1 Tə̂ angbʉlî əlo dəmashi nə, ayashe nə âfɔ pə-ê də əzɨ ə nâ mâ tə̂ manda ə̂dû nə də yombo nə ə̂në əndje gâmba gâ ye kɔ. 2 Əndje wû ə pa əndje gî əkpʉ nə ə̂në əndje zâ gâ tə̂ manda ə̂dû nə kɔ gashe gâ ye. 3 Əndje lî gâ lə ə̂dû nə, bale, əndje sɔ̂tə̂ əko Âgbɔ̂ Əyïngerə Jezu nə sɔ̂ ne. 4 Ə̂në əndje sə̂ pə kə tegbɔ kumu əndje gâ pâ ərə nə ə̂në ə wûtu kɔ, bale, akoshe bishi wûtu gâ tə̂ əndje, aləba nə̂ əndje tshe ə tshe. 5 Awa mbrə̂ ayashe nə, əndje têrə kumu əndje gâ tʉ. Akoshe nə pâ kə əndje ə pa: «Mbrə yekɔ də̂ e sə kə pra əzü ə̂në tshə sə tə sorô kɔ lə takpa tə̂ akuzu? 6 Tshə sə sə kotəye ne, tshə shê gâ ye. E lï tshelə e gâ pâ əpʉ ə̂në tshə pâ kə e alɔ ə̂në tshə sə̂ pə mâ Galile kɔ 7 ə pa: "Əgblə nə̂ Əzü lï ndə kə pa azü za ətshə gâ lə kəna alayïnyaka, əndje wo ətshə gâ ala masheyɔ â tə̂ vəta əlo nə, tshə sə kə she nə."»Atrawaya nə̂ Ndjapä tə̂ ama ə̂dû

8 Ə̂sə̂ əpʉ sə̂ ə̂në Jezu pâ kɔ tê gâ lə əndje. 9 Əndje âfɔ mâ tə̂ manda ə̂dû nə je ə gû ə pâ ndəma əpʉ aərə sə̂ nɔ̂ kə azü-awla morofo amanə bale də ə̂dû atrawaya nə. 10 Ayashe səkɔ kə də̂: Marə̂ nə̂ əgɔ Magədala də Zanə də Marə̂, əyï Zake gâ ndə alabə̈ ayashe nə. Əndje pâ kʉtə̂ əpʉ səkɔ kə azü-awla nə. 11 Bale, azü-awla nə pâ ənə̂ əndje ə pa əpʉ səkɔ sə̂ sə̂ tə djatra əpʉ ne, əndje zâ lɔsu əndje zâ gâ tə̂ əpʉ nə̂ ayashe səkɔ ne. 12 Bale, Piarə âfɔ ə kpê ärɔ̈ na na ye mâ tə̂ manda ə̂dû nə mâ je. Tshə têrə ə wû kʉtə̂ aama aləba gâ tʉ. Mandânə, tshə dô tə̂ ye gu na ye, kumu ye kpê pâ əndu ye mbrə ərə nə ə̂në ə mâ kɔ.

13 Kʉ pə tə̂ alɔ nə səkɔ, atrawaya bishi sə̂ kə na na ye mâ lə ə̈bə̈ aya əgɔ ə̂në əɨrɨ nə kə də̂ Emayusə kɔ. Əgɔ səkɔ dɨ̂ tə̂ Jeruzalamə ə lï də ana ə̈nü lə ə̈nü alɔ bishi. 14 Lə ana nə, əndje sə̂ kə pa əpʉ gâ pâ aərə nɔ̂ ə̂në ə mbrə̂ kɔ. 15 Alɔ ə̂në əndje sə̂ kə pa əpʉ nə ə sə̂ kə shera ashera gâ pâ əpʉ səkɔ, Jezu tê əndje â əndje də aəndje sə̂ kə na na ye tə̂ äwä nə. 16 Əndje wû ətshə, bale, ə̈bə̈ ərə kânga äwä tə̂ əndje ndə kə pa əndje yerɔ ətshə. 17 Jezu yû əndje ə pa: «Əpʉ yekɔ də̂ e pa ndə nə lə ana nə kɔ?» Əndje kâ tri, əyo rô pâ əndje gâ ye. 18 Ə̈bə̈ nə bale lə takpa tə̂ əndje ə̂në əɨrɨ ye kə də̂ Kleɔpasə kɔ kîrə əpʉ kə ətshə ə pa: «Kʉtə̂ əbə tshî lə Jeruzalamə səye kə wusə̂ aərə ə̂në ə mbrə̂ lə aəlo səye kɔ wu ne a?» 19 Tshə yû əndje ə pa: «Ərə yekɔ?» Əndje kîrə əpʉ kə ətshə ə pa: «Ərə ə̂në ə mbrə̂ gâ tə̂ Jezu əzü əgɔ Nazaratə kɔ. Tshə sə̂ tə worɔgbɔ awopandəma Ndjapä tə̂ äwä kə ma aərə nə̂ ye də aəpʉ nə̂ ye lə ala Ndjapä də azü nɔ̂. 20 Aâgbɔ̂ azü nə̂ aawotokrɔ də alayïngbanga nə̂ ä zâ ətshə gâ lə kəna azü ndə kə pa əndje wa ngbanga kuzu gâ pâ ye â əndje wô ətshə gâ ala masheyɔ kɔ. 21 Ä zâ lɔsu ä gâ pâ ye ə pa ətshə əte kə sə kə djɔ Isərayalə lə kanga. Bale, vəta əlo nə kpəsəye â aərə sə̂ mbrə̂ kɔ. 22 Ə sə tə djatra əpʉ, alabə̈ ayashe ə̂në əndje sə lə takpa tə̂ ä kɔ, əndje pâ ə̈bə̈ əpʉ ə̂në kumu ä kpê pâ əndu ä mbrə nə kɔ. Əndje nâ mâ tə̂ manda ə̂dû pə-ê də əzɨ 23 ə wû əko ye wû ne. Əndje gû ə pâ kə ä ə pa alane wû atrawaya nə̂ Ndjapä â əndje pâ kə alane ə pa tshə sə tə sorô. 24 Alabə̈ angâ ä nâ mâ tə̂ manda ə̂dû nə mâ je ə wû aərə nə mata ə̂në ayashe nə pâ ndəma nə kɔ. Bale, ətshə, əndje wû ətshə wû ne.» 25 Bale, Jezu pâ kə əndje ə pa: «E-e, azü ə̂në e wusə̂ ərə wu ne kɔ, ə̂në kə yində aəpʉ nɔ̂ ə̂në aawopandəma Ndjapä pâ kɔ gbɔ ə gbɔ tə̂ e kɔ! 26 Kristə nə lï lï ndə kə pa tshə wu marä tə̂ əyo rəke əlînə ka ə li gâ lə ə̂yî ye ne a?» 27 Mandânə, tshə vɔ̂tə̂ nə tə əpʉ ə̂në Mayïzə də aawopandəma Ndjapä nɔ̂ tâ gâ lə fraka kɔ ə yîsə̂ âdâ Fraka nə̂ Ndjapä ə̂në ə wû ətshə nɔ̂ kɔ kə əndje.

28 Alɔ ə̂në əndje ndô trö də tshelagɔ nə ə̂në əndje sə̂ kə na gâ tə̂ nə kɔ, Jezu mâ tə̂ ye a pa də tshə yîndə kə na ngrʉ̂. 29 Bale, əndje shêra ətshə ə pa: «A də a-e sə pə koye mbrə ə̂në alɔ dɨ̂ gâ ye, ətshe vɔ̂tə̂ kə bu nə gâ ye.» Tshə lî gâ lə anda ndə kə pa əndje də aəndje daka pə kôto. 30 Alɔ ə̂në əndje sə̂ gâ tʉ ndə kə zɨ rəgo, tshə zâ mapa ə ê ə̂rɔ̂ əpʉ gâ pâ nə ə ngɔ̂ tshelə nə ə kô kə əndje. 31 Bale, tshelə ala əndje krâ, əndje yêrɔ ətshə, mandânə, tshə yû tə̂ əndje gâ ye. 32 Â əndje pâ lə takpa tə̂ əndje ə pa: «Lɔsu əzə̂ sə̂ sə̂ kə tshe nə alɔ ə̂në tshə sə̂ kə pa əpʉ kə əzə̂ ə sə̂ kə yisə̂ âdâ Fraka nə̂ Ndjapä kə əzə̂ lə äwä kɔ ne a?»

33 Kʉ pə tə̂ alɔ nə səkɔ, əndje âfɔ ə dô tə̂ əndje ə gû mâ Jeruzalamə ə tê azü-awla morofo amanə bale nə də ə̂dû azü nə ə̂në əndje ngbô tə̂ əndje gâ tə̂ nə kɔ. 34 Azü nə pâ kə əndje ə pa: «Djatra əpʉ, Âgbɔ̂ Əyïngerə shê gâ ye, Shemɔ wû ətshə!» 35 Bale, atrawaya nə bishi pâ ndəma ərə nə ə̂në ə wûtu gâ tə̂ əndje lə äwä kɔ də äwä ə̂në əndje yêrɔ Jezu tə̂ alɔ ə̂në tshə sə̂ kə ngɔ tshelə mapa nə kɔ.

36 Alɔ ə̂në əndje sə̂ pə kə pa əpʉ səkɔ, Jezu də ə̂tə̂ ye wûtu gâ lə takpa tə̂ əndje ə blâ əndje ə pa: «Blatshe sə̈ də e!»

37 Awa mbrə̂ əndje â lɔsu əndje tɔ̂ kpi kpi kpi, əndje pâ ənə̂ əndje ə pa alane wû ə̈bə̈ ngandrə gâ ye. 38 Bale, Jezu pâ kə əndje ə pa: «Awa mbrə e ndə yekɔ? E sə də əpʉ ashera tə̂ lɔsu e mbrə yekɔ? 39 E wü kəna əmə də ə̈nü əmə: djatra əmə kə sə̂! E göro əmə ə wü. Ngandrə sə sə də dɔ̂ngɔ̂ wala gbabi tə̂ ye mata ə̂në mə sə də nə kɔ ne.»

40 Ə̂në tshə sə̂ kə pa əpʉ səkɔ, tshə mâ asheku lə akəna ye də aə̈nü ye kə əndje. 41 Tshelə əndje sə̂ də ə̂rû wââ â əndje sə̂ də ashera tə̂ lɔsu əndje, kumu əndje kpê pâ əndu əndje gâ ye. Jezu yû əndje ə pa: «E sə də ə̈bə̈ ərə ndə kə zɨ nə kotəye a?»

42 Əndje zâ ə̈bə̈ ə̈ndö giangû ə̂në əndje zô ə zô kɔ kə ətshə. 43 Tshə zâ ə zɨ̂ də ala əndje. 44 Mandânə, tshə pâ kə əndje ə pa: «Əpʉ sə̂ ə̂në mə pâ kə e alɔ ə̂në mə sə̂ pə lə takpa tə̂ e kɔ ə tə nə kə səye: aəpʉ nɔ̂ ə̂në əndje tâ gâ lə âgbɔ̂ əpʉ nə̂ Mayïzə də əpʉ nə̂ aawopandəma Ndjapä, ndje gâ lə Aətshi gâ pâ əpʉ nə̂ əmə kɔ ə lï ndə kə pa ndəma nə mbrə.»

45 Bale, tshə yîsə̂ tshelə âdâ Fraka nə̂ Ndjapä kə əndje ndə kə pa əndje dji tshelə nə. 46 Tshə pâ kə əndje ə pa: «Əndje tâ gâ lə fraka ə pa: Kristə sə kə wu əyo ə tshu ə she tə̂ vəta əlo nə. 47 Əndje sə kə yisə̂ əpʉ də əɨrɨ ye kə azü tshepashɔ nɔ̂ ə vɔtə̂ nə mâ Jeruzalamə ə pa azü tshi äwä angbrɔ kə mbrə tə̂ əndje tʉ kanika Ndjapä gba tshelə anyaka nə̂ əndje. 48 E sə tə azü ə̂në e wû aərə səkɔ də ala e gâ ye. 49 Mə sə kə wla ərə ə̂në Abä əmə zâ ama ndə kə mbrə nə kɔ gâ pâ e. Bale, e-e, e sə̈ pə kpə lə gala nə kotəye ʉrrr ndjɔ awlra tshelafɔ jerə gâ pâ e gâ ye kane.»

50 Jezu nâ də əndje ʉrrr mâ Betani ə yî kəna ye gâ lafɔ ə ê ə̂rɔ̂ əpʉ gâ pâ əndje. 51 Alɔ ə̂në tshə sə̂ kə e ə̂rɔ̂ əpʉ nə gâ pâ əndje kɔ, tshə kâtə̂ əndje ə ô na ye gâ lafɔ. 52 Bale, ənə̂ əndje, əndje vrɔ̂ ətshə â dô tə̂ əndje ə gû mâ Jeruzalamə də âgbɔ̂ ə̂rû tə̂ lɔsu əndje. 53 Alɔnɔ̂, əndje sə̂ mâ lə Anda Ndjapä â sə̂ kə mbe Ndjapä.