1 Âgbɔ̂ Yîrə̂ sû lɔsu Jezu trɔ̂, â tshə wûtu tə̂ ama Jurda ndə kə gu na ye. Âgbɔ̂ Yîrə̂ nə nâ də ətshə mâ lə ngbûndû. 2 Mâ lə ngbûndû nə mâ je, djablo trâ lɔsu ye lə aəlo zazü bishi. Lə aəlo sə̂ nɔ̂, tshə zɨ̂ ə̈bə̈ ərə zɨ̂ bale ne. Mandânə, əgo mî ətshə. 3 Bale, djablo nə pâ kə ətshə ə pa: «Kədə bə sə tə Ɨrɨ Ndjapä, pä əpʉ kə badja səye ə do tə̂ ye tə rəgo.» 4 Jezu pâ kə ətshə ə pa: «Əpʉ Ndjapä pâ: "Ə də̂ kʉ mbrə rəgo də̂ əzü ə sə tə sorô ne."»*

5 Mandânə, djablo nə ô də ətshə ngrʉ̂ mâ lafɔ ə yîsə̂ aəgɔ tshepashɔ nɔ̂ kʉ kôto səkɔ kə ətshə 6 â pâ kə ətshə ə pa: «Mə sə kə za awlra kə əbə ndə kə sə gâ pâ aəgɔ səye nɔ̂ ə ko aərə tshelə nə nɔ̂ kə əbə mbrə ə̂në əndje kô aərə sə̂ nɔ̂ kə əmə gâ ye. Mə lï ndə kə ko kə əzü mata ə̂në tshelə əmə yində nə. 7 Kədə bə gbəte gâ tshekudu əmə â vrɔ əmə, aərə səye nɔ̂ sə kə sə tə ənə̂ zə.» 8 Jezu pâ kə ətshə ə pa: «Fraka nə̂ Ndjapä pâ: "Vrɔ̈ Əyïlingû tə Ndjapä nə̂ zə ə mbrə kʉ kə ətshə bale."»*

9 Mandânə, djablo nə nâ də Jezu mâ Jeruzalamə ə zâ ətshə tɔ mâ tə̂ kumu Anda Ndjapä ə pâ kə ətshə ə pa: «Kədə bə sə tə Ɨrɨ Ndjapä, äfɔ kotəye ə te mâ tə̂ ashɔ-e, 10 mbrə ə̂në Fraka nə̂ Ndjapä pâ: "Ndjapä sə kə za ama kə atrawaya nə̂ ye də əpʉ zə ndə kə pa əndje bata əbə." 11 Kwatəndje, Fraka nə̂ Ndjapä nə pâ: "Əndje sə kə za əbə gâ lə kəna əndje kanika bə za ə̈nü zə za da badja ne."»* 12 Jezu pâ kə ətshə ə pa: «Fraka nə̂ Ndjapä pâ: "Trä lɔsu Əyïlingû tə Ndjapä nə̂ zə trä ne."»*

13 Ə̂në djablo nə trâ lɔsu Jezu lə aərə nɔ̂ gâ ye kɔ, tshə kâtə̂ ye tʉ ə rô ndə kə ka tə̂ ə̈bə̈ alɔ.

14 Jezu dô tə̂ ye ə gû mâ Galile. Awlra nə̂ Âgbɔ̂ Yîrə̂ sû lɔsu ye trɔ̂. Əɨrɨ ye zâ ətshe lə aəgɔ nə nɔ̂. 15 Tshə yîsə̂ əpʉ kə azü lə aanda aangbɔ. Azü nɔ̂ pâ ə̂rɔ̂ əpʉ də əɨrɨ ye.

16 Jezu nâ mâ Nazaratə, əgɔ ə̂në tshə gêrə lə nə kɔ. Tshə lî gâ lə anda aangbɔ nə tə̂ əlo saaba mata ə̂në tshə mbrə alɔnɔ̂ kɔ. Tshə âfɔ ndə kə dɨ Əpʉ Ndjapä. 17 Əndje zâ Fraka nə̂ awopandəma Ndjapä Ezayi kə ətshə. Tshə wôra tshelə nə ə sɔ̂tə̂ ə̂sə̂ əpʉ nə ə̂në ə pâ:

18 «Yîrə̂ Əyïlingû sə gâ pâ əmə,

mbrə ə̂në tshə kê əmə ndə kə mʉ Ə̂rɔ̂ Əpʉ kə alayïəyo.

Tshə wlâ əmə ndə kə pa kə alayïkânga ə pa kânga nə̂ əndje ə nglɔ je,

ndə kə pa kə alayïbula ə pa ala əndje ə sɔ je,

ndə kə tshɔ azü lə əyo nə̂ əndje,

19 ndə kə mʉ əpʉ kə azü ə pa mandânə səye, Əyïlingû sə kə yisə̂ ə̂rɔ̂tə̂ ye kə əndje.»*

20 Mandânə, tshə wûru fraka nə gâ tə̂ nə ə zâ kə awombrə kosəra lə anda aangbɔ nə ə sə̂ gâ tʉ. Azü nə nɔ̂ lə anda nə lîshi gâ tə̂ ye. 21 Tshə vɔ̂tə̂ kə pa əpʉ kə əndje ə pa: «Kpəsəye, ərə ə̂në Fraka nə̂ Ndjapä səye pâ ndə nə â e dji kɔ ə wûtu gâ ye.» 22 Azü nə nɔ̂ pâ ə̂rɔ̂ əpʉ də əɨrɨ ye. Kumu azü nə nɔ̂ kpê pâ əndu əndje mbrə ə̂rɔ̂ əpʉ ə̂në tshə pâ kɔ â əndje pâ: «Ə də̂ ɨrɨ Jozafu də̂ kə səye ne a?» 23 Bale, Jezu pâ kə əndje ə pa: «Banda əpʉ, e sə kə pa dame ə̂në azü ə pa kɔ kə əmə: "Awombrə ayɔ rəka, mbrə̈ ayɔ gâ tə̂ rəka nə̂ zə də ə̂tə̂ zə." Kwatəndje, e sə kə pa kə əmə ə pa: "Ä djî ndə aərə ə̂në bə mbrə̂ mâ Kaprənayɔmə kɔ gâ ye. Mbrə̈ ndje kwatə̂zə lə əgɔ nə̂ zə də ə̂tə̂ zə."» 24 Tshə pâ kwatə̂ye kə əndje ə pa: «Djatra əpʉ, mə pa kə e: ə̈bə̈ awopandəma Ndjapä bale ə̂në azü tshelə əgɔ nə̂ ye də ə̂tə̂ ye yində ye kɔ guta gu ne. 25 Mə pa djatra əpʉ kə e: Tə̂ alɔ nə̂ Eli, ayashe koya ngbâ ə ngbâ lə əgɔ Isərayalə. Alɔ ə̂në yavrɨ nî nî ne lə ə̂ngû vəta də yipʉ mindû amanə bale kɔ, əgo mî azü tə bandanə lə əgɔ nə. 26 Bale, Ndjapä wlâ Eli nə wlâ mâ ndə ə̈bə̈ yashe koya səkɔ bale ne. Tshə wlâ ətshə kʉ kə ə̈bə̈ yashe koya mâ Sarəpəta lə əgɔ Sidɔ. 27 Tə̂ alɔ nə̂ Elize, awopandəma Ndjapä, alayïbroma ngbâ ə ngbâ ndje lə əgɔ Isərayalə. Broma nə̂ ə̈bə̈ nə bale kâ kâ ne. Kʉtə̂ ənə̂ Naama, əzü əgɔ Siri kə kâ.»

28 Tshelə azü nə nɔ̂ lə anda aangbɔ nə kô əndje ə̂në əndje djî əpʉ səkɔ. 29 Əndje âfɔ ə gbə̂tɔ ətshə wutu nə gâ tə̂ ama əgɔ nə ə nâ də ətshə gâ tə̂ matshi kaga ə̂në əgɔ nə sə̂ pâ nə kɔ kanika alane gʉ ətshə gâ lə kudu kaga nə. 30 Bale, tshə wûtu lə takpa tə̂ əndje ə rô ərə nə̂ ye.

31 Jezu jêrə mâ Kaprənayɔmə, ə̈bə̈ gala lə əgɔ Galile ə yîsə̂ Əpʉ Ndjapä kə azü tə̂ əlo saaba. 32 Azü nɔ̂ ə̂në əndje djî əpʉ nə̂ ye nə kɔ, kumu əndje kpê pâ əndu əndje mbrə ə̂në tshə yîsə̂ əpʉ nə tə əyïngerə. 33 Lə anda aangbɔ nə, ə̈bə̈ koshe sə̂ je də afrɔ yîrə̂ lə ye. Tshə tâ râwâ tə âgbɔ̂ ə pa: 34 «Wââ! Jezu, əzü əgɔ Nazaratə, ərə yekɔ nə̂ zə tə̂ ä? Bə nâ ndə kə wo ä a? Mə wusə̂ zə: Bə sə kpî tə əzü ə̂në Ndjapä wlâ əbə kɔ.» 35 Jezu ngâ kə afrɔ yîrə̂ nə ə pâ: «Sə̈ ngboo ə wütu lə koshe səye!» Afrɔ yîrə̂ nə wlî koshe səkɔ gâ tə̂ ashɔ lə ala azü nɔ̂ ə wûtu lə ye ə mâ ə̈bə̈ ərə mâ tə̂ ye bale ne. 36 Awa zâ azü nə nɔ̂, əndje yû tə̂ əndje ə pa: «Marä əpʉ yekɔ kə sə̂? Tshə zâ ama tə əyïngerə də awlra kə aafrɔ ayirə̂ ndə kə pa əndje wutu lə azü â əndje wûtu Lïndə̂ əpʉ ama ye nə.» 37 Əɨrɨ Jezu zâ ətshe lə aəgɔ nə nɔ̂.

38 Jezu wûtu lə anda aangbɔ nə ə nâ mâ lə anda nə̂ Shemɔ. Mbea Shemɔ nə tə yashe sə̂ də rəka tə bandanə: tshelə akwa ye sə̂ kədjï kədjï, â əndje pâ kə Jezu nə ə pa tshə mbrə ə̈bə̈ ərə mbrə ətshə. 39 Jezu têrə gâ pâ ye ə ngâ kə rəka nə, â rəka nə kâtə̂ ye. Yashe nə âfɔ trale ə vɔ̂tə̂ kə ko rəgo ndə kə pa əndje zɨ. 40 Də lɔkədɨ nə, azü kô alayïdongo arəka nɔ̂ ə̂në əndje sə̂ lə aanda nə̂ əndje kɔ ə nâ də əndje kə Jezu nə. Tshə zâ kəna ye gâ pâ əndje bale bale â arəka nə̂ əndje nə nglɔ̂. 41 Aafrɔ ayirə̂ wûtu ndje lə azü tə bandanə. Əndje tâ râwâ ə pa: «Bə sə tə Ɨrɨ Ndjapä.» Jezu ngâ kə əndje ə pa əndje sə ngboo, mbrə ə̂në əndje wusə̂ nə ə pa tshə sə tə Kristə.

42 Tshe nə krâ də əzɨ, Jezu wûtu lə əgɔ nə ə nâ mâ lə ngbûndû. Ə̂kpû azü âfɔ ndə kə pra ətshə. Alɔ ə̂në əndje wû ətshə gâ ye kɔ, əndje yîndə kə gbɔ tə̂ ye kanika tshə ro ro tə̂ alane ne. 43 Bale, Jezu pâ kə əndje ə pa: «Ə sə tə ə̂rɔ̂nə ndə kə pa mə yisə̂ Ə̂rɔ̂ Əpʉ Əgɔngerə nə̂ Ndjapä lə alabə̈ aəgɔ ndje, mbrə ə̂në lə kumu nə də̂ Ndjapä wlâ əmə kɔ.» 44 Tshə yîsə̂ Ə̂rɔ̂ Əpʉ nə lə aanda aangbɔ lə aəgɔ lə ashɔ Jude.