe səkɔ sə̂ kə katə̂ Jezu nə kɔ, Piarə nə pâ kə ətshə ə pa: «Âgbɔ̂ Əzü, ə sə tə ə̂rɔ̂nə ndə kə pa a sə pə kotəye, ä mbrə agbanda vəta, bale mbrə əbə, bale mbrə Mayïzə, bale mbrə Eli.» Tshə wûsə̂ əpʉ ə̂në tshə pâ kɔ wu ne. 34 Ə̂në tshə sə̂ kə pa əpʉ sə̂ rəkɔ, andra nâ ə zâ əndje, awa zâ atrawaya nə tə bandanə ə̂në andra nə sə̂ kə jerə gâ pâ əndje kɔ. 35 Ə̈bə̈ tshema tô lə andra nə ə pa: «Ətshə tshə səye, tshə sə tə Ɨrɨ əmə ə̂në mə kê ətshə gâ ye. E djï ətshə!» 36 Alɔ ə̂në əndje djî tshema səkɔ, Jezu sə̂ kʉtə̂ ye. Tə̂ alɔ nə səkɔ, atrawaya nə sə̂ kʉ ngboo ə pâ ndə ərə nə ə̂në əndje wû kɔ pâ kə ə̈bə̈ əzü bale ne.

37 Əlo bale mandânə ə̂në əndje jêrə pâ kaga nə gâ ye kɔ, ə̈bə̈ əgerə ə̂kpû azü nâ ə tê Jezu. 38 Lə takpa tə̂ ə̂kpû azü nə, ə̈bə̈ koshe tâ râwâ ə pa: «Awoyisə̂ ərə, mə kɨ kə əbə, gä ndə əgblə koshe nə̂ əmə, mbrə ə̂në tshə sə tə əgblə koshe nə̂ əmə kʉ kpiabale. 39 Alɔnɔ̂ ə̈bə̈ afrɔ yîrə̂ sə kə za ətshə, alɔ ə̂në tshə â za ətshə, trale tshə ta râwâ, afrɔ yîrə̂ nə wli ətshə, tshə gugu tə bandanə, frʉtshɔ wutu ndʉ ama ye, afrɔ yîrə̂ nə katə̂ ye ka katshä ne ə gi əyo tə̂ ye ʉrrr â wutu. 40 Mə kɨ̂ ə̂sə̂ əyo tə̂ əmə kə atrawaya nə̂ zə ndə kə pa əndje grɔ ətshə, əndje grɔ̂ ətshə tro gâ ye.» 41 Jezu kîrə əpʉ ə pa: «E-e, azü tshe kpəsəye ə̂në e sə sə də lɔsu ne ə sə tə aəmbrʉ azü kɔ. Mə sə kə sə pə ngotə̂ e ʉrrr gorɔ? Mə sə kə ru tshelə əmə tə̂ e ʉrrr gorɔ? Nä də əgblə nə̂ zə nə mâtəye.» 42 Ə̂në əgblə nə nâ trö də Jezu nə kɔ, afrɔ yîrə̂ nə wlî ətshə gâ tə̂ ashɔ ə vɔ̂tə̂ kə gbətɔ ətshə də âgbɔ̂. Bale Jezu ngâ kə afrɔ yîrə̂ nə ə grɔ̂ ətshə tə̂ əgblə nə ə kîrə ətshə kə abä nə. 43 Kumu əndje kpê pâ əndu əndje mbrə âgbɔ̂ awlra nə̂ Ndjapä nə.

Alɔ ə̂në azü nə sə̂ pə kə tegbɔ kumu əndje gâ pâ ərə ə̂në tshə mâ kɔ, Jezu pâ kə atrawaya nə̂ ye ə pa: 44 «E drä ətu e ə djï əpʉ səye. Əndje sə kə za Əgblə nə̂ Əzü gâ lə kəna azü.» 45 Atrawaya nə̂ ye nə djî tshelə âdâ əpʉ sə̂ ə̂në tshə pâ kɔ djî ne. Ndjapä zâ əpʉ nə wû tə̂ əndje kanika əndje dji tshelə âdâ nə dji ne. Əndje mbrə̂ awa ndə kə yu ətshə tə̂ tshelə âdâ nə.

46 Atrawaya nə vɔ̂tə̂ kə pa ashera lə takpa tə̂ əndje ndə kə wu əde kə sə tə âgbɔ̂ əzü ə rô angâ nə. 47 Jezu wûsə̂ əpʉ ə̂në ə sə̂ mâ tə̂ lɔsu əndje kɔ, tshə zâ ə̈bə̈ aya əgblə ə zâ ətshə tɔ gâ ngotə̂ ye. 48 Tshə pâ kə əndje ə pa: «Əzü nɔ̂ ə̂në tshə wəra aya əgblə səye də əɨrɨ əmə tə ə̂rɔ̂nə, tshə wəra əmə də ə̂tə̂ əmə, əzü ə̂në tshə wəra əmə tə ə̂rɔ̂nə, tshə wəra ətshə ə̂në tshə wlâ əmə kɔ. Ətshə ə̂në tshə sə tə əngʉ nə lə takpa tə̂ e nɔ̂, ətshə kə sə tə âgbɔ̂ əzü nə.»

49 Zââ zâ əpʉ ə pa: «Âgbɔ̂ Əzü, ä wû ə̈bə̈ koshe ə̂në tshə sə̂ kə grɔ aafrɔ ayirə̂ də əɨrɨ zə, ä shêra ətshə tə̂ nə, mbrə ə̂në tshə za äwä zə za mata ä ne.» 50 Jezu pâ kə ətshə ə pa: «E shä shëra ətshə tə̂ nə ne. Əzü ə̂në tshə sə sə də əpʉ də e ne, tshə sə mbrə e.»

51 Alɔ ə̂në əlo ndə kə pa Jezu o na ye gâ lafɔ ndô trö kɔ, tshə zâ ama ndə kə na na ye ma Jeruzalamə. 52 Tshə wlâ alayïawla ətshi ye. Əndje sə̂ kə na na ye ə yî kumu əndje gâ lə ə̈bə̈ aya əgɔ lə ashɔ Samari ndə kə gamba ətshe mbrə ətshə. 53 Azü əgɔ nə wə̂ra ətshə wə̂ra tə ə̂rɔ̂nə ne mbrə ə̂në tshə sə kə na mâ Jeruzalamə. 54 Atrawaya nə̂ ye nə Zake də Zââ wû ərə sə̂ rəkɔ, əndje pa: «Âgbɔ̂ Əyïngerə, bə yində nə ə pa ä za ama kə əwo ə to mâ lafɔ ə jerə ə ju əndje nɔ̂?» 55 Jezu dô tə̂ ye gâ tə̂ əndje ə ngâ kə əndje. 56 Mandânə, əndje rô ə nâ gâ lə ə̈bə̈ ata aya əgɔ.*

57 Alɔ ə̂në əndje zâ äwä ndə kə na na ye, ə̈bə̈ əzü pâ kə Jezu ə pa: «Mə sə kə za äwä zə tə̂ ətshe nɔ̂ ə̂në bə sə kə na tə̂ nə kɔ.» 58 Jezu kîrə əpʉ kə ətshə ə pa: «Agbagraba sə də əgro əndje tə̂ nə, ayanu sə də komɔ əndje, bale, Əgblə nə̂ Əzü sə sə də ə̈bə̈ ətshe ndə kə za kumu ye gâ tʉ gâ tə̂ nə ndə kə wu tə̂ ye ne.»

59 Tshə pâ kə ə̈bə̈ ata nə ə pa: «Zä äwä əmə.» Koshe nə kîrə əpʉ ə pa: «Âgbɔ̂ Əyïngerə, kätə̂ äwä kə əmə, mə na ə shi abä əmə angbʉlînə gâ ye kane.» 60 Jezu pâ kə ətshə ə pa: «Kätə̂ akuzu, əndje shi angâ əndje də̂ akuzu. Əbə, nä ə mʉ̈ əpʉ Əgɔngerə nə̂ Ndjapä.»

61 Ə̈bə̈ nə pâ kwatə̂ye ə pa: «Âgbɔ̂ Əyïngerə, mə za äwä zə je, kätə̂ əmə, mə na ə bla azü tshelə bəngʉ nə̂ əmə angbʉlînə gâ ye kane.» 62 Jezu kîrə əpʉ kə ətshə ə pa: «Əzü ə̂në tshə to kəna ye gâ tə̂ ngapo apagra kəndɨ ndə kə wa kəndɨ ə lishi gâ mandâ ye, tshə lï lï də Əgɔngerə nə̂ Ndjapä ne.»